الاثنين، 31 مايو 2010

المملكه العربيه المصريه



انا عارف ان الاسم يخض ، ومش محبوب بحكم خبرتنا السابقه مع الحكايه دى ، وموضوع الملك والمملكه ده .

بس ليه ما نبصش للجانب المشرق  ؟! ليه ما نبصش للتجارب الناجحه والجميله .......

يعنى مثلا السعوديه ..... انجلترا  ..... الامارات ....... مصر نفسها ايام محمد على .........

كل دول وغيرهم كتييير ممالك بس احلى كلام واحلى نظام واحلى عيشه ........ واحلى استقرار سياسى واجتماعى ..... عكس اى جمهوريه ......

اى جمهوريه تانيه ، لازم تلاقى فيها وش وصداع وخبط ورزع وخداع سياسى ومناورات ........ حتى ولو امريكا ..... برده فيها الكلام ده .......

عارفين لييه ؟!!!!

علشان شوية اسباب بسيطه بس مهمه شويه ، على سبيل المثال :

       الملك ، بيبقى عارف انه مخلد فى الحكم لغاية ما يموت فبيبقى مش شاغل باله بالكرسى اوى اد ان تركيزه كله منصب على انه يعمل حاجه تنسبله ويخلد بيها اسمه من بعده .
       اما رئيس الجمهوريه ، فبيبقى عارف انه ممكن يمشى فى اى وقت فبيبقى تركيزه كله منصب على الكرسى وازاى يقدر يعمل اكبر كم من الاتباع والعصابات حواليه علشان يساعدوه انه يفضل موجود ...... وطظ فى ام الشعب هو هينفعنا بايه ، المهم الكرسى والسلطان والنفوذ .

الملك بيبقى ملك وابن ملك ، ففيه عزه ونخوه ، وما يقبلشى على نفسه انكسار ولا يخاف .

الرئيس بيبقى واحد ابن .......... تيييييت ...... من بيئه ...  تييييييييت ..... وجات ظروفه كده ومشيت معاه وبقى رئيس جمهوريه ....... علشان كده هو طول عمره منكسر اساسا فيا اما هيطلع ام النقص ده على الشعب يا اما هيتزل امام كل الامم ويزل اهله ..........



الملك عايز مملكته تكبر وتتوسع علشان دى ملكه وملك عياله ........


الرئيس عايز يعيش جنب الحيط وياخدوا اللى يخدوه المهم يفضل رئيس .......


الملك ... ملك .... وابن ملك وجده ملك ..... وعنده فلوس كتييييييير فبيصرف منها على الشعب .......

اما الرئيس فابن .......... تيييت طبعاً  ...... وما عندوش ولا مليم .... كل اللى معاه صرفه على الانتخابات دا اذا كان فيه انتخابات اشاسا . فبالتالى عايز يلم اللى صرفه تانى ويكون مستقبله ومستقبل عياله وعيال عياله ...... والكلام ده مسئول عنه الشعب طبعاً .

الملك قاعد ومش هيمشى ، فبيعمل مملكه لاولاده كويسه علشان يمسكوها ما تتعبهومش.

الرئيس برده قاعد مش بيمشى ، فبيعمل عصابه لاولاده كويسه علشان لما يمشى يورثوا البلد لهم وكمان بيعملهم ارضيه كويسه علشان يقعدوا عليها ما تتعبهمشى .........



علشان كده انا شايف اننا نطالب اننا نحول مصر من نظام جمهورى الى نظام ملكى وخلاص .


ونريح نفسنا وتبقى على الاقل جات منا احنا .........

وانا ما عنديش مانع انى ابايع السيد  الرئيس جمال مبارك على الملك الجديد بس بشرط تبقى مملكه وتتحول بيها مصر الى اسم المباركيه ...........


بس خلاص


واقعدوا بالعافيه

امممممممه

هناك 6 تعليقات:

MR.PRESIDENT يقول...

علي فكرة الممالك بتحصل فيها انقلابات .. ومتفكرش ان السعودية متهنية مهوا بتسرقوا برضوا باسم العائلة المالكة ..

دوله زي تركيا جمهورية محترمة .. دولة زي المانيا .. المشتشارة ميركيل حتة واحدة يا جدع ..

الموضوع كله يتخلص في الشعب .. لا في الملك ولا الرئيس الشعب لما يكون تيت الرئيس يبقي تيت
الشعب لما يكون كويس يبقي الرئيس كويس ماهو جايب من الشعب وحتي لو تيت الشعب هيدليه علي دماغة عشان هوا اللي جايبة

وتحياتي

ويكا يقول...

سعادة الرئيس

انت كلامك فل وميت عشره والله ، مش علشان انت الريس

بس علشان انا مؤمن بكلامك اوى من وانا فى ثانوى والله ، تخيل بقى .

ولو عايزنى اديك امثله تأكد كلامك ممكن اديك 100 مثال وكلهم مؤثرين واقويه جدا

Sharm يقول...

الشعب و ليس طريقة الحكم
احنا شعب مش بنطالب بحقوقنا فهنفضل واخدين على قفانا سواء بملك او برئيس او ببواب

ويكا يقول...

شارم

والله عندك حق

فرعون قال اعبدونا قلنا حاضر
مماليك بالكرباج وضربونا قلنا حاضر

ملك وخديوى ونهبونا وقلنا مفيش مشكله

مبارك و........... تيييييت .

........ تيييييييييت ......... ايه ده

هو فيه ايه فى الكيبورد ........

الله ايه ده ......

هتوحشونى يا شباب ...............

زهرة(جنى)الاسلام يقول...

السلام عليكم
انا مش مع حضرتك فى الكلام دة
والدليل شجرة الدر والخلافات
وكل الملوك اللى كانوا فى مصر بردة كان فى خلافات كثيرة
الملك توفيق كان خايف على كرسية
دة غير ان لازم الشعب يكون لية كلمة
ولو الشعب والحكام او ملوك مشوا على نهج الاسلام اكيد مش هيكون فى اى خلافات

ويكا يقول...

جنى

يعنى انتى مقتنعه بموضوع رئيس الجمهوريه ده ؟!!!!

وبالذات فى مصر؟!!

Related Posts Plugin for WordPress, Blogger...