الأربعاء، 1 سبتمبر، 2010

خايفين




خايفين
بنهرب من قلوبنا ...
بنهرب من عيونا ....
مش عارفين فين رايحين .....
وتاخدنا الدنيا تلف بينا .....
نهرب منها تلاقينا ......
على طول تايهين ....
خايفين .......

بندور على شئ يبعدنا .....
عن زعلنا وغيرتنا ......

خايفين ....... تايهين

بنتقابل ونهرب .....
بنتكلم ونغضب .....
وعلى طووووول راضين .....
عاشقين .......

تايهين .....مش شايفين ......

لفين بتاخدنا دنيتنا ...... مش عارفين ....

خايفين ........
تايهين ....... ضايعين .......

احلامنا اوى بسيطه .....
ومش عارفين ازاى نحققها .....
لكن عارفين اننا فى يوم هنتلاقى ......
وهنجرى ونتشاقى ..... وهنقوم ونصحى ....
على احلى حاضر وذكرى ..... ومن تانى
هنفرح باحلى سنين .....
وسنين.

.......................
بنهرب من خوفنا لجوفنا .....
وندور على شئ يسعدنا .....
ماحنا يدوب عرفنا .... وشايفين .....
احلى قصة حب فى حياتنا ......
وفيها هتبقى كل ذكرياتنا .....
بدأت من دقيقتين ......
خايفين ........
من زعلنا وخصامنا ......
من كل شئ بيتعبنا ..... وبيبعدنا .....
بعيد مع ناس تانين .....
ضايعين .... تايهين .......

هناك 20 تعليقًا:

الحب الجميل يقول...

جميلة اوى يا ويكا
الحمد لله أنا أحسن كتير
ومرسيى على السؤال
متحرمش منكم

mrmr يقول...

ايه يا عم الشعر اللى بيقع منك ده
مشاعر جميله متلخبطه مش عارفه
حاسه انه كوكتيل مشاعر

خايف وتايه وراضى وعاشق وضايع

لكن عارف كويس

شئ جميل انك عارف وواثق
(( لكن عارفين اننا فى يوم هنتلاقى . وهنجرى ونتشاقى . وهنقوم ونصحى . على احلى حاضر وذكرى .. ومن تانى هنفرح باحلى سنين .. وسنين. )))
ثقه جامده جدا

عجبنى قولك
بنهرب من خوفنا لجوفنا .. وندور على شئ يسعدنا

ربنا يسعدك يا ويكا ويفرح قلبك

موجة يقول...

لاء بجد جميله اووووى
تسلم ايدك
خد دووول يفتحو نفسك الاول:

-عجبتنى اوووى خوفهم على حبهم اللى بدا بقاله دقيتين
دليل على قوة الحب اللى عمرة قصير ده
-وعجبتنى برضو انهم عارفين برغم خوفهم هيقومو ويصحو يجرو ويتشاقو ويعيشو نع بعض احلى سنين

بجد جميله تسلم افكارك

خد عندك دووول بقى وجاوب عليهم :
بت رخمة اووى ومبتبطلش اسئلة وفضوليه وغلسة
-معلشى استحمل ياعم الحج
-هم مين دووول اللى خايفين؟؟؟
اصل انا كمان خايفة
صحيح فى على راس المدونة بتاعتك //
يكتبها / م. وئام النجار
؟؟؟؟؟؟
!!!!!!!!!!!
ويكا هو وئام ولا ايه
؟؟؟؟

ويكا يقول...

الحب الجميل

ما انا قلتلك انتى اجمل. :)

ربنا يكرمك يارب وتقومى بالف سلامه وصحه.

ويكا يقول...

مرمر

مفيش فايده ، هنفضل عم نتمألس على بعضينا كده كتير لحين ما يتلم علينا البلودر كله.
بس بتعرفى ، هو فعلا زى ما انتى حسيتى .
وزى ما جلتى تمام ، وعلى فكره
انا كمان عادبنى نفس المقاطع فيه.

:)

ويكا يقول...

موجه

ههههههههههه

يا بت انتى انا مابفهمشى منك حاجه.

ههههههههههههههه

انتى مشكله.

بس عموما ، الكلام اللى جاى ده محاوله منى انى اجاوب اللى مش فاهمه ده.
هما مين اللى خايفين : حلفتك بالله يا شيخه لو عرفتى ابقى قوليلى .
ويكا هو وئام فعلا مع بعض الاختلافات


الفرق الرئيسى اوى بينهم : ان ويكا حر شويه ، ممكن يحب فى اى وقت ، يتحب ، يبعد ، يقرب ، يتخانق ، يتهور ، يرمى طوب ، او يلمه تانى.

واحد على راحته شويه ، دمه خفيف وصريح ، وما بيخافش. (وئام بقى ..... اجدع من كده طبعا، هههههههههههههه ) اذا كان ده ويكا يبقى وئام ايه يعنى ، اكيد اجدع.

هههههههههه

انتى عارفه المره دى كانت سماح وكتبتلك اجابه واضحه.

المره اللى جايه لو ما فهمتش منك حاجه تانى ، ابقى قابلينى لو فمتى انتى منى اى حاجه بعد كده.


سلام يا موج

موجة يقول...

طب معلش
مش هغلس تانى واسال اساله مش مفهومة
بس انا كده لما بكون مش فاهمة مش بعرف افهم
هههههههههههههههه
خلاص بقى متزهقش كده

الحب الجميل يقول...

أعلق بقا يا ويكا

أنبارح قريت البوست وعجبنى كتير بس مكنتش قادرة أعلق تعليق يليق بالكلام

خايفين ومش عارفين لأمتى هنهرب وهروبنا هيوصلنا لحد فين ..... ؟؟

بندور وتايهين ... ومن الخوف بنبعد

دنيا كبيره وبحورها واسعة وأحلامنا بسيطه
الموت أهون بكتير من البعد والحنين

تستكترها علينا ... ونخاف ونتوه فى شوارعها ونضيع
أحلام أسكترتها وموتتها فى قلوب الملايين
فهمت حاجه ؟؟؟؟؟
بجد كلام عجبنى وكلة أحساس ومش أى حد يفهم عمقة
ربنا يبارك فيك
وفى كلامك الدميل
يووووووه أقصد الجميل
هههههه

دمت بخير

mrmr يقول...

السيد الاستاذ الفاضل ويكا
لك دعوه موجه اليك فى شباب على طول
وهذا للعلم

ويكا يقول...

موجه

"بس انا كده لما بكون مش فاهمة مش بعرف افهم"

ههههههههههههههه

والله العظيم انتى عثل .

وبعدين انتى شكلك مالكيش فى الغتاته اساساً يا بنتى ، دا انتى من اول غتاته منى استسلمتى على طول اهه ، وقولتى حرمت.

لا يا ستى اسالى براحتك.

(وما تخافيش اطمنى).

ويكا يقول...

الحب الجميل

طب عليا البتاع بالتلاته ..... انتى يا بنتى اللى جميييييييله.

ههههههههههه

عارفه يا حب احلى حاجه فيكى ايه ، زى ما قلتلك قبل كده .

"جميله" :)
ده غير حاجات تانيه برده كتيره يعنى.
ههههههه

ويكا يقول...

مرمر

دعوه ؟!!!

يعنى هناكل ؟!!

هيييييييييييييييييه.

فريره انا جاى دلوقتى حالاً ، استنونى.

Ramy يقول...

عارف يا ويكا

اللى انت كاتبه جميل

انت عارف انا كان المفروض ارد من الصبح

بس حصل ظرووف

و كمان انا شوفت حاجة مش عارف ازاى بعد اللى شفته و اللى عرفته لأول مرة

انى اتواصل مع الناس تانى

لأنى بجد بقيت خايف

خايف بمعنى الكلمة

بس مش على نفسى صدقنى انا الحمد لله مفيش حاجة تقدر تخوفنى على وجه الأرض

بس خايف على اللى ممكن يحصل

طبعا انت مش فاهم بس مش هأقدر اوضح اى حاجة

ربنا يوفقك

سلام

ويكا يقول...

رامى

انت بوظت اعصابى
بجد والله

فيه ايه يبنى؟!!

ياريت تقولى فى تعليق مش للنشر حتى.

يا اما تدخل تكلمنى دلوقتى حالا ،على
الايميل ده
wekaanteka@yahoo.com

Noha Saleh يقول...

جميلة اوى كلماتك
بسيطة ومعانيها حلوة
فعلا جميلة اوى

عمرو يسرى يقول...

جميله كلاماتك وبسيطه وفيها احساس جميل

دموع القمر يقول...

ايه ياعم الجمال دا
الله اكبر عليا
انا مش بحسد انا بقر بس

ALHBALABADY يقول...

لك مستقبل باهر فى الشعر

كل سنه وانت طيب

كيــــــــــــارا يقول...

انت خوفتني انا شخصيا :)

********
احلامنا اوى بسيطه .....
ومش عارفين ازاى نحققها .....
لكن عارفين اننا فى يوم هنتلاقى ......
وهنجرى ونتشاقى ..... وهنقوم ونصحى ....
على احلى حاضر وذكرى ..... ومن تانى
هنفرح باحلى سنين .....
وسنين.

عجبني اوي الكلام دا حسيته جدا

الانسة سوستة يقول...

احلامنا اوى بسيطه .....
ومش عارفين ازاى نحققها .....
لكن عارفين اننا فى يوم هنتلاقى ......
وهنجرى ونتشاقى ..... وهنقوم ونصحى ....
على احلى حاضر وذكرى ..... ومن تانى
هنفرح باحلى سنين .....
وسنين.

لمستنى اوى الحتة دى
قريت كام بوست فى المدونة ودخلت دماغى جدا على فكرة ..............هروح اكمل قرايتها بقى

Related Posts Plugin for WordPress, Blogger...