السبت، 23 مايو، 2009

مصر العزيزه

تصدقوا بالله ...... انا ما اقتنعتش اننا بلد عالم تالت ... ويمكن خامس كمان الا قريب .... يدوب من كام سنه كده ..... اه والله ... اصل انا كان ديما عندى نظرية المؤامره ...فكنت شايف دايما انهم بيسموا مصر عالم تالت كذباً وافتراءاً. وكنت شايفها ام الدنيا ..... واحياناً ابوها كمان ....... وان العالم اللى بره دووول ما يعرفوش حاجه عنها .... وبيكرهوها وخلاص ...... لكن الحق يتقال ، مصر هيه امى ...... مع انى مش عارف ليييه ؟! بس هيه امى وخلاص...... بس للعلم انا عندى ام كمان والله تانيه احتياطى يعنى ، لو انها هيه اللى تعبت فيه ...... بس برده مصر هيه اللى امى وما حدش يقدر يقول غير كده لاحسن انتوا عارفين...... ما تقولشى ايه اديتنا مصر ..... وعلى فكره انا ليه عمام كتير كمان وابهات ، اه طبعاً مأمور القسم بتاعنا ، عمى . سيادة اللواء النقيب الرائد امن الدوله اللى بيحرس مصر من الاوباش اللى زى حالاتى فى منطقتنا ، برده عمى. حتة العسكرى اللى ماسك البتاع الراديو اللى فى ايده ده برده عمى . مديرى فى الشغل هو كمان من النهارده لازم يبقى عمى , دا حتى الا ده. الريس جد جدى مش عمى بس. شيخ مسجد الاوقاف اللى جنبنا ، اللى فى البلد بالذات اللى لما حبيت اقوله ان اللى بيعمله ده بدعه ولا يجوز ، ويقوم هو يهددنى من فوق المنبر يوم الجمعه بأمن الدوله ، ده يبقى برده عمى . مع اعترافه على المنبر برده ان اللى هوه بيعمله ده مكروه بس عادى يعنى هو احنا هنبقى احسن من النبى ؟!! ده كلامه والناس عماله تهز دماغها ومبسوطه ، ان ده مكروه ولا ايه مش عارف والله . مع انى مش فاهم ايه العلاقه بس برده عمى. العسكرى اللى شاورلى امبارح فى ميدان رمسيس من خلف القضبان الحديديه اللى بيحبسو فيها الناس علشان ما يعدوش ، علشان اعدى بعربيتى مع ان الاشاره حمرا ، ده برده يبقى عمى . بس لو رحت لقيت وانا بجيب شهادة المخالفات مخالفه اسمها كسر اشاره هيبقى مش عمى ، ولا حاجه ، هيبقى لموأخذه ابن ............. كل العساكر اللى شاورولى امبارح بصراحه انى اعدى بعربيتى والاشاره حمرا دووول كلهم عمامى. اساسا انا ماشفتش اى اشاره مش لونها احمر امبارح اساسا الا ما رحم ربى وكانت برده مقفوله او مفتوحه تبع الاسطى العسكرى برده مش تبعها. الاجمل بقى ان الكلام ده فى القاهره عاصمة مصر ، لاء وايه وفى اهم ميادين فيها. عموما القاهره دى بقى امى . وماما سوزان مبارك طبعا امى. والست بقى مشيره خطاب ، اللى محرمه ختان الاناث كده وخلاص ومصره ان الدين الناس كلها فهماه غلط الا هيه ، دى بقى عمت الكل مش عمتى وبس. مش دى اللى ناويه تولع البلد ، يبقى عمتنا كلنا ، يلا خليها تبقى مليطه. وفاروق بيه حسنى ( ابونا) وما ينفعشى اقول غير كده . مفيش حاجه فى الاسلام عجباه يبقى (ابونا) طبعاً. والغريب برده انه لسه موجود لا مات ولا اتعزل من منصبه. انا اطلع والله الاقيه. ووزيرالمواصلات المتكسره واللى عايز يغيرها بعربيات جديده كتر الف خيره ، بس طبعاً يكون نوعها شيفروليه . علشان دى احسن نوع بيحافظ على المظهر الحضارى .(ملحوظه ده اكيد كلامه مش كلامى لان شيفروليه شركته مش شركتى). برده عمى. ولا وزير النقل والمواصلات ولا الطرق والكبارى ، كلهم عمامى ، لان مع ان الطرق كلها فى مصر بقالها اكتر من 4 خمس سنين ما اترصفتش ولا اتعدلت ، الا ان العربيات كلها عارفه لسه تمشى عليه ، فده اكيد انجاز. شكرا مصر شكراً عمامى وما تقولشى ايه اديتنا مصر قول انت اديت ايه ، جتك النيله. لمصر اقلكم اقعدوا بالعافيه اممممممممه يا اخوانا: انا لو اتأخرت شويه ، يبقى رحت ازور العيله واقعد معاهم شويه واحتمال ما ارجعش. عموما ربنا يستر.

هناك 21 تعليقًا:

VIP4u يقول...

Hello everybody.... ithink i'd better write in English to be safe - to some extent- i think that you Weeka is trying to be a rebel .....so you should be careful .....take my words seriously ....Wea'am .....you know how much i like you ....so ....don't try to send yourself away away....you know what I mean ....please be careful don't be the man who pay himself with no price .......believe me ....you my be older than me but I like you and i can't imagine you while some bad men insulting you or even hitting you ......Weeka trust me not to blame yourself in the future ...... don't exceed the limits...or you are going to pay the expensive price .....remember that you mean a lot for other people whp like you i don't want o you suffering .....yours

ويكا يقول...

يالهوى
Rebel مره واحده
لا ياعم
و insulating me كمان
يا خراشى
و suffering كمان

لااااااااا
دا الموضوع كبر اوى
بص يا عم الحج
انت مش واخد بالك اساسا ، ان انا بقول على الناس دى عمامى ولا ايه.
دا بالعكس دا انا مستنى جايزه المفروض يعنى.

عموما جزاك الله خير على خوفك عليه.

غير معرف يقول...

وئام هو يعنى ايه Rebel انا ماخدتهاش فى ثانوى بس انا هبقى فرحان لو انت suffering شد حيالك وبالغنى اول لما تسافرينج بلادكوا


Hoba

ويكا يقول...

هوبا
ايه الحكايه
مره
rebel
ومره suffering
انتوا ناويين تعملاو فيا ايه يا اخوانا

وبعدين انا كده هعيش يا دكتور ولا لاء

والكلام ده فيه خطوره علا فى المستقبل يعنى ولا عادى هعيش يعنى

أم أحمد المصرية يقول...

ضحكتني يا بشمهندس ونت جاية من الشغل ماليش نفس و الله
هي دي يا فندم خفة الدم المصرية
مضطرة استخدم بيتالمتنبي و لو اني ملاحظة اني بقيت استخدمه كتير
كم ذا بمصر من المضحكات و لكنه ضحك كالبكا
ربنا ياخد عمامك يا شيخ خلي البلد ...
لا مؤاخذة لا مؤاخذة الكي بوردكتبت غلط
قصدي ربنا يخليهم احسن اجي ازور العيلة معاك
بس جدير بالذكر ام مهما حصل حتفضل مصر امي اغلي و احلي الامهات

ويكا يقول...

ام احمد
مش تحددى طيب انى عمام اللى ربنا ياخدهم ، لحسن انا عند عم حقيقى مش مستغنى اوى عنه اليويمن ووول.

وربنا يضحكك كمان وكمان، انا مبسوط والله انى قدرت اضحكك
وعلى رأى المتنبى بتاع شبرا
" هم يضحك وهم يبكى"
وعجبى

بت خيخة وأي كلام يقول...

انت فارس ؟

لو انت فارس يبقى انا عايزة منك 75 قرش


سلام
اختك خيخة

ويكا يقول...

خيخه

ههههههههههه
صح
بس عايز حاجه ، تقوليلى ايه الكعب اللى انا سيبتهولك علشان تعرفينى؟!!

عايز اعرف دماغنا بقت واحده ولا لاء؟!

وبعدين على الله تكونى دخلتى اكتر من مدونه وقولتى نفس الكلام ، واللى يرد يبقى هوه.

ههههههه

انا كنت ممكن اعلقك وما اقلكيش بس انا مش خيخ زيك, واجدع

عموما انا دلوقتى عايز اعرف حسابنا بقى كام لان الفلوس اللى رايحه وجايه كترت كده وهنتوه

سبهللة يقول...

برغم كل اللى قلته وضحكنا كلنا
الا اننا برضه بنحبها
هانعمل ايه
هو فى حد بيكره امه
ممكن يكره عمه عمته جد جده
لكن امه
استحالة
ربنا يخليللنا ماما

ويكا يقول...

سبهلله

انا لا بكره امى ولا عمى ولا حتى جد جدى
مش عايزين مشاكل

انا ماليش دعوه ياختى
ده كلام بوستات

بت خيخة وأي كلام يقول...

لما بتتكلمى فى الدين بتزعلينى اوى






سلام
اختك خيخة

ويكا يقول...

صح

هو ده بالظبط

واضح كده اننا خلاص.

بس برده ما قلتليش حسابنا دلوقتى بقى كام.

موناليزا يقول...

اهى دى العزوة ولا بلاش
ده انت طلعت من العيلة المالكة ماشاء الله

ويكا يقول...

موناليزا

مابلاااااااااااااش.

احنا هنق ولا ايه؟!

ههههههههههههه

أحمد س vip سابقا يقول...

بصراحة انا عايز أقول ان الصورة مش قاتمة بالشكل اللي بتتكلموا بيه البلد فيها خير بجد وكتير من القيادات الأمنية في مصر شرفاء - وانت عارف يا ويكا اني من الناس اللي عانوا من الأجهزة الأمنية - لكن في كل المجتمعات قد يعاني الفرد من أجل أمن المجتمع وهذا ما قد يحدث فلا يمكن أعتبار التضيييق الذي كثيرا ما يحدث هو الصورة السائدة وإلا لما سمح للمعارضين وغيرهم الكثير والكثير والكثير وانتم منهم يا أصحاب المدونات بالنقد العلني للكبير و الصغير والصغير والكبير وصولا الى تطاول البعض بشكل غير مقبول على شخص رئيس الجمهورية فمصر هي طبعا أمنا ونشرف باننا كذلك ومن لم يفعل فليذهب إلى مكان آخر يؤيه حيث يجد ما يبحث عنه ...... وفي النهاية تحيا جمهورية مصر حرة مستقلة ......( بالله عليكم مش كفاءة )

أحمد سيف يقول...

انتظروا مدونتي قريبا- بس حاجة جامدة ومحترمة - حاجة آخر (ألاجة).....هه...على فكرة اللي فاتت دي ضحكة بس مكتومة حبتين

Appy يقول...

ليه كده ليه فى وشي كده مش عيب يعنى
بس عاوزه اقولك حاجه السبب اهمالنا كمان يا ويكا
احنا بقينا حد وحش اوي ومش بيحافظ احنا اللى بناخد الرشوه وبنرمي ولادنا
اه الشعل ضاع من بدري

ويكا يقول...

لا يا عم احمد س
انا ما اعرفشى حاجه
انا اعرف ان ما حدش بيعانى خالص من اى اجهزه امنيه
وبعدين انا عجبنى اوى موضوع
( فلا يمكن أعتبار التضيييق الذي (كثيرا) ما يحدث هو الصورة السائدة
مع انه كثيرا ما يحدث الا انه مش الصوره السائده
هو فعلاالصوره السوده مش السائده

طيب لعلمك بقى دا مش كثيرا بيحدث ومش سائده بقى
وانتى ارهابى وهبلغ عنك

ههههههههههه

ويكا يقول...

ابى
مش فاهم تقصدى ايه ب (ليه كده ليه فى وشي كده مش عيب يعنى )

انتى من عمامى ولا ايه؟؟!!!

ولل لا تكونى امى وانا ما اعرفش
عموما انا كده كده هبقى مبسوط لو ليه ام او عمه بالشكل ده والله .... ويارتهم كلهم كدا.....

هههههههههههههه

enjy يقول...

والله كنت عايزة انبهك واقولك ربنا يستر بس لقيتك عرفتها لوحدك فى الاخر...

بس واضح من نخلة العيلة انك ابن ناس اوى هع هع هع....بس بما انك قلت كلام زى الفل يبقى كلنا اخوات اصل برضك مصر هى امى ومكنتش اعرف ان عندى اخ اسمه وئام ازيك يا اخوووووووويا...

معلش انا فى العادى عاقلة وراسية بس الموضوع دة بيعصبنى ويخلينى اهيس خالص جدا اوى يعنى....

على فكرة يحرس بالسين مش الصاد عندك غلطة فى البوست صححها..دى ملاحظة بريئة..

اول مرة اجى هنا بس شكلها مش الاخيرة
اقولك؟؟ اقعد بالعافية

سلام

ويكا يقول...

انجى
اولا اقولك شرفتى
وثانيا اقولك البيت بيتك والعيله عيلتك
تيجى فى وقت , وبما انك اختى يبقى الباقى عمامك وبهبهاتك.
اه يا بهبهاتى
ربنا يخليهملى ويخلهملك

Related Posts Plugin for WordPress, Blogger...