الأحد، 22 فبراير 2009

تعبت خلاص ونفسى اكاكى

هل تشعر برغبة ملحه في الطيران؟!!

هل تشعر أحيانا انك نفسك تبيض؟!!

هل تحس انك نفسك تدن؟! (زى الديك)

هل تشعر إن كل ما يطلعلك ريش ، حد يقصقصهولك؟!!

لا ما تفهمنيش غلط، انا مش حاسس انى انا ديك ولا حاجه. ولا حتى فرخه.

لكن ما اكدبشى عليك، انا حاسس ان ريشي متقصقص اول بأول.

ولو عايز الصراحة، انا حاسس بجد انى هاين عليه اصوت ، وألم الناس كمان.

اه والله.

انا مش عارف ألاقيها منين ولا منين ، ألاقيها من بتوع المرور ولا العالم بتوع الطرق والكباري ولا بتوع الضرايب ولا العالم اللى واقفين فى الشارع بيسترزقوا على قفايه دوول.

تصدقوا ؟! لولا الملامه كنت سيبت شغلانة الهندسة دي اللى مش جيبه همها وكنت اشتغلت سايس.

ايوه سايس. انت عارف السايس بيلم كام فى اليوم يا راجل يا محترم ؟!

السايس!!

يا سلام على السايس. اجدع واحد فى مصر .

لا دكان ولا راس مال ولا سجل تجارى ولا ضرايب ولا الكلام ده كله.

هيه حتة خرقه قديمه وصبح صبح ياعم البيه.

ولما ربنا يفرجها عليه ويكبر الشغلانه ويصرف شويه علشان يطور من نفسه ، بيجيب فوطه صفرا قديمه او يستلفها من اى ذبون مش عايزها.

واحلى كلام ياعم الحج.

هو يدوب يرفعلك مساحات العربيه، بس. ويبقى مطلوب منك جوزين لحاليح يامعلم دا لو انت واد كحيان ويدوب بتستلف فلوس البنزين زى حالاتى.

وما يبقاش عاجبه والله كمان.

دا انا مره ياراجل يا محترم ، ركنت عربيتى فى الشارع ، والله العظيم فى الشارع وبعيد عن المنطقه بتاعت الباشا السايس ، اللى هيه عباره عن منطقه فى الشارع برده ، (اصلى ما معاييش) ما انتوا فهمين الفوله.

(المهم)

لقيته طلعلى منين مش عارف وقالى: "انت راكنها فى الشمس ليه كده ياباشا ما تيجى تركنها فى الضل هنا"

بس على مين ، دا انا فاهمه.

المهم، قلتله: "لا ، مش مشكله ، اصل انا هجيب حاجه وامشى على طول "

قالى: "اتفضل ياباشا سيبها وما تقلقش"

وبينى وبينكم : انا قلقت ، وقلقت جدا كمان.

المهم، وانا ماشى لمحت الباشا بيعمل ايه؟؟!!!

بيرفع مساحات العربيه , قلت فى بالى جالك الموت ياتارك الصلاه.

كملت طريقى وسلمت امرى لله

المهم خلصت اللى انا بجيبه وبشويش انا وصاحبى اسحبنا نحية العربيه وقلت استغفله واركب العربيه واطلع مره واحده وكأنى مش من البلدى .

بس مين ، كان غيرى اشطر. طلعلى ياعم الحج منين والله ما اعرف.

خلصت خلاص ، فسلمت امرى لله بدل ما يتقال عليه معفن، وفضيحه كمان ،

جيت ضارب ايدى فى جيبى فلقيت ربع جنيه على نص جنيه واحتمال كان فيه جنيه برده متهيقلى .

فقلت " خير الامور الوسط"

وجيت واخد حتة النص جنيه اللى فى جيبى وودعته بحراره كانت بتحرق قلبى والله ومديت ايدى اللى اتمنيت انها كانت تنمل في اللحظه دى ولا تتمد وتديله حته من تعبى وشقايه بدون سبب ،غير اللهم انه رفعلى المساحات بس، ياساده يا محترمين. (ولو كنت اخدت بالى، كنت رفعتها انا والله)

بس اه النصيب بقى.

الجميل بقى فى الموضوع ايه ؟!!

انه كان هيضربنى وقام قالى: " لسه نص جنيه كمان يا استاذ"

بصراحه انا ما فهمتش او بمعنى اكثر دقه ماحبيتشى افهم"

امت قلتله: "لا كده كويس"

فقام هوه عملى " فضيحه"

بس الموضوع خلص الحمد لله وأخد النص جنيه.

المهم

نرجع لموضوعنا,

انا بجد

نفسى ادخل اوضه مقفوله ، بس ما حدش يسمعنى ،

واقعد اصرخ . اصرخ.

يا اما اكاكى. اكاكى.

اصل انا بعيد عنكم رخصتى اتسحبت , وهدفع فوق ال300 جنيه, انا ونصيبى مع سيادة المرور.

انا لو اعرف , كنت اديت للراجل الجنيه والله.

عموما هبقى احكيلكم حكاية الرخصه . لو فضلت عايش ، وما بضتش

سلام.

هناك 6 تعليقات:

غير معرف يقول...

بصراحة ومتزعلش انت ابخل ماجابت الارض واكيد انت عارف لية مستخصر النص جنية طيب خد عند بقي كمان 300 جنية وتستاهل يا ويكا وانا عارف اكيد العربية بتاعتك تساوي 250جنيةكمل علي تمنها واشرب بيهم شااااااااااااي

غير معرف يقول...

بصراحة الموضوع ميل يخلى الواحد يكاكى بس انت حكيت يدوب حتة موضوع واحد صغير
موضوع المكاكية دة محتا كتاب بحالة مكون من 13 باب كل باب مكون من 13 فصل
ولا بلاش خلية فصل واحد وباب واحد علشان الضرايب
كوكوكوووووكو

غير معرف يقول...

الله يسامحك, بس الغريب يا اخى انك اخدت بالك انى اديته النص جنيه وما اخدتش بالك انه ملوش حق فيها,
وعلى فكره انت عرفت تمن العربيه بتاعتى منين؟! انت شكلك تعرفنى.
هههههههههههه

غير معرف يقول...

هههههههههههههههههههه
لا بجد الحمد لله الذى لا يحمد على مكروه سواه
اهو انا دلوقتى عرفت ميزة البهدلة فى المواصلات
مش لازم نتمنظر دى المنظرة دى طلعت بفلوس وفلوس كتير قوى كمان
اللهم ديمها علينا نعمة وأحفظها من الزوال
nanna

غير معرف يقول...

السلام عليكم وبعد....
بما اني راجل سياسي مهم ومهم جدا ومهم خالص أحب أقول موضوع سعاتك كويس أما بالنسبة لرأيي في الوضع فأنا أحب أقول .............. وكمان ............. ولا يقف الأمر عند هذا الحد بل أيضا أحب بعد الإذن طبعاأن أصرح بأن ............. لذلك فإنه يجب أن .......... وأن ......وأن..........(يا عم سيب رقبتي) والسلام على سيادتكم وسعادتكم وجنابكم وأي حاجة تانية يا باشا ورحمة الله الجبار وبركاته

غير معرف يقول...

انا مش عارف اقولك ايه المره دى اضحك سخرية من الباشا السايس ولا اكاكى معاك انا احترت بصراحه ياهندسه رحم الله عمر بن الخطاب لو سار فى شوارعنا هذه الايام وراى الشوية الظلنطحيه دول لعزل جميع الولاه من على مصر والشام وحولهم الى القضاه لينالوا جزاؤهم ثم بعد ذلك يركبون حمارا ووجوههم الى ذيل الحمار من الخزى والعار وشكرا لك اسد

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...