الخميس، 1 يوليو 2010

الجواز وسنينه

دايما الحبيب والحبيبه  : ـــــــــــــــــــــــــــــــــــ
متفقين طول الوقت
بيحبوا بعض طول الوقت .
متفاهمين اغلب الوقت
متسامحين على طوول.....
بيشاركوا بعض فى كل شئ .........
عايزين يفضلوا مع بعض طول العمر..........
ما بيملوش من بعض نهائى ..............
صباح الرومانسيه وصباح اللى بتغنى طول الوقت .......
عنتره وعبله ، قيس وليلى ، حسن ونعيمه ، مبروك وتشكر ........... ولا احسن ولا اروع من كده .........

لكن لما  ، هما هما ، نفسهم اللى فوق دووول  يتجوزوا ، هههههههههههه (ولا حول ولا قوة الا بالله).
بيبقوا :
ـــــــــــــــــــــــــــــــــــــ
- مختلفين معظم الوقت .............
- مش طايقين نفسهم ولا بعض  طول الوقت ..........
- مش متفاهمين نهائى ، وصعب يتفقوا على قرار ......
- بيمسكوا لبعض على الواحده ....
- الراجل ،  الست تقوله مالك سرحان فى ايه ؟!!  يقولها : مفيش
تقوله :طيب بتفكر فى ايه ؟!!     يقولها : حاجه كده اول ما اخد فيها قرار هقولك .......
- مش عايز يقعد فى البيت دقيقه زياده ........ وما بيصدق حد من اصحابه يفوت عليه او يتعب او يحصله اى شئ بس ، علشان يثبتله رجولته ووقوفه جنبه وقت الشده ، ويسيب بيته وعياله وينزل (صاروخ )  يقف جنب صاحبه  طول الليل والنهار ، لغاية ما ام العيال تنام ............ ساعتها (ملعون ابو صاحبه )

- ملل فى البيت طول الوقت ..... والخروج معاها بيبقى بالعافيه وزى الهم على القلب ............
- لو حد فيهم شغل اى حاجه رومانسيه ، التانى يبصله بكل اسى وحسره كده ولسان حاله بيقول ، حسبى الله ونعم الوكيل  .......
- الحط خليفة الخط طول الوقت فى البيت ، الحجاج ابن يوسف الثقفى ، وريا وسكينه ، سمبل وزيبه .........

ايه يا ترى السررررررر ؟!!

ايه اللى حصل ؟!!
مش هما هما نفس الاشخاص ، وهما هما اللى كانوا فوق دول بيحبوا بعض ؟!!!!

بل بالعكس ، دول ارتقوا بعلاقتهم اكتر ، ارتقاء مافى بعده اى ارتقاء فى العلاقات الانسانيه الاجتماعيه . لقد كللوا حبهم ده بالجواز (اللى ربنا قال عليه "سكن").

ايه بقى طيب؟!!!!

عارفين ايه السبب ؟!!!

انا هقولكم ، السبب عند الراجل وبعد كده هقولكم السبب عند الست .

* الراجل ليه اتغير:
ــــــــــــــــــــــــــــــ
لانه بدأ يحس انه بقى بيعمل الحاجه (فرض وليس سنه) .
ازاى ؟!!    هقولكم

مثلاً : يعنى لما كان بيشترى شيكولاته لحبيبته ، فكانت حبيبته اكمنها عارفه انه مش مجبر على كده ، وده حباً فيها بس (مع انه جايب شيكولاته علشان رخيصه ) ، فكانت بتظهرله امتنانها وحبها وتقديرها للموقف العظيم ده ، حتى ولو بقلبها ، وبالتالى الشعور ده كان بيتنقل لوشها او كلامها فبالتالى هو كمان بيبقى مبسوط اوى انه حس انه (اعطى).

اما حبيبته دى لو اتحولت بقدرة قادر مع شوية اعمال وشعوزه (لمراته وليعوذوا بالله ) ، فساعتها :

لما بيجيبلها شيكولاته ، بتمد اديها وتاخدها منه ، كأمر طبيبعى ومسلم بيه انه يجيبلها حاجه زى دى (دى شيكولاته بنص جنيه ولا بجنيه هو جاب جمل يعنى) ، وبكل (عادى )
 تقولوه : شكراً يا حبيبى (بسرعه جداً) وكأنها بتغلط فى حق علاقتهم لو شكرته على حاجه من اقل ما يحتم عليه فيها واجبه كزوج انه يعملها.

الحبيب لما ياخد حبيبته علشان يخرجوا ، بيبقى حاسس انه مش مجبر على الخروجه دى ، وهو عاملها علشان متعته الشخصيه فى الاساس  ، من خلال استمتاعه بيها ومتعتها برده.
 وهى كمان بتبقى حاسه انه فرحان بيها وعايز يستمتع بيها ، فبتبقى عايزه تثبتله هى كمان انه عنده حق وان هى فعلا المتعه كلها والخفه والدلع كله .

فبيبقى حاسس انه بيعمل حاجه بمزاجه وكمان بيستمتع بيها ......... (سنه مش فرض).

اما لما يتجوزا ::::: آن آن .....  (تفتح بقها بطريقه مدوره ومقوره ، وبصوت خنشورى ، وهى ماسكه دفرتينها اللى على الاجناب بكلتا يديها ، وتقوله ، "خراااجنى ، انت مش هتخرجنااااااااه ولا اااااييييييييه ؟!!!!! " لترسم ساعتها ملمح غريب على وجهها مباشرة بعد الانتهاء من هذه العباره التى تحمل بعض التذكير مع كثير من التهديد بسنة امه السوده اللى هتطربق على دماغه ودماغ اهله فى حال انه يفكر بس انه يكسل وما يخرجهومشى الاسبوع ده ).
وهنا يضطر المأسوف على شبابه انه يخرجهم ، علشان يزيل كل الضيق والكبت والبأس من قلب مراته و زوجته -  اللى كانت عملالى فيها ناهد شريف قبل الجواز .

 (وتتحول الخروجه بالنسباله لمهمه رسميه ، قمة نجاحه فيها ، انوا ينهيها بأقل خساير ممكنه ).

(وبقت الخروجه - فرض مش سنه ) وما اكره الانسان للفروض.

الراجل لو قاعد مع حبيبته كام ساعه ، وحب يروح مشوار او يرواح ، كل اللى بتقولهوله (بكل سهوكه ونعومه - انضف من نعومة جيليت) ،
وتفوله : "طيب ما تخليك قاعد شويه معايا" 
 فيقوم طبعا يرد يقولها : نفسى والله يا حياتى ما امشى ابداً وما اسيبكيش لحظه -  (مش عارف الايا السوده اللى مسنيه حضرته  قدام بروح خالته ) - بس انا لازم امشى علشان الحق المشوار الفلانى ، او "اصل الوقت اتأخر" .
 ويبقى فعلا مش عايز يمشى .
وهى بكل هدوء وتفهم واستيعاب وعقل .
 تقوله : "خلاص اوك يا حبيبى روح علشان ما تتأخرش وهتوحشنى اوى" .

(وطبعا لازم تقوله ، تيك كييير يا بيبى ، او خد بالك من نفسك يا روحى ، لا اله الا الله )

 وبوسه على الطاير كده  تتبعتهاله فى الهوا ، تخبط فى دماغه ، تدوخ اهله.

اما لو متجوزين بقى :

هذا هو الحوار بعد تواجده فى البيت لمدة 4 ساعات بعد انتهاء عمله  :
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

وهو مش واقف ادامها طبعاً تحاشياً لاى اصطدامات مبكره (يعنى وهو فى الاوضه وهى فى الليفنج روووم - او العكس - او وهى فى المطبخ غالباً ، لانهم بعد الجواز ما بتطلعشى منه )

هو : حبيبتى انا هنزل كمان شويه ، هتعوزى حاجه من تحت ( بيحضر قبل ما ينزل علشان لو حصلت خناقه - على ما تتفض ما يكونشى اتأخر).
هى: اييييييه؟!!!!      (حاجب مرفوع والتانى نازل على الاخر - وعين طلعت لبره والتانيه غااارت لجوه استعدادا للانطلاق هى ايضاً كالقذيفه لترمقه بها اذا ما ساقته الظروف ليقف امامها وجها  لوجه )
وتكمل :  راااايح فيييين يا استاذ ؟!!!!

"هو احنا مش هنبطل بقى ، احنا ما بنصدق نقعد معاك شويه ، ولا انت مش طايقنا على طول كده ، رايح فيييين ؟!!!! "

هو : يا حبيبتى فلان صاحبى تعبان شويه ولازم انزل اشوفه ، والا هيزعل .

هى : وهو صاحبك ده تعب فجأه كده؟!!!

هو : ياروحى طيب انا اعمل ايه ، الراجل تعبان بقاله كام يوم وانا نسيت اقولك ، وكده انا اتأخرت فى انى اروحله وهيبقى شكلها بايخ .

هى (بكل قرف وشزر وجزر و بصل ملوخيه كمان ) تقوله : خلاااااااص ، روووح ، بس ما تتأخرشى ، وما تاخدهاش حجه وتروح انت واصحابك تزوروه خمس دقايق وبعد كده تروحوا تتفسحوا لوحدكم ...........

هو : (وهو بيلعن اليوم اللى عمل فى نفسه كده فييييه ) 
يقول بصوت واطى (طبعاً) : انا كان مالى ومال ..... ام الجواز ده ، ما كنت براحتى وكافى خيرى شرى ، اخرج زى ما انا عايز وانام وقت ما انا عايز ..... وعلى الحريم ما كانوا على قفى من يشيل وكنت بقابل ومظبط احلى كلاااام ..... واحلى دلع معايا بيحصل .......

الشاهد ايه بقى ؟!
الشاهد : ان الزوجه بتحول حياتها مع الراجل لفرض مش سنه .... يعنى بيوصله احساس ان اى حاجه هى فيها او تخصها او تخص البيت ده شئ لازم ومقروغ منه وواجب عليه . وده اقل واجبات البيت عليه.  (وده اكتر حاجه اى حد بيكرهها ، وبالاخص الراجل ، انه يحس ان فيه شئ مفروض عليه ، ذى المذاكره وعمل الواجب كده بالظبط ) 
صح .....
الكلام ده صح ...... بس
ليه ما نخليهوش سنه بدل ما هو فرض ؟!!!!!

على الاقل الاحساس مش الحقيقه .
اه صحيح ده المطلوب منه والمفروض عليه بحكم الواجب والرجوله والشرع .

بس ليه ما نحولشى الكلام ده ، لاحساس العطاء بدل ما هو احساس العافيه .....
لماذا لا نكن من قلوبنا  شاكرين ؟! ................ ولو على اقل القليل.
انا اتوقع انكم فاهمين اقصد ايه ........ اتمنى


*الست بقى ليه اتغيرت :

 الكلام ده هنقوله بعد الفاصل ...........................

اعلانات لمدة يومين كده ، لغاية ما ارجع بالبوست اللى جاى لنكمل معاً سوياً ، تراجيديا الجواز وسنينه )

هناك 18 تعليقًا:

مدونه ما كفايه بقى يقول...

ما شاء الله

يبدو انك عندك خبره كبيييييييييييييييييييييييييره

ههههههههههههههههه

ربنا يستر عليا

تحياتى

افروديت يقول...

ههههههههههههه..شكل المدام طحناك ياويكاعشان كده ياحرام ماصدقت أفشت في صفحة الكتابة وأبدعت أصدي أنفجرت..ههههههههه بجدفظيع...بس عايزه أعرف الشكولاته بنص جنيه ديه شكلها أيه ورقة بس من غيرشكولاته...الست إللي أتكلمت عنهافي البوست وطبعآ كمثال حي للستات دي تبقي أمنا الغوله ومن منطلق أنك راجل لازم تدافع عن الرجالة وتبررلهم بس بصراحة أنتوا اللي تجننوا العاقل شكلكوا كده وعاملين ملايكة ..يبني هو الواحد مقطع الجواز من شوية ماهو من الناس اللي بنشفهم بيطلقوا كل يوم وبعدين أيه الفايدة أني أتجوز واحد وأرجع أخلعه دا حتي يبقي شكله أووووووووفر أوووووووووووي..بس بجدحوارجميل وكوميدي واقعبي ومنتظراك بعد الفاصل.باااااي ياوئام يامخرج الروائع.

ويكا يقول...

ما كفايه كده

خبره ؟!!!!

انا مش عايز اقولك ......

هههههههههههه

انتى افهمى بس البوست جه واللى جاى ان شاء الله

وانتى ربنا هيسترها عليكى على طول ان شاء الله

ويكا يقول...

خيخه

انا مش هقدر انشر تعليقك ، لاحسن الرقابه تقفل المدونه والتدوين كله على امة لا اله الا الله.

لانه اكتر من للكبار فقط.

وانا اخرى هنا للكبار فقط بس بصراحه

ويكا يقول...

افروديت الجميله

هششششششششششش ، هسسسسسسسسسسس
ربنا يجعل كلامنا خفيف .
انتى بتهرجى ولا ايه ، انتى هتودينى فى داهيه ، ده كلام يتقال برده.

بصى يا ستى، بس اقتحى ودانك علشان انا هوطى صوتى ، مفيش حد المدام مش مطلعه عنيه ، هتجيلها يمين هتجيلها شمال ، هتطلع عنيكى هتطلع عنيكى.

لكن انا بالنسبالى بصراحه فعلا ، بحاول استفاد من معرفتى دى ، وعلشان كده ما بستسلمشى للوضع ده اغلب الوقت ، فبالتالى مش بقع فى الغلطه دى ، او بمعنى اصح مش بخلى المدام تقع فى الغلطه دى.

اما بالنسبه للرجاله اللى انا بدافع عنهم ، فلا والله ، انا عمرى ما دافعت عن باطل ، بس انتى اصبرى على رزقك لما البوست التانى ينزل وانتى هتعرفى .





خيخه


معلش انا زى ما قلتلك مش هقدر انشر التلعيق ، بس زى ما قلت لافروديت ، انتظرى البوست اللى جاى وانتى الكلام هيوضح معاكى اكتر وبطلى استعجال بقى

أخووووك يقول...

ليه بقا كدا يا ريس انت اتجوزت وخلعت فاضل انا هتعقدنى ليه
دا انا ناوى اعملها قريب كدا انت هتخلينى أيأس
ولا اقولك عندى فكرة حلوه
انا ممكن افضل خاطب لغاية سن 50 وبعدها افكر ادخل اهو الواحد يعيشله يومين وبعدها نفكر بقا نقضيها عذاب وندخل وامرنا لله
وحتى برده الواحد يكون لحق يكون نفسه

زهرة(جنى)الاسلام يقول...

السلم عليكم
انا مش هاتسرع
لاكن مش كل الناس بنفس الطريقة
ممكن يكون اغلبية المتزوجين كدة لاكن فى ناس مش بالحياة النكد دى

ويكا يقول...

اخويا
يبنى انت قمة التفائل والله ، ليه ، علشان :
1. عندك امل انك تعرف تخطب دلوقتى اساسا.
2. انك لو خطبت تستحمل خاطب لمدة 50 سنه.
3. انك هتلحق تكون نفسك وانت عندك 50 سنه.

قمة التفائل والخيال العلمى بصراحه.

وجدان
بطل تسمع افلام علرى كتير علشان هى دى اللى هتبوظ دماغك

ويكا يقول...

ظهرة (جنى) الاسلام

عندك حق ، وانا ما اقدرشى اقول غير كده.
بل بالعكس ، فيه فعلا بنضرب بيهم المثل بعلاقتهم الزوجيه .

عموما شكراً لصبرك عليا

وده اللى انا متوقعه منك دايماً

sun of free dom يقول...

انت اديت اسباب مقنعة

فى انتظار
الوردات

ها...

ويكا يقول...

صن اوف فرى دام

فى انتظار ايه؟

(ست* جنى* الحسن) يقول...

سلامو عليكو..
هو انت متجوز؟؟؟؟؟؟؟؟؟؟
لو الاجابة اه
يبقى ربنا يستر عليك وعايز ايه نجبهولك فى الزيارة فى المستشفى ؟؟؟؟؟؟؟؟
ولو الاجابة لا
يبقى انت بجد ظالم الست اوى
كل اللى انت بتقوله ده مش صحيح
ومتعقدش نفسك وخلاص
لك تحياتى

ويكا يقول...

ست جنى الحسن

انااااااا
انا ظالم الست انااااااااا


طيب بالله عليكى اسألى كل الستات المتجوزين كده ؟!!!!

وشوفى رد فعلهم ايه على الكلام ده

ان ما ضحكوا ما ابقاش انا.

وضحكهم ده ينطوى على خبااااثه جباره تقول انهم على علم بما يفعلن ......

بس هرجع واقول برده ، مش الكل كده ، لا فيه حالات كويسه برده

يعنى ممكن كل 43 مليون واحده تلاقى واحده برده يعنى.

افروديت يقول...

أيه يا وئام كل دي أعلانات ..ياعم قدروا ظروف الناس بقي...إن مذعتش الحلقة هشتكيك في الرقابة ..بس..وأنت عارف مدامتك لو قرت البوست هتعمل فيك أيه...هههههههه..باي

ويكا يقول...

لاااااااااا

الا الرقابه

وبعدين ايه يا ست افروديت ، انتى مستخسره فيا شوية الفوس بتاعة الاعلانات ولا ايه؟

ولا انتى مش بتشوفى القنوات الفضائيه ، دا يا بنتى ساعات بيجيبوا اعلانات لغاية ما انا فعلا بنسى انا كنت بتفرج على ايه.

بس ما علينا ، حاضر نزولا على رغبت سعادتك ، هكتبه وامرى له.
وانزلك بيه بعد الكام الفقره الاعلانيه دى

صاحبك يا صديقي يقول...

عزيزي المستمع بصبح عليك
بص يا عم الامور هما كلمتين
في احد مسرحيات سمير غانم المتزوجون
سمير غانم بيقول في نهاية المسرحية لجورج سيدهم: أنا سألت جدي أتجوز و لا لأء فقالي : كدة كدة حتندم
و ده الواقع النهار ده

من وجهة نظري لو عزابي زي مثلا الناس مش حترحمك وهي بتبصلك و بتسالك لية ما تجوزتش حضرتك لغاية النهار دة, و لو متجوز المدام مش حترحمك بنوعية الحياة الي بتتكلم عنهالانها ببساطة بتسلبك حريتك الي انت مش عايز تؤمن انها مش ملكك بعد الزواج ودي مشكلة كتير من الشباب فمنهم لسه عايش اعزب جوا البيت علشان يكسب حريته ... اه مهو الجواز والبيت حاجة زي كباية الشاي ليها موعد مخصص يعني مفيش التزامات و لا نيله ويبقى هاضم حق مراته و انا عندي نوعيات من صحابي كده..... نيجي بقى للصنف الاخر الا و هو اعتى الشخصيات الرجولية التي بتعاني من قرف الستات ليه؟؟ لأنهم متأرنبوش
ابل كده خالص ( ارانب بتوع جزر الي سعادتك بتتكلم عليه يعني )
و بيشيلو حديد وحاجات
جامدة فمش متاقلمين على التأرنب المطلوب الشرعي فبيفضلوا في مواجهات دائمة مع العدو وبتكتر مشاكلهم و بيكبروا بدري بتاع تلاتين سنه اقوام
و بيتمنوا بكل سخافة انهم لو اتجوزوا بنت تانية يمكن تسعدهم
عزيزي المستمع لو عايز تتجوز إتارنب و اتبرى من صحابك و لو مش عاجبك متبص على الستات
والسلام عليكم و رحمة الله و بركاته

ويكا يقول...

يخرب عقلك يا صديقى

ايه يبنى الحكم الجامده دى ؟!!!

بجد انت دماغك طلعت جامده موووت ، وانا معاك 50% لانى مش فاهم موضوع التأرنب ده ، او بمعنى اصح مش معاه اوى.

بس عموما ، ربنا يفتح عليك وتتأرنب بقى ، علشان اشوف الفلسفه دى هتفضل معاك كده ولا هتطير مع اللى هيطيروا

ايه رايك يقول...

بجد عجبني اوي موضوع التأرنب بتاع صحبك ده
وكلامه فعلا صح للي مش عايز يتأرنب لانه فعلا بيفضل في مشاكل كبيره وباستمرار



طيب ليه متتأرنبوش بمزاجكم
مهو الحاجه تبقي بالمزاج احلي صدقوني


اما بخصوص البوست فكلامك مختلف تقريبا عن كلامي لكن فعلا كلامك صح جدا وكان غايب عن عقلي خالص


وحكاية فرض وسنه ديه فعلا كلامك صح
ولسه لما اكمل البوست التاني



بس ليه سؤال لما الراجل يعيش في دور المستهبل وهو بيعملش السنه


وطبعا مش هيعمل الفرض مش ده يبقي اسمه استهبال رسمي فهمي نظمي برده


في حلقه مفقوده يمكن القيها في البوست اللي جي

تسلم ايدك

Related Posts Plugin for WordPress, Blogger...