الخميس، 5 أغسطس 2010

يا خرابى يا جدعااااااااااااااااان


قرأت عند الاخت Tazmania فى المدونه بتاعتها التحفه ، عن موضوع اخر تقليعات جوجل ، ألا وهى ترجمة اصوات الحيوانات ...................
.............. تييييييييييييييييت ......... يا جدعااااااان ........... ( سورى يا جماعه بس ده كان لفظ عيب ، بس الرقابه بتاعت المدونه عندى شالته ).................
ترجمة ايه ................. ؟!!!!!
الفكره انى مش حكاية انى "مش مصدق" لا بالعكس ، الموضوع مش مستبعد لان بحكم انى مسلم فأنا مؤمن ان الحيوانات بتتكلم ، وان كلامهم ده علم ربنا يهبه لمن يشاء ، والموضوع ده ممكن يتحقق بعد شوية اجتهادات واكيد مش هتبقى ترجمه حرفيه يعنى.
لكن الفكره من تعجبى حاجه تانيه خاااااالص.
ألا وهى كم الفضايح اللى هنسمعها من الحيوانات ...................... (اقصد اللى هيبقوا ساعتها ، اللى كانوا حيوانات ، لان ساعتها هنبقى حضراتنا اللى حيوانات ............... بعد ما نسمع رأيهم فينا واد ايه احنا كنا مغفلين ...............
بجد الموضوع كوميدى جداً ............. وحاسس انها هتبقى مهزله .............
تخيلوا معايا كده .............. المواقف دى :

المشهد الاول:

خروف واقف مع خروف تانى كده ........ وعمالين وهما بياكلوا برسيم ، ( او بمعنى اصح عاملين نفسهم بياكلوا برسيم ، ومدلدلين ودانهم كده فى الارض وعمالين يتودودوا على الراجل صاحبهم).

الخروف الاول: الراجل المغفل مفكرنا مش فاهمين هو بياأكلنا ليه .............
الخروف التانى : وحياة امى ما انولهاله ، ولأكل وارجع اللى كلته تانى ، وخليه يورينى هيعمل بيا ايه لما يلاقينى شوية لحم على عضم فى الاخر.
الخروف الاول : وانا هاستنى لما ابقى عضم ، طب ودينى وما اعبد ، يوم ما اعلم انه نواهالى خلااااص ، عليا وعلى اعدائى ، هشربله سم فران ( واغش ) – كلمه فلاحى معناها انه يبقى متسمم- وخليه بقى يورينى هيطفحنى ازاى.

المشهد التانى :

كلب واقف مع الكلبه بتاعته وعمال يبرم فى ديله وعاملى فيها الكلب بسلامته.
الكلب : بحبك يا تفيده ، وما بستحملشى بعادك لحظه ، وكل ما افتكر ان الكلب ابن الكلب  مخيمر ده ، عايز ياخدك منى ، بتجنن وبيجيلى الصعار وببقى عايز اعضه.
الكلبه (تفيده): يا سلام يا خويا ، بس مخيمر عمره ما لعب بديله كده ولا كده ، وبيحبنى  ولو شافنى من بعيد بس ريالته بتنزل اكوام اكوام. ، وعمره ما شمشم كده ولا كده .
الكلب بتاعها : ويعنى انا يا تفيده اللى بلعب بديلى ، دا انا من ساعة ما وعيت على الهبهبه ، وانا عمرى ما هبهبت الا لصاحب البيت لما يجيبلى الاكل، وده طبعا يجوز  ، ولكى انتى بس يا تفيده. (ويبصلها بسهتنه ، ويقرب بوزه منها ، لعل وعسى البت (سورى اقصد الكلبه ) تبوظ ولعابها يجرى وتديله عضه خطف كده ولا حتى لحسايه.
عين تفيده تتقلب لفوق وهى مدلدله لسانها لتحت ، وديلها نازل لتحت ومدلدل هو كمان ، من الحاله العاطفيه اللى هى بقة فيها بسبب كلام المدهول على عينه اللى قالهولها دلوقتى ده ، ونظرة السهتنه بتاعته دى .
بس مره واحده تتماسك وترفع ديلها لفوق مره تانيه وتقوله ........
لاااااااااا ، انتى بتضحك عليا ، فاكر لما انا كنت جايه من بعيد مره ، وانت ما كنتش شايفنى ، وكانت الكلبه لاسى معديه من قدامك ، وجيت انت موقفلى ديلك على الاخر ومدلدل لسانك على جنب ، وقعدت تتمنظر ادامها ولا كأنك البوبى اللى شايل سيفه ؟!!!!
الكلب : انااااااااا؟!!!! انا ؟!!! ، ان شالله ما اوعى يترفعلى ديل بعد كده ما شفتها ولا اخدت بالى ، دى تلاقيها كانت معديه وانا بعمل التمارين بتاعتى الصبح قدام باب البيت ، وما كنتش شايفها........
الكلبه : تلف براسها ثم باقى جسمها منصرفه وكأنها مش مهتمه وتقوله ( هئ ولا كنت بتبصلها ، انا ايه اللى يهمنى ........ ، انا ما يفرقشى معايا ، انا واثقه من نفسى ).
الكلب : بهمهمه محبوسه ، امال هريانى اسأله ليه من الصبح يا بنت البوبى مادام واثقه فى نفسك ، كنت خلاص هتكشف ياللى العيال الصغيره يحدفوكى بالطوب ..................

مشهد تالت:

البطه على السطوح ودكر البط هو وواحد صاحبه وباقى البط واقفين مشرأبين كلهم على بطه معديه قدامهم.
دكر البط : شايف ياد البطه اللى هناك دى عماله تتمختر ازاى!!!
صاحبه : (وهو بيكز على شفايفه ، ايوووه يا جدعان ، حتة بطه ).......... وعينه خلاص هتطلع عليها.
دكر البط : تدفع كام لو كلمتها دلوقتى واخدت منها رقم الكاكى بتاعها ؟!! (الكاكى ده طبعا ، زى الموبايل عندنا كده بس احنا ما كناش نعرف انهم عندهم هما كمان كاكى)
صاحبه : تبقى حتة بط استااااااذ وهرفعلك العرف .
دكر البط : عرف ايه يا طائر ، انتى ناسى انك بط مش ديك .
صاحبه : كاااااااااااااااااااااااااك ، عندك حق ، بس اعمل ايه ، يخرب العشه بتاعتها ، بوظتلى دماغى من عتقية مشيتها دى ....... (ملحوظه ، كااااك هنا كلمة تشبه اخخخخخ ، او يييييييييييه فى لغتنا الكريمه ).
دكر البط : بصراحه عندك حق ، البطه جامده وريشها طويل واسمر وناعم ، وعنيها يخرب عشتها (عشتها = بيتها).
صاحبه : طب اعمل نفسك بتاكل بسرعه لاحسن الست صاحبة البت جات.
يدفسوا راسهم بسرعه فى الطبق اللى قدامهم وعنيهم هتطلع من فوق حرف الطبق على البطه وهى بتجرى على صاحبة البيت ، يمكن يشوفوا منها وهى بتجرى حاجه كده ولا كده.


مشهد رابع واخير :

الفيل ابو زلومه اللى  فى جنينة الحيوانات فى مصر.

الفيل :(وهو بيبص لعيل غتت عمال يحنسه بخيارايه ، وما اعرفشى هو الفيل  بياكل خيار ولا لاْ ، بس عادى بقى اخوكوا جاهل بالتكنولوجيا واول ما اتعود على الجهاز الجديد ده هعرف ان شاء الله كل حاجه طبعاً )
الفيل : الله يلعن اليوم اللى اتذليت فيه لعيل نتن زيك ، كنت زمانى دلوقتى فى الغابه بأكل من اطخنها شجرة ولا الحوجه لكلب زيك.
الكلب اللى فى القفص اللى جنبه : وماله الكلب يا سى فيل ، على الاقل عمره ما غتت عليك ولا حتى اتجرأ يهوهولك .
الفيل معتذراً : معلش ياعم الكلب ، ما كنتش اقصد ، بس الواد ابن الـــ ............... بنى ادم دوات ، مطلع عين امى من الصبح ، وبيدوخنى ابن الثقيله على ما يدينى ختة خيارايه.
الكلب : ياعم نفضله ، ما كانتشى ختة خيارايه دى اللى هيذلك عليها.
الفيل : جعان يا كلب ، والعالم بتوع الجنينه دول ولاد جعانه ، بياخدوا الفلوس اللى بتتصرفلنا علشان الاكل بتاعنا من الحكومه ، وبيقسموها مع بعض وبياكلوا هما ، ويقولوا كفايه الزوار بتأكلهم.
الكلب: ومين سمعك ، بعد ما جابونى من اخر بلاد العالم ، ووعدونى هناك انى مسافر الخليج ، اذ بيا افاجأ انى روحت مصر. عااااااااااااااااااااااااااووووو.
الفيل : نفس الكلام وحياتك ، قعدوا يقولولى هنوديك الخليج هنوديك الخليج ، وهتاكل احلى كبسه وهتشرب احسن قهوه عربى ، وادينى اهه مرمى جنبك ، ماليش صاحب. وخلاص عصافير بطنى بتفلفل.
الكلب: اصبر خلاص هانت كلها كام سنه ونموت ، وساعتها مشاكلنا هتتحل.
الفيل : الصـــــــــــــــــــــــــــــــبر.

وكانت دى اول مشاهد اعرف التقطها لبعض الحيوانات بواسطة الجهاز الجديد اللى صنعته اسم النبى حارسها وصاينها الست جوجل.

والى لقاء اخر فى مشهد تانى من مشاهد اخوانا الحيوانات. ان كان لنا عمر والجهاز ما باظشى منى.


كان معكم ويكا من فوق سطوح بيتنا وجنينة الحيوانات بالكااااااااااااااااااهره.
وااعدوا بالعافيه

هناك 10 تعليقات:

ايه رايك يقول...

حلوه
حلوه اوي بجد
مش عيب عليك تتكلم علي الحيوانات وانت مش عارف الفيل بياكل ايه
الفيل بياكل جزر وخس
مش بياكل خياره

العلم نور صحيح ياولاد
والجهل ضالمه
ههههههههههههههههههه

غير معرف يقول...

هههههههههههههههه
يا خرابى بجد
مفضلش الا الحيوانات ونعرف رأيهم فينا
المشاهد مضحكه بجد
بوست جميل
دمت فى حفظ الرحمن

ويكا يقول...

ايه رايك

شكلك اساسا معرفتنا هتيجى عليا بخساره يا بنت انتى .
مره عايزانى اقول كلام يودى فى داهيه ، ومره عايزه توقعينى فى الفيل .
لاااااااااااا
لابد من ان اااخذ بتارى منكى مقدماص تحسباً ، لاى اعمال بهلوانيه توقيعيه منك.

لازم اعمل فيكى مقلب ، بس يا ترى ايييييه ؟؟؟؟
ايه يا واد يا ويكا ايه؟!!!!

عموما ، انتى هتروحى منى فييين ، انا وراكى.

هههههههههههههههه

وبعدين هي اسمها الجهل (ضالمه)
ضالمه
فكرتينى بكلمة "بامانه" بتاعت احمد ىالسقا فى فيلم صعيدى لما خلف قاله بامانه.

"ضالمه"

هههههههههههههه

اللى يخش عش الدبابير يا قمر بقى .
هههههههه (وش مطلع لسان كبييييييير).

ويكا يقول...

الحب الجميل

انا قلتلك يا حجه ان انتى اللى جميله اوى بجد ، شكلك مش مصدقانى.

طب احلفلك بايه؟!!!

قوليلى وانا احلف.

طب اقولك ، خدى بالك كده انتى دايما فى تعليقاتك بتكررى كلمة "جميله" فعلا ولا لاء؟!!

مش قلتلك انك جميله.

اوعى تتأخرى فى اى تعليق ، ودمتى فى حفظ رب العباد

mrmr يقول...

يا خراااااابى يا جدعااااااااان
طبعا لازم تعرف اللغه كويس
ما انت قاعد فوق السطوح بتراقب الخرفان
والكلاب والبط وكمان بتلف ودور فى جنينه الحيوانات
طيب شايف الفيل عينه ح تطلع على الخياره اديله واحده ينوبك فيه ثواب
بالرغم من ان الفيل مش بياكل خيار
ده مع احترامى يعنى لمعلوماتك

بس بجد بوست جميل استمتعت بيه كلوا تهيس فى تهيس

ربا يسعدك وتهيس كمان وكمان

ويكا يقول...

مرمر

كل يوم من ده.

هههههههههههه
وبعدين انتى ما اخديش بالك ، ده فعلا شركة جوجل بتقول انهم عملوا جهاز بيترجم لغة الحيوانات.

ده حقيقى مش تهييس

ادخلى على اليوتيوب وشوفى

زهرة(جنى)الاسلام يقول...

السلام عليكم
ههههههههههههههه
بجد حلوة
لكن فى قصة تانية
كان مبارك بيسكت شعبة ازاى هايسكت الحيوانات
مهما كمان هايقفوا معانا فى الانتخابات

ويكا يقول...

معانا ؟!!!
مين معانا دى ؟!!!
لا ياختى انا ماليش فيه

انا معاهم

ههههههههههههههه

ايوه
انا معاهم ، وانا بكرر اهه، خلينا فى المضمون يا حجه.

الراجل ده واكلها واكلها ، هو ولا ابنه ولا حتى بنته.

لكى وحشه ياحجه
نورتى

Sameh Ezzat - (خواطر خاطر) يقول...

ترجمه اصوات الحيوانات .. ماشاء الله
.. بس انتا استطاعت بجداره التفوق علي جوجل .

faroukfahmy يقول...

سعدن للغلية بهذا الموضوع ونرجو منك المزيد زالمزيد

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...