الجمعة، 20 مارس 2009

مش عارف

مش عارف حقيقى مش عارف ولا فاهم ... مين الغلطان ومين المغلوط فى حقه؟؟!! الناس المفتريه دى اللى كل حبه نسمع عنهم هما اللى غلطانين ؟!! ولا احنا اللى غلطانين فى حقنا؟! الموضوع ده بجد محتاج حسبه... يعنى مثلا ، احنا نقعد نسأل نفسنا شوية اسأله كده ، ونجاوبها بينا وبين بعض بحيث الجماعه اللى خربين بيوتنا دووول ما يسمعوش ويتحججوا بيها. السؤال الاولانى والمهم مثلاً : - هو احنا لو مش موجودين اساساً، كان انحك علينا؟! - الاجابه : لاء طيب سؤال تانى : - هو احنا لو مش بندى فلوسنا لحد يشغلهالنا كانت ضاعت ؟! - الاجابه : لاء طيب بلاش ده.... - هو احنا لو ماكناش عايزين نتغنى باننا نشترى شقق واراضى علشان لما تغلى نبيعها ونكسب حتى ولو هتغلى وما يشترهاش الا الاغنيه ( واللى ما معهوش ما يلزموش) ، كانت الشقق غليت ولا الاراضى ولعت؟!! والشباب ماعرفشى يتجوز؟؟ - الاجابه : برده لاء - طيب لو ما جريناش كلنا على الاراضى الفاضيه وقلنا نلحق نبنيها علشان نلحق الاسعار الغاليه ونبقى من اصحاب البيزبس ، كان الحديد والاسمنت غلى؟؟!! - الاجابه برده والله العظيم : لاء طيب سؤال كمان معلشى بس والله مهم خالص خالص : - هو لو احنا (اصحاب المحلات والتجار اللى بيقولوا انهم على قد حالاتهم ) ما غلوش الحاجه الطاق طاقين علشان غليه شويه عليهم ، كانت الحاجه غليت علينا بالشكل الغريب ده ؟!! - الاجابه و سبحان الله وكأنى بغششكم برده: لاء طيب اقولكم حاجه مره واحد صاحب اخويا فاتح سوبر ماركت ، بتجيله البضاعه لغاية عنده ، نزلتله كارتونة ( مش عارف ايه كده فيها حوالى 40 قطعه) زايده 2 جنيه . عارفين زود تمن القطعه ازاى ؟! خلاها من ربع جنيه لنص جنيه ، واللى يسأله " انت غليتها ليه " يحلفله مليون يمين انها غليت عليه وبقى مضطر يغليها علشان ما يخسرش. طيب سؤال اخييييييييير والله العظيم : - هو لو اى حد فى حضراتنا ، من الناس اللى زعلانه اوى دى وبتسب وتلعن فى الحيتان الكبار اللى خربوا بيوتنا ، لو اى حد فينا اتغنى مره واحده وبقى راجل اعمال كبير او صاحب مصانع او عقارات ، بالله عليكم هيحسس على الشعب ؟! او هيتقى الله فيه؟!! الاجابه المره دى بقى عارفين ايه: - برده لاء اه لاء وستين لاء ، لان الناس الحيتان دى اساسا من الشعب واللى بيكبر معاهم من الشعب وصاحب الشقه اللى لو طال يخليها بدل 15 الف جنيه الى مليوون جنيه هيخليها ، برده من الشعب والباشا صاحب السوبر ماركت ده برده من الشعب . صح ولا انا غلطان . وعلى رأى عادل امام: " احنا ؟..... احنا ؟......احنا ولاد كل.........." والعالم اللى فوق دووول مظاليم معانا. اللهم انفخنا وفسيييييهم ، اللهم شلحنا وغطيهم" ماشى ياولاد ................الشعب. <

هناك 4 تعليقات:

غير معرف يقول...

نعمل اية يا بنى بقى لازم ناكلها والعة من الشعب دى علشان يطلع اللى تحت البلاطةامال نسبها لغيرنا ياكلها هو بس بالله عليك ما تزعل واصبر وسيبها على الله حتفرج ((ضاقت فلما استحكمت حلقاتها فرجت وكنت اظنها لا تفرجوا ))حنتوزووووووو

ويكا يقول...

انت واضح انك فعلا حنتوزا ، بس باين عليك بتحبنى.
علشان كدا انا كمان بحبك وهساعدك تاكل اموال الشعب.

غير معرف يقول...

والله عندك حق فى كل كلمة تقولها يا ويكا
بس احنا ولاد ناس بردوا
والمفروض الناس اياهم يتبعوا حكمة (( أرحموا عزيز قوم ذل ))
بص يا ويكا لو فيها حبس معرفكش وانت كمان متفتنش عليا علشان تلاقى حد يجيب لك عيش وحلاوة
nanna

ويكا يقول...

لا يا عم الحج ، عيش وحلاوة ايه؟؟
انا مليش دعوه

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...