الخميس، 20 مايو، 2010

عايز اقول لفظ مش كويس



عن خبر نشرته جريدة اليوم السابع "عن وقف بث قناة الرحمه الفضائيه":

وهذا جزء من نص الخبر:

(قال الشيخ "حسن حسان" شقيق الداعية "محمد حسان" ومدير البث بقناة الرحمة، إنهم توجهوا أول أمس بخطابات للسيد محمد حسنى مبارك رئيس الجمهورية، ونجله جمال مبارك رئيس لجنة السياسات بالحزب الوطنى، وأنس الفقى وزير الأعلام وحبيب العادلى وزير الداخلية، اعتراضا على استجابة إدارة النايل سات لقرار المحكمة الفرنسية بوقف بث قناة الرحمة بحجة أنها تنشر أفكارا معادية للسامية.


وشكى حسان فى خطابه إدارة النايل سات بسبب مخالفتها للعقد المبرم مع إدارة القناة والذى ينص على أنه فى حالة وجود أى أزمة يتم حلها بشكل ودى أو يتم اللجوء للمحاكم المصرية، ووصف حسان قرار موافقة النايل سات على طلب الجمعية اليهودية بفرنسا بوقف القناة بأنه "تعسف" ضدهم لمنع أبرز القنوات الإسلامية التنويرية فى مصر.

وأضاف: على الرغم من أن هناك العديد من القنوات الفرنسية التى تسب الرسول إلا أننا لم نطالب يوما بوقف بث تلك القنوات، وأتعجب من إدارة النايل سات التى وافقت على وقف بث القناة بمنتهى السهولة والبساطة على الرغم من أن فرنسا هى التى دائما تدعى أنها ترعى حرية الرأى والتعبير وأنها بلد ديمقراطى.)


تعالوا بقى نعلق:
******************************

الجمعيه اليهوديه؟؟!!!!
 
فرنسا ؟؟؟!!!!
 
قناة الرحمه  (اللى هيه مصريه عربيه اسلاميه ؟!!!!!!!)
 
 
النايل سات ، (اللى هو برده مصرى مصرى يعنى ؟!!!!! ، مش فرنسى ولا يهودى )

 ؟؟؟؟؟؟؟؟؟؟؟؟؟؟؟؟؟

الله !!!!       هو فيه ايه ؟!!!!
 
انا بجد عندى لفظ قليل الادب جداااً جداااا 
 
هو ايه اللى بيحصل؟!!!!
 
قالو الحجاب لا  ..... اتنيلنا اتكتمنا وما عرفناش نفتح بقنا زى الكلاب .....
 
وعبيدهم من بنى جنسنا قالوا دى بلدهم وهما حرين فيها ........
 
قلنا خلاص ياعم مافيش مشكله و مالناش دعوه ، والمسلمه المتضرره ترجع بلدها .
 
بس ما حدش منهم بقى يجي يقولى ديموقراطيه او حرية فكر و عقيده والكلام الشعارات ده.
 
لكن كمان يجوا  بلادنا ،عقر الاسلام .......
 
ويقولوا  مفيش اسلام ؟!!!!!!!!!!
 
بثوا ده وما تبثوش ده ................
 
ياخى ......تييييييييييييييييييييييييييت  ......... على  ...............تييييت ....... على ام الـ .... تييييييييييت.
 
ايه الخيبه اللى احنا فيها دى .......
 
 
الله يقطع حكومة مصر على الحكومات العربيه كلها اللى اعطت الدنيه فى دينا

على كل كلب بيساعد الكلاب اسياده على حساب الدين ...............................

هناك 16 تعليقًا:

AHMED SAMIR يقول...

هنعيش طول عمرنا بمي ادمين درجة تانية
و المؤسف ان احنا اللي بنعمل كدة في نفسنا

ويكا يقول...

ياريت نبقى حتى بنى ادمين يا احمد

ماما أمولة يقول...

بصراحة
كلنا ها نقول معاك
حسبنا الله ونعم الوكيل


احترامي

AmiroZ يقول...

النايلسات ملوش دعوه اساسا !!!
قناه الرحمه بتبث علي (يوتلسات) و هو قمر فرنسي مش (النايل سات) و تم وقفها في فرنسا بقانون مش في مصر اساسا و مصر مأجره القناه من القمر الفرنسي و بالتالي لما اتقفلت في فرنسا اتقفلت من المصدر النايلسات ملوش علاقه بقفلها في فرنسا
ده لان النايلسات كله متقفل و مفيهوش مكان فاضي لاي حد من زمان فكانت اي قناه جديده بتفتح في قمر اوروبي قريب من النايلسات و مصر تاخد الاشاره
زي بالظبط الجزيره الرياضيه 5 و 6 و 7 و 8 لما مكانوش لاقيين مكان عندنا راحو فتحوا في قمر قبرصي باين قريب من نايلسات و النايلسات ياخد منه ..و لما اشتروا art بقوا داخل النايلسات و غيروا الترددات ...عشان كده لما كانو علي قمر اوروبي قبل نقله art كانت الجزيره 5 و 6 و 7 و 8 مش شغاله في المغرب العربي عشان مشاكل تقنيه و قعدوا يقولوا مصر بتسرقنا و بتاع و لو كانت اتقفلت علي القمر الاوروبي ساعتها مصر ملهاش دعوه
و بالتالي عشان قناه الرحمه تدخل نايلسات تاني بما انها كانت علي قمر اوروبي اساسا!! فياما يعملوا زي الجزيره الرياضيه و ياخدوا قناه قديمه داخل نايلسات الاصلي و ده صعب
او لو مفيش قنوات فاضيه و قفلوا حسابهم يبقي ينتظروا لحد يوليو الجي لان مصر هتطلع نايلسات جديد فيه قنوات فاضيه

النايلسات متقفلش فيه داخليا من مصر الا العالم اليوم الايرانيه الناطقه بالعربي عشان علاقه الحب و الود المعروفه بين مصر و ايران ملهاش دعوه بامريكا.. اما قناه الساعه فهي اتقطع عنها الارسال و مصطفي بكري قال خلاص مش هجدد الاشتراك و قفلها و عموما قناه الحياه قبل كده كانوا بيذيعوا فيديو لعمليه بيع مخدرات فالنايلسات قطع البث نص ساعه و رجعه
و ساعه برضه ما اتقطع البث عن مودرن و دريم لما سرقوا بث متش للاهلي عادي جدا انهم عملوا مخالفه و رجع الارسال فمحدش قال مش هجدد تاني!!و شغالين عادي طبعا
مصر اساسا مفيهاش حاجه اسمها معاداه ساميه كقانون
بالنسبه لقناه المنار الظريفه فاحب اقول ان عربسات بتاع السعوديه قفلها فتره و رجعت عشان فيه قانون امريكي بيحظر بث بعض قنوات بالاسم داخل امريكا و الا تدفع غرامه القمر كله فعربسات قفلها وش و نايلسات معملش حاجه ليهم لغايه دراسه الموضوع يتحل ازاي و عشان كده عربسات رجعها

ففعليا مصر مقفلتش الا قناه ايرانيه و عشان لقوا فيها قلق جامد نظام منشورات و كتيبات للمذهب الشيعي و كلام كده
انما قناه الرحمه مصر ملهاش في الموضوع اصلا لانه اداره فرنسيه قفلتها علي قمر فرنسي بقانون فرنسي لان مصر اساسا مفيهاش حاجه اسمها قانون معاداه ساميه و الكلام ان نايلسات قفلها كلام غلط

ويكا يقول...

ماما اموله

معاكى حق ، حسبنا الله ونعم الوكيل

بس هنفضل نقولها (بس لغاية امتى) من غير النص التانى؟!!!!

الا وهو العمل!!!!!

شكرا ليكى وانا مبسوط انك شرفتينى هنا

ويكا يقول...

عم اميروز

؟؟؟؟!!!!!!!

ايه يا عم الحج ، تكونشى مدير النايل سات ولا ايه؟!!!

ايه ياعم ، انت قاعد على دماغهم ولا ايه؟!!!

انت جيبت الكلام ده كله منين؟!

عموما ، انا اللى فهمته انها بتتبث على القمرين مش قمر واحد بس ، زى قنوات كتير عربيه بتبث على النايل سات او العربسات مثلا والاوروبى .


وهما بالفعل قفلوا عن القمر الفرنسى من بدرى ، وبعد كده طلبوا من النايل سات.

ده اللى انا فهمته ، غير فيه حاجه مهمه بقى

ان معاداة الساميه مش محتاجه قانون اساسا .

انت بس هوب نحيتها ، وانت لامواخده هتاخد فى جيبك .......

عموما شرفتنى وشكرا ياباشا على التعليق الجامد موووت ده

AmiroZ يقول...

لا ابدا العفو .. الكلام ده مجرد انا ناقله من المنتديات اللى بادخل عليها

غير كده، فيه موقع إسمه memri زي مرصد لاي حاجه بتيجي فى القنوات الاسلاميه والعربية ضد اليهود(نظام معاداه ساميه و كده) فيه ناس بتترجم من عربي لانجليزي و ترفع علي يوتيوب اي حاجه ضد اليهود و هم لامين حاجات لكل القنوات علي فكره (رحمه- الناس-رساله-اقرا) و بعتوا الحاجات بتاعه الرحمه للحكومه الفرنسيه عشان تقفلها علي يوتلسات مصدر القناه بدعوي معاداه الساميه و كاتبين في موقعهم نشكر الحكومه الفرنسيه علي تعاونهم معانا

ويكا يقول...

اميروز

(وش مزبهل بصراحه.)

(ست* جنى* الحسن) يقول...

سلامو عليكو ..
صدقنى احنا اللى عملين فى نفسنا كدة سايبين كل كلب يتحكم فينا شوية وهى دى النتيجة .الله يحرق اللى كان السبب؟
برجاء قبولى صديقة للمدونة

ويكا يقول...

ست جنى الحسن

اولاً دا شئ يشرفنى انك تبقى صديقه عزيزه ، واهلا بيكى معانا.

اما بالنسبه اننا اللى عاملين فى نفسنا كده ، فده لازم يبقى ليه هأخر بقى . ولا ايه؟؟؟!!

هو احنا مش هنبطل نعمل فى نفسنا كده بقى ولا ايه؟

افروديت يقول...

عايزه اقولك أحنا بقينا السلبيه بذاتهاخضوع وهوان مفيش بعده..بعدالرسوم المسيئه وسب الرسل والتشكيك وكل ده دول مش يوقفوا الرحمه بس دول يقفلوا القنوات والجوامع كمان..أنت مش شايف حالة غياب الوعي اللي عايشينه..سلام

ويكا يقول...

افروديت

والله عندك حق

شرفتينى

Sharm يقول...

نفسي احس ان في واحد في قناة الرحمة دي مصري ..

لبسهم خليجي و فكرهم وهابي متشدد خليهم ينشروا افكارهم بعيد عننا


يا رب رجع الازهر منارة العالم الاسلامي من تاني

ويكا يقول...

هو الدين مصرى ولا ايه؟!!!

وبعدين ما يلبسو اللى هما عايزينه ياعم الحج ، هو انت عايز العلم ولا اللبس؟!!
وبعدين هو ده كان لبس النبى ، ناس بتكلمك فى الدين والاتباع ، عايزهم ما يبقوش قدوه ولا ايه؟؟!!!

وبعدين هو مين اللى قال ان البنطلون والقميص والكرفته هما اللى انزلوا ولازما ولابد يعنى؟!!!
وبعدين مالهم ياعم الحج الوهابيين

ولا انت من هواة تشجيع زيارة القبور والاضرحه ولا ايه ؟
وسيدى بدوى والموالد والكلام ده ولا ايه؟!!

ايه ياعم شارم
انت هتخلينى اغير فكرتى عنك ولا ايه؟!!

سمكه واحده يقول...

ويكا ويكا ويكا
اولا جيت اكتب عندك الكي بورد مرخم عليا جدا ومش بيكتب معرفش ليه
المهم سيبك
ثانيا بقي
ايه هو اللفظ هه ايه هه ايه
لا ياعم ولا بلاش حكم انا عارفه الشوباب والفاظها بتبقي تيييييت اوي خالص
(:

والله موضوع انهم يدخلوا في حجات في بلدنا فدي من زمان وحاجه تنرفز ويخلي اي حد يقول اي لفظ تيييت لا بس اهدي كده
معلش امسك اعصابك احنا جدعان والعيبه متطلعش من خشمنا
ولا انت ايه رايك

بس بردو القنوات دي حلوه وكل حاجه بس بقت تشتت يعني شيوخ كتير وناس تقول حلال وحرام في قضيه واحده والواحد مش عارف راسه من رجله
لكن مش ده موضوعنا
الموضوع ان حد من بره البلد ويتحكم فينا واحنا ساكتين ويناودا في نفس الوقت بالحريه وكلام فارغ كتير وتيجي علينا احنا وتقفل
والله هو غضب من ربنا
في ناس كويسه اوي وناس بتاجر بالدين بس اهو علي الاقل قنوات ليها هدف مش زي القنوات المقندله التانيه
ربنا يستر بقي
تحياتي

ويكا يقول...

سمكه واحده

يا قهلا يا قهلا يا قهلا

ايه النور دا كله .
سمكه واحده عندى

انتى سمكه واحده بس صحيح ، والواحد جعان اوى ، بس كفايه بصراحه وممكن الواحد يقفل المدونه عليكى وانتى هنا لوحدك ، ويصطادك بقى ويلتهمك
يم يم يم يم
:-)

بصى يا ستى هرد عليكى علشان اسهيكى لغاية ما اقفل باب المدونه بشويش من غير ما تحسى ، ههههههه

اللفظ فى بطن الشاعر ، والرقابه على المدونه هنا حذفته ، حاكم بعيد عنك الرقابه عندى هنا اجنبيه برده.
(وبعتوا وبلغونى بقرارهم فى انى ما اكتبش لفظ التييييت فى المدونه بتاعتى ، واكتفى فقط بالاشاره اليه من بعيد بكلمة "تييييييييت")

اما بالنسبه للقنوات ، فادى ذى ما انتى قلتى كده فيه الرث وفيه الطيب ، واحنا بقى نختار نشوف ايه وما نشوفشى ايه.(وعلى فكره الرحمه فعلا من افضل القنوات المعتدله واللى مفيهاش فتى ولا متاجره بالدين)

وكلام الله فى القرآن بيقول "كل نفس بما كسبت رهينه" يعنى نشوف الصح من الغلط ،واللى هنعمله كله على دماغنا مش دماغهم.

اما هما بقى يجبرونا نشوف ايه وما نشوفشى ايه ، وتبقى الآيه "كل نفس بما يريدها الغرب رهينه "؟!!!!

فتيييييييت بقى وستييييين تيييييييت بصراحه يعنى .


هى ام الكلمه دى مش راضيه تتكتب ليييه ؟!!!

لا يكون المدونه فعلا متراقبه وبيتحكموا فيها من هناك .

ربنا يستر .
لحسن احنا ياختى غلابه و مالناش حد يدافع عننا لو الجماعه دول هبطوا علينا.

ما علينا

ااااعدى بالعافيه وشرفتينى

وعلى لقاء المره الجايه لحسن انتى شكلك بتعرفى تهربى بسرعه وفعلا ما عرفتش اقفشك.

سلام

Related Posts Plugin for WordPress, Blogger...