الأربعاء، 13 مايو، 2009

رأيى فى الكتابه

الكتابه اجمل حاجه ممكن الواحد يعملها..... وبالذات لما يكون الواحد بيحب الكلام الكتير زى حالاتى..... تقعد تكتب تكتب ، وما حدش يقاطعك نهائى ..... ولا حد يعترض ..... بس فيه حاجه غريبه !! انك مش فى اى وقت تقدر تكتب ، مع انك فى كل وقت ما بتبطلشى كلام... حقيقى .... الكتابه دى فعلا ملكه .... مش اى حد بيمتلكها.... واجمل حالاتها لما تكون مهيس ...... اه ... لانك بتقول اللى جواك ومش بتفكر فى اى حاجه..... فبيبقى الكلام طالع من القلب فبيوصل للقب. رشق على طول واجمل حاجه اختراع المدونات ده بصراحه.... تقعد تبعبع زى ماانت عايز ولا حد هيسأل فيك ، بس بترتاح .... وبتحس ان انت ليك لازمه ، مع انك مالكشى لازمه. وتحس انك مهم كده وراجل ذو نظريه ، مع ان انت لا مهم ولا بتفهم فى البطاطا. علشان كده انا مبسوط ، وهفضل اكتب واكتب ان شاء الله . ومش مهم ان ما حدش بيعبرنى وبيدخل المدونه ، المهم انى اكتب . واتخلص من العقد اللى عندى ... والطهق والكبت. انا كان نفسى الاقى تعليقات بالهبل وعداد الزوار هيفرقع .... بس لا التعليقات مليه الدنيا ولا عداد الزوار بيعد ، لدرجة انه نفسه اتخنق منى . واحتمال يشفله مدونه تانيه يشتغل فيها. بدل الفقر اللى هو شيفه معايا ده. انا نفسى اتخنقت منى ، ومش لاقى اى جديد ، ان حد حتى يشتمنى حتى .... ولا الهوى. ان حد يقولى انت كاتب ايه ؟؟! ولا الدموع . احيانا بس بلاقى عداد الزوار زاد مره واحده من غير سبب ، وغالبا بيبقى السبب انى نسيت العدد اخر مره. ففكرت ان الفرق كبير ، وهو لا كبير ولا حاجه . بس برده انا مبسوط ومشوار المليار ميل بيبدأ بفرتة كعب. ولا يهمنى واقعدوا بالعافيه. ولا اقلكم واقعد انا بالعافيه اممممممممممممممممه

هناك 22 تعليقًا:

ghorBty يقول...

السلام عليكم

الكتابه احتواء للشخص وان لم تحتوينا الكلمات وتصبر علينا الحروف ويواسينا القلم فلما الكتابه اذا ..

الكاتب يعبر عن شئ بداخله يجعله ينسج من الحروف مقاطع وجمل ولا يدري كيف تنظم ولكنها حاله تدفعه لذلك ..

وما دام تجد راحتك فيها فلما الانتظار من الاخرين المشاركه معك جميل ان تسمع اغتراض او ثناء ولكن ان لم تجد هذا ولا ذاك هل ستحرم نفسك من شئ تجد فيه نفسك وتجد فيه الراحه ..

وفي علمنا هذا وهو التدوين يجب ان تكون صداقات وتتعرف علي اقلام غيرك ومن هنا سيحدث الوصال وتبادل الزيارات ..

اسال الله لكم التوفيق

Appy يقول...

انت عامل كل المدونات دى ليه طيب انا اعلق فين بقى ول اف ين شاور ليه على واحده بس لو سمحت
وملكش دعوة بالصورة اللى عندى بدل ما احطها لكم فوق فى البانر
انا بحب الكتابه بجد عارف بحس بطلع كل حاجه جوايا حتى من قبل ما اعرف المدونات
انا عندى مدونه تانيه على فكره خالص او رابعه بس محدش يعرفها هههههههههه
بكتب فيها برضه

ويكا يقول...

ابى
لا ده لسه فيه مدونه تالته
بس بصراحه هتبقى مفاجأه بجد هتعجب ناس كتير اوى اوى بس بالاخص المتزوجين(ما تفمنييش غلط) حاجه غير اللى فهمتيها يا .....
المهم
انا بس عايز الاول ما تخدينيش فى دوكه ، وعايز ازرغط واطنطت واقول يا الف اهلا ويا الف سهلاً ، نورتى المدونه والمدينه كمان يا ست ابى.
انا مبسوط خالص ان اول الناس المهمين اللى يعلقو عليه يبقى انتى وغربتى .
ده حاجه تفرح اى والله يا شيخه.
وبعدين انتى تعلقى برحتك يا فندم ، (ان ما كانشى الاتنين يبقى التلاته ان شاء الله يا فندم) هههههههه
وبعدين فيين المدونه دى ؟!!
ما تخليها exclusive عندى وتقولى اسمها.
خليكى جادعه وقولى.

ويكا يقول...

غربتى
مبدأيا اسمحيلى اقولك انى لما قرأت كلماتك تطفلت ورحت قرأت البروفيل بتاعك ، اعانك الله وهداكى وهدى بكى .
على فكره انتى عندك حق فى انى لازم اكتب حتى ولو لنفسى وبرده بيبقى الكتابه امتع لما حد يشاركنا فيها , فعلشان كده هفضل اكتب ان شاء الله واكتب لغاية ما اكرهكم فى الكتابه.
وعلى فكره
انا كمان قريت فى استمتع بحياتك محمد العريفي ، ففروا الي الله ابي زر القلموني بس للاسف ما خلصتهمشى ، بس رائعين جدا جداً.
شكراً لمرورك واتمنى نصبح اصدقاء وعلى طول نتابع بعض.

ويكا يقول...

ابى على فكره
انتى الخسرانه
هتخدى ذنوب فى المدونه وفى الحقيقه.
وبعدين هيبقى بره وجوه. هههههه (امممممممم ، وش واحد بيطلعلك لسانه)

Appy يقول...

ويكا انا جايه اشكرك على ردك على المجهول مع انى مشوفتش التعليق ومش عاوزه اعرفه بس بشكرك جدا وظنك فى محله هي واحده بنت هههههههههه
وانا عارفاها وبرضه مش هعبرها معلش اعصابها تعبانه شويه علشان انا مش بعبرها خالص
واذا كان اللى كتب حاول يكتب بلهجه اسكدنراني زي ما انت قولت او انا فهمت فده علشان هي عاوزه توقعنىفى واحد اسكندرانى مدون عموما انا سبت لك شكر عند خيخه ميرسي اوي بجد ليك

ويكا يقول...

ابى
انا مش عايزك تشكرينى ولا حاجه ده اقل واجب ، لان واثق انك انسانه ، وجدعه كمان ، صحيح برجايه ى ما قالوا ، بس ما يمنعشى انك كويسه جدا . والا ما كنتش رديت بدالك.

وبرده شيلى ام الصوره اللى انتى حطاها دى.

3akel يقول...

على فكرة انا كنت بكتب بقول ما هى الكتابة وكتبت الموضوع من اسبوع وما نشرتوش بس لما لقيتك اتكلمت فنفس الموضوع قلت أأجله شهرين تلاتة كمان
بس قلت على اية غيرت الفحوى ونشرته بردوا
على فكرة انت مولود فشهر كام ؟
بحس اننا عايشين فى نفس المووود
اصل انا يأؤمن بموضوع الابراج( ماتفهمنيش غلط)
اقصد انه زى ما هو معروف ان الناس اللى مولودة فى نفس البرج لها صفات خاصة -انا برج والعذراء-بص على صفاته هتلاقى العجب
http://www.3roba.net/Abraj/Abraj/6/6.htm
عموما موضوعى الجاى هيكون عن
(شباب الجيل) علشان احاسيسك ومشاعرك ماتخدكش فى الموضوع دة
www.mohatrat3akel.ahlablog.com

ويكا يقول...

بص ياباشا
مبدأيا بلاش حجج وبطلوا غش بقى
ثانيا : اه انا فهمتك غلط بصراحه
يعنى ايه ابراج يا عم الحج
مفيناش من الكلام ده ، انا كنت اكتر واحد مؤمن بحجات اكتر من كده ، بس انت فاهم لما ............. نسيت خلاص . اكيد مهواش صح. ايمانا وتسليماً.

اما بالنسبه لموضوع المد ده ، ربنا يكرمك يارب .
داانا كده هتفشخر خالص انى مودى زى مودك.

بت خيخة وأي كلام يقول...

وحياة امى
هاديلك الخمسة وسبعين قرش لو ماخستش

ولو خسيت هاديلك خمسة جنيه ونص

ادعيلى بقى انى اخس


سلام
اختك خيخة

بت خيخة وأي كلام يقول...

هى دى صورتك وانت واقف مدى ضهرك للترعة؟

طب خد بالك بقى علشان ممكن واحدة خيخة تيجى من وراك تقولك بخ تقوم تتخض وتقع

او ممكن واحدة خيخة تاخدها من قصيرها وبدل ما تقولك بخ تقوم زقاك وتخلص
تقوم انت بقى تقع وممكن تتعور ويحصلك واوا كبيرة
وتخر دم
ونكلف نفسنا بقى بلاستر وقطن وشاش

وانت فى الاخر رحت ولا جيت
مجرد ويكا

يعنى متستاهلش مننا كل التكلفة دى




لأ بجد يعنى
هو انت اسمك وئام فعلا؟

اسمك حلو اوى




اوعى تكون زعلت انا بهرج معاك



سلام
اختك خيخة

ويكا يقول...

بصى يا بنت يا خيخه
انا لو اعرف انك هتيجى تزورى مدونتى اللى اخيخ منك دى ، ما كنتش نزلت وكنت استنيتك لغاية ما تدخلى وكنت قفلت عليكى.
وكنت هنشوف مين بقى اللى هيسأل فيكى.
وساعتها كنتى قولتى جهنم هانى ولا جنة ويكا

بس عموما ، خيرها فى غيرها المره اللى جايه هبقى اسيبلك حتة جبنه تتسلى فيها لغايم ارجع اقفشك.
هههههههههههههه (لساااااااااااان طويل )

اوعى بقى انتى اللى تزعلى انا بهرج برده
انا مبسوط والله انك تزورتى مدونتى الخيخه ، ودى يا ستى فعلا صورتى ، وعاطيلك ضهرى علشان انتى اللى ما تتخضيش ، اما بالنسبه للاسم فده اسم واحد صاحبى عجبنى فلفهولى وادهولى وانا ماشى.

عموما شرفتى المدونه واتمنى يارب تزورينى كده على طول .

بت خيخة وأي كلام يقول...

لا طبعا مش زعلانة

بس صورتك ما تدلش على انك ويكا خالص
صورتك تدل على انك ريتشارد قلب الاسد

صورتك دى بتفكرنى بالظبط
بوقفة رجل واحد اللى بقفها لهانى
لما اعوز منه حاجة
نيهاهاهاهاهاع

انا برضه بقفله كدة يمكن يرتجع ولا حاجة



سلام
اختك خيخة

بت خيخة وأي كلام يقول...

ايه يا عم ويكا
جيت اخرج لاقيت الباب مقفول
انت حبستنى بجد ولا ايه

يا عالم ياللى هنا حد يفتحلى الباب من برة

انا محبوسة جوة صفحة التعليقات
انا هنا فى المودريشن
حد يفتح الباااااااااااااااااااب

انا عايزة اعمل بي بي

افتحولى الباب احسن اغرقلكم الدنيا

ويكا يقول...

ههههههههههههههههه
اخص
لا لا لا ، اطلعى بره يلا
ايه الريحه البيبى دى .
اففففف
على الله تيجى هنا تانى فبل ما تخلصى البيبى بتاعك

يا خيخى

كاتب بجد يقول...

الكتابة كم هي رائعة هي تلك القتاة الجميلة التي يعشقها الجميع والتي يلهث خلفها كل عاشق ومن لا يعشقها وهي التي تستريح بها الصدور وتذهب بها الهموم وووووووووووو...... ولكن أي كتابة تلك التي أقصد ليس كل ما كتب كتابة عفواً ايها القوم فلا يمكنني أن أقول أن ما تكتبونه في مدوناتكم الغلبانة مع احترامي الشديد لكم لا يمكنني ان اساويه بما كتب مصطفى صادق الرافعي مثلا ....ومن ثم فإنه يمكننا أن نقول أنكم تكتبون ولكنكم لستم كتابا على الاطلاق على الاطلاق .... وجل مع استطيع قوله لكم ..... شكرا على المحاولة .... سلام

ويكا يقول...

يا اخى الكاتب
كل ما استطيع ان اقوله لك ، شكراً لك انت على المحاوله ، فانت ترى انك كاتب فأنا اثق تمام الثقه انك لا تعلم شيئاَ عن مدارس الكتابه المختلفه .
الكاتب الحق هو من يرى فى كتابات الاخرين معناً او فكره ، هو من يرى الجمال فى كل شئ جميلاً كان ام قبيح.
للاسف انت مغرور ، واظنك غير قادر على الكتابه ايضاً على الاطلاق فتتمنى وتحلم وتحقد وتحسد.

اخى العزيز ، لم يقل احد فينا على الاطلاق بانه كاتب عظيم او مفكر جهبز ، اننا جميعا اتفقنا ان التدوين عباره عن كتيب صغير يجمع افكارنا المتناثره بين طيات القلوب والعقول فلعلنا نجد ضاله او نصطاد فكره ، فكما قيل " الفكره طائر وصيده كتابته" .
نحن هنا ننفث عما بداخلنا بكل اللغات وبكل الطرق وبكل العبارات ، اتحداك ان تكون لديك ولو قدر بسيط من امكانية تغيير الاسلوب او المضمون حتى ، كما لمثل هؤلاء
كل ما اقوله لك ، دع الجمود وتحرر من عقال فكرك القديم المتجمد ، وثق تماما فى الاخرين ، كما انت تثق فى نفسك.
انشغل بعيبك ودع عيب غيرك فهو اولى به.
واجعل نصب عينيك ليس مصطفى صادق الرافعى بل رسولنا الكريم، الذى ملأ الارض تواضعاً وحلماً.
وان لم يعجبك رسولنا ، فاليك ابراهام لنكولن قال" لا تلم احداً عسى الا تلام"
او بنيامين فرانكلين " سوف لا اتكلم بسوء عن احد، بل سأتكلم عن الخير الذى اعرفه فى كل انسان"
وغيره وغيره ، فلا يتسع المقال الان لفرد عضلاتى عليك ، لانى لا اعلم ستعرف اكثر من تلك الاسماء ام هؤلاء من تعرفهم فقط.
اخى الكريم اترك الفرصه لاخوانك الصغار من المدونين وليس الكتبه المهره المحترفين ، افسح لهم المجال عسى ان يخرج منهم احداً تشرف به. او ان تخرج انت نفسك بفكره تعجبك وتفيدك.
انت لم ترى باقى المدونين حتى لتحكم عليهم باجماع وهذه اولى واخطر اخطائك التى لم اسمع بكاتب كبير وان وقع فيها.
انت لم تنتهج المنهج العلمى ولا الادبى فى تحليلك يا سيدى.
اقرأ لهم وابحث عنهم ستجد ما يسرك وما لا يسرك.
ستجد من هو مستهتر محتال كذاب ، وستجد من هو صادق امين، وستجد باذن الله من هو رائع ليس فى تنافسه مجال.

اظنك اخذت من زمنى الكثير ، ولن احاسبك على على صغير اخر ولا كبير.

واخيرا اريد ان اضيف شئ صغير لا تعلمه : وهو انه يوجد من هؤلاء المدونين من هو بالفعل كاتب مشهور او سياسى للجميع معلوم ، الا ان اسلوبه على مدونته ابسط مما تخيلت انت.

وفى الاخر

ااعد بالعافيه
اممممممممممه

الدرعمى يقول...

أخى ( كاتب بجد ) ليست هكذا تكون التعليقات و ليس هكذا يكون النصح و الإرشاد فلو كنت كاتب بجد كما تسمى نفسى " مع التحفظ على اسمك " لم تكن لتفعل ذلك و إن كان قصدك فن اللغة و توظيفها فى الكلام فلست مقتنعا انك تمتلك هذه المهارة

الدرعمى يقول...

اسف نسيت اقلك حاجه اخيرة لو تسمع عن حديث الرسول صلى اله عليه وسلم " من قال هلك الناس فهو اهلكهم "
و اظن رأى واضح لو بتفهم بجد

أحمدسيف (ولد خالك يا بوي) يقول...

السلام عليكم أيها الناس ورحمة الله وبركاته وبعد فإني أستأذنكم في الرد على السيد ( كاتب بجد ) وإنني لأول مرة أجد أحداً يكتب (بجد) وليس (بقلم) وإلينا أقول أقول لعل الأخ قصد اللغة المستخدمة وهي اللغة الدارجة لعله أراد منا أن نتحدث باللغة الفصيحة ولكن لعله غاب عن ذاكرةالأخ أو عن علمه أن هناك لوناًمن الشعر سمي بالشعر(الحلمنتيشي) شوف الكلمة ومن ثم أخي فما كان من الواجب أن يكون يكون هذا هو نص الكلام(كلامك) ........ أقول هذا رغم أنني من أشد المعارضين للكتابة العامية ولاسيما في الكتابة حيث أعتبره نوعا من إماتة اللغة مع شديد تقديري لآراء الآخرين وأرجوا ألا يغضب كلامي أحداً من حضراتكم ومن ثم فإن الخلاف جائز ووارد ولكن يجب ألا يفسد الخلاف ما بننا من مودة وحب و (مش عارف ايه تاني) ومعاناة في بعض الأحيان وأقول كما قال الأخ شكراً لنا جميعاً على المحاولة Why not?

أحمد-- برده يقول...

استمر ايها الويكا فإننا خلفك ومعك ( مش معك أوي ) خد بالك وليكن شعارك ( وتجلدي للشامتين أريهم.. أني لريب الدهر لا أتضعضع)

ويكا يقول...

اتضعضع ؟؟!!

ايه ياعم الكلام الكبير ده

انا حاسس انى هتسجن هتسجن

Related Posts Plugin for WordPress, Blogger...