الأحد، 4 يوليو 2010

الجواز وسنينه (الجزء الثانى)

عوده لما كنا بداناه الحلقه اللى فاتت ونكمل ونقول

 
*الست بقى ليه اتغيرت :
ــــــــــــــــــــــــــــــــــــــــــ
بصراحه

 
انا عارف انى هاحبط البنات اللى بيقروا دلوقتى شويه ، بس والله العظيم بجد حاولت الاقى اسباب بنفس الطريقه بتاعت اسباب تغير الزوج كده بس ما لاقتشى ، وعلى ما عصرت دماغى لقيت انى علشان اقول ان السبب من الراجل هبدأ اتخيل حوارات من خيالى اوى مش من الواقع ، فقلت انى هفترى على الرجاله .


بس من مبدأ الاخد بخاطر البنات اللى الله يكون فى عونهم وبيقرولى ، فانا فعلا هتكلم علي الرجاله كمان شويه وافترى عليهم. (او بمعنى اصح هختار ازبل فئه وأعممها على الرجاله – علشان الكل يبقى مرضى).
هههههههههههههه

نرجع لباقى الكلام الاولانى بقى

ايه اللى بيحصل للست بعد الزواج؟!!

بعد الزواج الست بتقتنع تماماً، ان الراجل خلااااص. بقى بتاعها . وكفايه عليه اوى انها اتجوزته خلااااص ، وبقت فى بيته .(كتر الف خيرها)


وبالتالى فهو المفروض يبوس اديه وش وضهر على نعمة وجودها فى البيت .

وبس ..............

لا البوست ما خلصشى ، انا اقصد انها بتفكر كده ( وبس) ، خلاص كفايه عليه كده وبس......

طبعا هانستثنى من الكلام ده اول كام يوم من الجواز يعنى ....... دا اذا كان فيه اول كام يوم ..... وما لبستلهوش .... (البونيه).....  من تانى يوم وقالتله (فلينى).

الست الشرقيه غالباً ، بتعتبر ان الزواج هو بمثابة الاعتراف بانوثتها الطاغيه ، وتميزها عن باقى بنات جنسها . والدليل على كده ، محاولتها دائماً وهى مخطوبه انها تثبت ان خطيبها ده ،( هو اعظم عظمات الشبان )، لان لو هو اعظمم عظمات الشبان  واختارها يبقى هى ( اعظم عظمات البنات).


طبعا الواد الاهبل يا عينى بيبقى فرحان ، ان خطيبته فرحانه بيه ، وعماله تتفشخر بيه قدام الناس كلهم ، وساعتها يفكر نفسه بجد عنتر شايل سيفه ، ويقعد يبص بعين ونص ، ويفرد رجل ويتنى رجل ، ويهز ايده جنبه ولا محمد صبحى ، وهو مش فاهم الفوله الحمار.

عموما ، نرجع بقى للراجل علشان ما اسرحشى تانى فى الست وعمايلها .

الراجل بقى من دوووول ، لما بيتجوز بيبقى عايز مراته تبقى 32 نظام ، ومدة صلاحيتها ما تنتهيش .
بمعنى ، انه عايزها تمسح وتكنس وتصبن ، وتغسل للاولاد البى بى بتاعهم ، وفى نفس الوقت تكون ريحتها حلوه وحاطه بيرفيوم   - وتبقى على سنجة عشره ولا ليلة دخلتها.

(على اساس ان اليوم ده الوحيد اللى حطت فيه بيرفيوم طبعاً).

عايز يدخل من البيت يلاقى المدام ، بتجرى عليه جرى ، وتاخد منه البطيخه ، والجرنان المطبق تحت باطه و ...........
 ايه ده ؟!!! ايه المثل القديم بتاع الافلام العربى ده ، انا بكلم ناس مدونين .
خلاص ماشى بلاش المثل كده ، خليه كده :
عايز يدخل البيت يلاقى المدام بتجرى عليه جرى ، وهى لبساله الحته الحمرا الشفتشى والمفتشى (استغفر الله العظيم ) ، وتاخد منه كيس التفاح ، وازازة اللتر سفن اب ، وشنطة اللاب توب ، وتجرى تدخلهم الاوضه ولا المطبخ ، ايا كان هو بيشيل الحاجات دى وبيخبيها من العيال المزاغيد فين. 

وتقوم راجعهاله جرى تانى يا عينى  ، تقلعه الجزمه والتى شيرت والبنطلون (ده لو كان عنده تيشرت يعنى،  مش نازل بجاكت البيجامه) 
ومن ثم تقعده على الكرسى المعتاد اللى فى اوضة الليفنج روووم ، علشان تدعكله رجليه فى الطشت الالكترونى الجديد ده ، اللى فيه فيبراشن ده ، اللى بيهز لوحده ده ، علشان تعمله ماساج فى رجله البعيد.


- اه صحيح ، قبل ما انسى ، الطشت الالكترونى ده ، طبعا هى لازم تكون جيباه معاها فى العفش طبعاً ، امال هو اللى هيشتريه ولا ايه).
وبما ان ده ما بيحصلش ، ولا عمره هيحصل ، والراجل بيدخل ما بيلاقيش لا احمر ولا اصفر ، ولا بتبقى الست شاريه هذا الطشت الالكترونى فى عفشها معاها وهى جايه من بيت ابوها .
فهو بيبقى داخل من الباب وهو منزل كل الحواجب ، وعامل بيهم هذه الـ سبعه الغريبه ، ومش طايق نفسه ولا طايق عيشته من اللى المدير فيه عمله.
ليدور الحوار التالى بعد ان رن الجرس عدة مرات بدون اى طائل من الرد عليه ، واصوات صياح وصريخ الاطفال من الداخل ، يجعله يستحضر كل الكبت الذى كبته جراء ترقيع مديره له فى الشغل هذا اليوم ، ليجمع كل ما بداخله من ضيق وغل وكبت وهم على وجهه قبل ان يتم فتح الباب له ، حتى يجعل الجميع يشاركه هم هذا اليوم ، الذى لا يجب ان يتحمله وحده من باب مشاركة اهل بيته افراحه واحزانه (فهم اسره واحده - وكل لا يتجزأ من هذا الكيان العظيم) ، فلابد من ان تكون ليلة اهلهم سوده هما كمان . اشمعنى هو يعنى.

هو  (بعد ان فتحوا له اخيراً) : اييييه سنه علشان تفتحوا ام الزفت ايه القرف ده .
هى بكل براءه (مش حقيقيه طبعاً) : معلش والله ما كنتش سامعه من الاولاد ودوشتهم ، وكنت فى المطبخ بعمل الاكل ، والواد الصغير عملها على نفسه ، ورحت انضف مكانه ، وبعدها كنت بعمل .......... بس بس بس (هو مقاطعاً) انتى هتحكيلى قصة  ............ خلاص خلاص اف .........

هو (بكل قرف وحواجبه لسه سابعه) : امسكى ، مش شيفانى شايل وطالع عينى .
هى : سورى يا حبيبى ، ماخدتش بالى .
هو (وهو بيهز دماغه بقرف وهو مش عاجبه): اففففففففف ............ وخد نفسه ودخل جوه .......على الاوضه
هى : هااا  عملت ايه النهارده ؟!!!!
هو : ما اتنيلتش عملت حاجه ، ذى كل يوم ، قرف وزفت ، وكل ده علشان خاطر سيادتكم تعيشوا عيشه كويسه ، يعنى انا يطلع عين ابويا واستحمل غتاتة ام مديرى الزفت ، وانتوا قاعدينلى هنا فى التكييف ولا فى دماغكم ، وفى الاخر ، حتى الباب مش راضيين تفتحوووووه. دى حاجه تقرف..............

هى (وهى فتحه بقها ، ومش عارفه ترد ، ومسبهله): معلش ياروحى ، انا عارفه انك بتتعب ، بس كله يهون ان شاء الله ، وربنا هيرزقك بشغل احسن منه باذن الله.
هو : هي هأ ، ابقى قبلينى . ما علينا .............. عملالنا ايه النهارده ، ولا لسه حضرتك ما عملتيش.........
هى (وهى بتهته) : اصـــــــــــــــــل اااااااااا .................. اصــــــــــــــــل ااااااااااا .............
هو: اصل اييييييييه؟!!!!! استر يارب .انطقى.
هى: اصل الانبوبه فضيت وما عرفتش اطبخ ...................
هو :  وهو بيقول (كلمه اعتراضيه قبيحه جداً ........... ما طلعتشى منه من زمان )......... (ونزل على ركبه زى القرد كده وحط ايده عليها ، وهو مش قادر يصلب طوله من الصادمه )  يعنى ايه ؟!!!
مفيش اكل ؟!!!! 
هموت من الجوع ؟؟!!!
 انا ناقص؟!! 
( والدموع هتنزل من عينه ياعينى ) طيب اعمل ايه دلوقتى؟!!!!
 هاكل ازاى ؟!!!
دا انا ميت من الجوع .

هى (بكل برود): معلش يا روحى ، احنا ممكن نلبس بسرعه ، وننزل ناكل كلنا فى اى مطعم قريب.
هو : هى ناقصه ياختى ............ هى ناقصه مصاريف ...... مش كفايه اللتر الحاجه الساقع اللى انا كنت جايبه معايا (وكنت متخيل انى هعمل عليه حفله النهارده). ودافع فيه خمسه جنيه ونص بحالهم ، طالعين من روحى.
عليه العوض ومنه العوض فى الحاجه الساقعه والتفاح.

وتنتهى الليله ، بعيش وجبنه وطماطم ، وتفاحتين وكباية حاجه ساقعه من اللى هو كان جايبهم معاه للاسف.

طبعاً العيشه مش دايماً غم كده ، بس المشكله ، ان فعلا فيه رجاله كتير مش بتعرف تفصل بين بيتهم وشغلهم ، واللى الست تعمله فيه فى البيت يروح يطلعه على الموظفين ياعينى ، واللى المدير يعمله فيه ، يروح يطلعه على جتت ام مراته.

وده مش صح ابداً ، لازم اول ما يطلع من اى باب من الاتنين ، يسيب وراه كل شئ .

وتنتقل بينا الصوره والمشهد ، للحظة الدلع ، والهشك بشك يا عزيزى ، وطبعاً البيه مستنى الهانم البرنسيسه عزيزه ، تدخل عليه بملابسها الجديده الساخنه الفاخره الفاجره ، التى تحمل كل الوان الطيف  (اللى كانت طبعاً داخله بيها من 5 سنين ) ، لان البيه ما بيشتريش طبعاً حاجه.
وحارم امها من اى شئ ، يدوب جايبلها قصافه بالعافيه ، تقص بيها ضوافرها.
وحتى البرفان اللى سمحلها مره من شهر ونص انها تجيبه ، ونوعه (بى بى العفريت ) ، وكان ب 3.5 جنيه ، وكان جايبهولها مجبر لانها يوميها كانت زعلانه ، وكان مضطر يصالحها ، (و الا هو اللى كان هيغسل اللبس لنفسه) .البرفان ده قرب يخلص وريحته بدأت تقلب على حاجه تانيه خالص. (تخيلوا انتوا بى بى العفريت لما يتغير هيبقى ايه).
ما علينا بلاش قرف .
طبعاً بخليط من ريحة البصل ، مع ريحة بى بى العفريت من بعد ما غير ريحته ، كان هناك نسيج من ريحة برفان مجهول الهويه ، طالع منها .

واذا به يستقبلها بكل ود وحب ، ويقولها : ريحتك وحشه اوى يا حبيبتى ، ايه القرف ده.

ونسى البيه ، انه عمره ما جابلها قزازة برفان ، ولا حتى سمحلها انها هى اللى تجيبه من مصروفها ، دا اذا كان بيديها مصروف اساساً.
وطبعا نهيكم عن تعليقه على لبسها المقطع ، وانها مهمله فى لبسها ، وشكلها .
وانها ما عندهاش ذوق فى اللبس ، ومش نضيفه.
وبرده نسى انه عمره ما اخدها من اديها وراح اشترالها اى حاجه جديده ، وفقط اعتمد فى الاساس على اللبس اللى جيباه معاها من بيت ابوها وامها من خمس ست سنين.
تقوله هاتلى كتاب ، يقولها ، هتعملى بيه ايه ، شملوله اوى .
تقوله ، فسحنى ، يقولها مش فاضى .
تقوله طب تعالى نسمع فيلم فى التليفزيون سوا ، يقولها اصلك رايقه.
تقوله طيب بتحبنى لسه ، يقولها واحبك ليه ؟ احنا مش اتجوزنا خلااااص.
ههههههههههههه
وكأنه عمل اللى عليه خلاص ، ووفى بوعده ، وسترها الله يستره.
ياخوانا مش كده عيب .

انهن عوال عليكم ، اخذتموهن بكلمة الله ، واسترعيتم عليهن ، فاتقوا الله فيهن.
وان لم يعجبكم فيهن شئ انظروا لشئ طيب فيهن اخر.

عايز مراتك تبقى ذى فلانه وعلانه ، اللى لحست مخك ، هاتلها زى اللى عند فلانه.
عايز مراتك تتسهوك عليك وتتمرقع زى البت سوسو بتاعت الحلبسه ما بتعمل معاك وانت بتريل عليها ، روح ريل على مراتك وهى (احتمال تغير رأيها وربنا يهديها  وتتوب ، وتبدأ تتمرقع هى كمان).

انا عارف ان الست والله فعلا هى المفتاح الاساسى فى انجاح العلاقه مش الراجل ، وعلشان كده الاختيار بيبقى للراجل مش للست .

يعنى الراجل هو اللى بيختار شريكة حياته ، علشان تبقى مناسبه له على قد ما يقدر لانها هى كلمة سر البيت .
وعلشان كده الرسول وصى بحسن اختيارها وحط شروط الاختيار .

لكن هارجع واقول ان المسئوليه مشتركه.

هو لازم يبقى راجل
وهى لازم تبقى موزه.

انتهى

هناك 15 تعليقًا:

افروديت يقول...

الرغم من تحفظي علي بعض الكلمات التي وصفت أن الست تقوم بها الموضوع جميل جدآ وعايزةأقولك أي ست شرقية ولا غربية ولا مطرية حتي بتعتبرالجوازأعتراف بأنوثتهاتبقي غبية ومتخلفة.. أماموضوع الحلقة جميل أوي بس أنارأيي أن في رجالة كتييييييييييييييرأوي مظبوطين علي أبو وردة ولا ممكن أبدآ أبدآ يحصل لهم اللي حاصل ده دي مهزلة يبني بجدومش ممكن حد يفتري علينا أو يستقوي..بس تصدق بعد البوستين اللي كتبتهم خليتني أحمدربنااااااااااونرفع أناوكل البنانيت شعار لازواج من اليوم والي أخر يوم ..برافو يا وئام يا مبدع وكاتب الروائع

بنك دم المدونيين يقول...

نرجو من حضرتك الاطلاع على الفكره ونقدر مساعدتك

ويكا يقول...

افروديت الجميله
اولاً نداء عام
يا جماعه ، انا ما قصدتش ان الست لازماً ولابد ان تعمل الحاجات اللى انتوا بتتكلموا عنها دى (بالاخص موضوع غسل الرجل والكلام ده) ،ولا قولت انه فرض عليها ولا حاجه ، وبالاخص انى قولت فى البوست اللى قبل كده ، ان الواجبات الزوجيه عموماً حتى وان كانت التزام وفرض فى الحقيقه ، بس يفضل اننا يصبغ عليها طابع (السنه مش فرض) يعنى تبقى فى شكل عطاء وود وحب.

(ده رداً على جملتك الاولى يا افروديت وكمان جزء من تعليق خيخه تحت.

اما موضوع اعتبار الست ان الجواز اعتراف بأنوثتها ، برده انا ما قولتش كده ، انا قولت ان حد اتقدملها ( ووافقت عليه )ده بيبقى بمثابة احساس لها بانها مرغوبه (لكن انا ما قلتش انه كده بل بالعكس والله انا مؤمن ان الجواز ده (نصيييييييييييب ) حتى مش اختيار لا منها ولا منه. لكن انا قولت ان ده بيبقى احساس اغلبهم يا ستى اهه مش كلهم.

اما موضوع ابو ورده ده ، مش عايز اقولك انا قعدت قدامهما حوالى ربع ساعه علشان افهم ايه هو ، ههههههههههه ، بدون مبالغه ، قعدت اقرا التعليقات ، وارد عليكى وانا لسه مش فاهم ايه ده وعمال افهم فيه.

هههههههههههههه

انتى تعرفى انى سمعت ان الدوله رقم واحد فى العالم فى اعتداء الزوجه على الزوج هى مصر ، تليها امريكا ، والفرق بينهم كبير شويه.
وبعد كده الدوله التالته ، فرق كبييييير .


هههههههههههههههههاواوعى تتنجننى يا بنتى وتعمليها ، خليكى عاقله والله.


وعلى فكره يا معلمه ، انا شكلى كده بدأت اقتنع انك انتى اللى فى دماغى.

ههههههههههههه



عموماً ، انا بنصحك فعلا ان تبتعدى عن الزواج نوهائياً.

وتحياتى ليكى ، وانا ببقى مبسوط اوى لما بتبقى اول تعليق عندى

ويكا يقول...

ست خيخه بقى

يالهموى......... يالهوى .......

يالهوى يالهوى يالهوى

انا مش عارف الطم ولا اصوت.
ومش عارف الطم واصوت من ام الداخله الشمال اللى انتى دخلاها فيا دى.

بس عموماً بقى وكالعاده ، برده مش هسيبك الا ما ارد عليكى كلمه كلمه (لاهميتك عندى ، مش لاهمية رأيك P-: )ههههههههه لا طبعا لاهميتهم هما الاتنين.
بس هتفضلى تعبانى كدهو طول عمرك شكلك كده . بس ماشى

اولاً ياباشا ، انتى الوحيده اللى بتقوليلى ان المدونه عندى تقيله ، انا بفتحها والناس كلها بتفتحها فى ثوانى. وانا عملت الللالى علشان اغير المشكله دى عندك بس مفيش فايده ، يا بنتى غيرى ام الجهاز بتاعك داوات.

اما موضوع برنامج القرآن ، فمش هشيله باذن الله ، مين دراكى ، مش يمكن ربنا يفتح على حد ويشغله فعلا واخد ثواب .
اما انه هو اللى متقل المدونه فما اظنش ، هو ممكن يكون عامل قافله معاكى انتى بس ، بسبب ام الالفاظ اللى زى البتاع اللى بتتقال على الملأ دى . (خليها لاعز الناس عندك افضل ، هما اولى بيها ) هههههههههه

موضوع الغلطتين الاملائيتين : هيتغيروا ان شاء الله دلوقتى ، وان كنت مش بحب اراجع زى ما قلتلك قبل كده مليون مره وببقى شايف الغلطات احياناً وبسيبها بس ماشى علشان خاطرم بس هغيرهم. (هغيرهما) بقى لاحسن تتشلى تانى.

ندخل بقى فى الموضوع.

اول نقطه انا متهيقلى رديت عليها خلاص فى التعليق فوق ، وانها انى ما قصدتش كده خاااالص ، انا كل اللى قصدته انه هو اللى متوقع كده ، وبما انى متحامل على الراجل فى الجزء التانى فده معناه انى بنتقده فى الحته دى . يعنى انا ضد ده فعلا.

ها طلعن من دى ؟ (طلعنا).

اما موضوع البوز ، فماتخافيش مضروب يا بنتى مضروب مهما يعمل (لانها اكيد هتلاقى شئ يعكننها من ناحيته. هههههه
وما تقاوحينيش فى الحته دى .
ولو ما لقيتشى ، هتتخيل شئ يضايقها.

الصوره بتاعت الست المقهوره اللى انا راسمها ، فده علشان انتى مش مركزه يا استاذه ومش متابعه كويس.

او بمعنى ادق تانى اكمنك عندك ذاكره نتقائيه زى كل الستات ، ونسيتى انى فى البوست الاولانى كنت مخلى الراجل هو اللى مقهور .

عرفتى بقى الست (كده كده ) هتتخانق مع جوزها ليه؟!! علشان عندها ذاكره انتقائيه ، بتفتكر اللى جاى على هواها بس . p-: .

اما ادبياً ، فده لانى ببالغ فى ده عن عمد فعلا فى كلا الموقفين فى البوستين. ده لابراز الطرف المعنى اكثر.
علشان كده حضرتك لما بتروحى تعملى جواز سفر للعمره كده او زياره لجوزك فى بلاد بره ، بيطلبوا صور خلفيه بيضه مش الوان ، علشان يبقى فيه تركيز اكتر فى الوش نفسه وتفاصيله ولا يتم الالتهاء عنه بالوان تانيه فى الخلفيه مش مطلوبه دلوقتى.
(طلعنا من دى؟!!) ..... ان شاء الله طلعنا.

اما موضوع ان لاختيار لمين ده ، فانتى معاكى حق ، بس للاسف برده مش ده اللى كنت اقصده.

انا كنت اقصد ، ان الزوج هو المعنى فى (البحث ) الاول ، اما الست فهيا معنيه بالموافقه ام الرفض ، ده بعد ما هو يكون وافق اساسا والا ما مش هيبقى فيه مجال لموافقتها او رفضها.

وما ينفعشى حد ينكر الحقيقه دى، ولا انتى اللى روحتى خطبتى جوزك ولا ايه ؟!!!
والله ممكن تعمليها وانا عارفك.

طلعنا ؟!!! مش عارف ، حاسس انك عايزه تعترضى برده ، بس انا هقول طلعنا برده . p-; هههههههههههه

ويكا يقول...

خيخه (باقى التعليق منك لله ) لان عدد الحروف زاد عن المسموح
ـــــــــــــــــ


اما موضوع بنتى وتربيتها ده ، ومقهوره ولا لا.

سورى يعنى ...... انا نفسى اقولك نفس الكلمه الاعتراضيه بتاعتك بجد

ان شاء الله دى اخر حاجه ممكن تحصل ، دا انا عمرى ما فكرة فى فكرة انى اقهر العمال عندى او المهندسين ، يبقى اقهر مراتى ولا بنتى ؟!!!!

مستحيل.

انا بستمتع لما الاقى بنتى لها شخصيه مستقله ، بستمتع بمعنى بستمتع ، لكن فى حدود ، وهنا تبقى وظيفتى.

انى ابقى دايما مراقب واحافظ ديما على وجودها داخل الحدود اللى كلنا ما نقدرشى نتخطاها.

اما جوازها ، فده ان شاء الله اخر حاجه ممكن اعملها - جوازها او كليتها - او لعبها - اوى شئ يخصها لا يمكن ابداً ابداً على رأى افروديت انى اجبرها على شئ فيه ان شاء الله.
لانها بكل بساطه ، بنى ادم وله حق الاختيار _ بالاضافه انها ....... (بنتى).

بالنسبه للراجل ، بقى وعرقه وعبله والعرق ، بجد الله يقرفك . ههههههههههههه

وايه الشورت الرعاش ده صحيح ؟!!!!!!

ههههههههه
بس بجد انتى معاكى حق ، ان كان هذا الكائن الخرافى المنقرض لسه موجود .

لان بكل بساطه انا لما حاولت اتجيز للست فى هذا البوست ، اظهر الرجل فى اسوأ حالاته ، ماجاش فى بالى ابداً المنظر ده ، ولو كان جه فى بالى كنت كتبت كده والله .
علشان كده انا بفكر اننا نعمل كتبا مع بعض ، هنكمل لبعض صور كتير اوى .
ههههههههههههه

وعلى فكره ، انا شكلى فعلا طلعت راجل محترم زى ما صحابى بيقولولى .

ههههههههههه

اما موضوع القميص الشفتشى ، فقلبك ابيض ، مين قالك ان الرجاله كده .
يا بنتى ده فيه رجاله عايزه الدبح ، لسانه اد كده فى تعليقه على لبس مراته وهو مستحيل يجيب شئ.

بس انا عن نفسى ياختى هجيب كل حاجه .

امال انا بشتغل لييييه

ههههههه

وبس بقى انا صوابعى واعصابى باظوا

يخرب عقلك .

بس ايه رأيك ، عندى صبر عليكى ، ولا صبر الابل ولا لاء؟!!!!

تعبتينى والله

الـسـيـدة نـون يقول...

اولا

مصطلح ابو وردة فى تعليق افروديت
فكرني ببتنجانة التدوين
آبي هانم بتنجاني

ما علينا


فى ردك على افروديت
استغربت اوى الجملة اللى انت كاتبها دى

يا جماعة انا مقصدتش ان الست لازم انها تعمل كل الحاجات دى
وبالاخص دعك رجلين جوزها


الله يا اخ ويكا؟
وفيها ايه لما تقصد؟
ايه العيب والمسيئ ان الست تدعك رجلين جوزها؟

ده جوزها يعنى حبيبها يعنى اقرب راجل ليها
وانا لما اقول اقرب يعنى اقرب بجد
اقرب من ابوها واخوها وابنها
جوزها اللى شاف كل تفصيلة فى جسمها
جوزها اللي لو اتعرت لحظة هتدارى وراه علشان يسترها

جوزها يا جدعاااااااان
جوزها
يعنى نصها التانى
يعنى الزغلول الكبير
يعنى ابو العيال
يعنى شريك الحياة

احيييييييييه عليكم

انتوا هتنرفزونى ليه بقى

الجواز ده شركة علشان الطرفين يدلعوا بعض
ويريحوا بعض ويبسطوا بعض
ويكملوا بعض

فيها ايه لما الست تدلع جوزها وتدعكله رجليه
والراجل يدلع مراتهويعملها مساج

انتوا مالكم كدة مقفلين
وبتستنكروا كل حاجة ممكن تحصل بين الازواج؟


مادام فيه حب وتفاهم
الحياة هاتمشى حلو


ما علينا

ارجع تانى لنقطة ان الرجل هو المعني بالبحث

يا عزيزي ويكا

الفتاة ايضا تبحث عغن زوج
فى حالة انها تكون عايزة تتجوز وشايفة انها عدت مرحلة خطر من عمرها

فبتخاف توصل لمرحلة العنوسة
وبتلاقيها ااااه بتدور على عريس هى كمان
فى اول مرحلة شبابها تلاقيها بتتعزز على اى يطلبها وترفض ده وتطلع القطط الفطسة فى ده
وتوافق على ده

لكن لو كبرت شوية
هتلاقي بعبع العنوسة بيطاردها
وهتلاقيها بتحاول تعمل بحث ميدانى للى حواليها وتشفو مين ينفع يكون زوج
علشان تشنكله وتجيبه على قفاه يجى يتقدملها

فبرضه الست هى كمان بتبحث عن شريك حياتها
وليس الرجل فقط


بس خلاص
شكرا ليك على حسن استحمالك لازعاجي لك

اختك خيخة

ويكا يقول...

اخت خيخه

يا بت اتهدى بقى وبطلى تصطادى الكلام

انا قلت (ما اقصدش - لازم )

يعنى (مش فرض ) لا (سنه)

اما موضوع الشنكله ده ، ههههههه فربنا يستر بقى.

اما بالنسبه لاستحمالى ، لبواختك ورزالتك وازعاجك فانتى عندك حق.

ههههههههه
بس
كل اللى اقدر اقولهولك ، انى بستمتع بيه

بسسسسسس

على فكره انا صلحت كلمة صراخ ، ومش لاقى كلمة استثنائى

ماليش دعوه ، مش مصلح حاجه ، الناس عارفه خلاص وهيفهموا لوحدهم.

عايزه تغيريها غيريها انتى . بلاش قلبة دماغ p-;

الـسـيـدة نـون يقول...

وانا بحب أنكشك

نيهاهاهاهاهاهاهاهاهاهاهاهاهاع

الـسـيـدة نـون يقول...

معلش هى ماكنتش كلمة استسنائي
كانت كلمة هانستسني

وتصليحها هايبقى كدة
هانستثنى

الكلمة دى موجودة فى الكوبليه اللى هو مذكور فيه كلمة بونية


روح صلحها وبلاش تكاسل
علشان اللى يقرالك اول مرة مايقولش عليك ساقط لغة عربية

عيب عليك يا اخ ويكا
ده انت حاطط برنامج قرآن على مدونتك
يعنى اكيد عندك معجم لغة عربية فى دماغك يخليك تستشعر الكلمة المكتوبة غلط



سلام
اختك خيخة

ويكا يقول...

خيخه

يا بنت الاييييييه؟!!!
يعنى كنتى بشتغلينى؟!

طيب اليكى هذه المفاجأه بقى

انا كمان ما دورتش

آن آآآآآآن
هههههههههههه
بس صلحتها فعلا دلوقتى

شفتى بقى

صاحبك يا صديقي يقول...

اي يبني فيه ايه انت عن مين بتتكلم
بنات ٢٠١٠
؟؟؟؟؟؟
مستحيل
بالعكس ابسولوتلي
طب ابقى قابلني لو الصنف دة لسه موجود ( الا في الروايات و المتاحف ) انت بتتكلم عن عام ١٩٨٠ و ما دون
انا اتحداك تلاقي بنات زي كدة دي الواحدة فيهم لو بصتلها بعين تخلعك و لا زي الخالعة الجاكت الشتوي في يوم صيفي حار جدا و لا يهماها
شوف المحاكم وو قصص الطلاق الي على اهون سبب عاملة اية

يمكن انت بتتكلم عن سكان العشوائيات و القرى
حتى برضو دول كله اتاسس صح الوحدة فيهم بتعرف ترد عليك و تديك حجمك
وكينونتك وتختارلك الكلمات المناسبة لموقف زي ده
و يعني لو امها حماتك كانت مدير اعمالها حيحصلك اية!!!!

ومتنساش الستلايت و النت بيعملوا ايه من سنين وحقوق المرأة
ولا لاضطهاد الرجالة ولا لل......يا رب انت عارف بقى

من ناحية تانية مسالة الشعور بالانوثة والفشخرة بالعريس حاجة مكشوفة خالصة
و ممفيش بني ادم مبحسش بكدة الا الساذج ، ولازم يحس بكدة لانه من ناحية تانية ( بعيد عن حتة الانوثة الطاغية) يمكن في حد مش عاجبة العريس و بتكلم عليه
على شكلة و ستايلو و بيتكلم ازاي و معهوش اعدادية و من الكلام ده

و هي خلاص تدربست لا تراجع لا استسلام البحر امامكم و العدو خلفكم
(ده ازا م كنتش من بنات امشي عدل لاخلعك او حفيت لجالها الباشا )
فبتعوض دة بالفشخرة بحضرتو و انه عندة اضافات اخرى بتغطي على المهازل الي نازله علي ودانها ليل نهار
دة ما يغبش الا على الساذج

نيجي بقى لموضوع التبرج المشروع للرجل
بص هي في بيت ابوها و امها كانت بتشتغل جارية ( طواعيةً)و ده ميعطلهاش تقعد ساعتين ادام المراية
لما تتجوز الشغل هو هو ( معرفش ازا في دراسات بتقول انه الشغل بيزيد بعد الزواج ) فلية الساعتين دول بيختصروا بلاش خليهم ٤٥ دقيقة
اما حكاية الرجل الي مش عاجبة منظرها فده معاك حق صحيح انه خسيس لو مبيدهاش عشان متعته الخاصه او عشان نفسها صحيح انه تخلف في التقدير في رجاله كدة
لكن في الطرف التاني في رجاله بتجيب و البتاعة الريحة السفن اب الهايلة بينتهي مفعولها و لسة لم يستهلك مقدار ٣ مل من اصل ٥٠٠ من ريحة السفن اب ده

بحب اقول حاجة مع تجربتي في هذه الحياة انه الراجل من الصنف دة لو استمر على كدة حيحصد النتيجة علي كبر كراهية و عداء من ابناءه

ويكا يقول...

مبدع دايما يا صاحبى

Haytham Kilany يقول...
أزال أحد مشرفي المدونة هذا التعليق.
صاحبك يقول...

تصدق الواحد لقى حاجة يمسكك منها يعني تتعامل معايا باحترام ولما احتاج فلوس تديني وانت ساكت والا كل اللي هاعمله افرود اللينك لايهاب .

ويكا يقول...

يالهوى

حاجه تمسكنى منها ؟!!!

اوباااااااااااا

زى ديل الفار كده ؟!!

واحترام وفلوس؟!!!!!

لاااااا
انت تدى لايهاب اللنك اسهل .

وعموما الحمد لله انى ما اعرفشى انتى مين.

هههههههههه

وبعدين ايه الصاحب الواطى ده؟؟

مع ان ده العادى بتاع اصحابى برده. بس ما توصلشى للفلوس يعنى ، شكلك صاحبى من بعيد وما تعرفنييييش.


هههههههه


سلام يا صاحبى.

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...