الثلاثاء، 14 سبتمبر 2010

نجاوبوا وامرنا لله


بالرغم من انى ما كنتش أكره فى حياتى اكتر من الواجب وعمايله ......
او المذاكره عموماً ...... لانها واجب برده
وبالرغم من محاولاتى الفاشله .... انى احسس نفسى ان ده مش واجب ...... الا انى خلاص هضطر اجاوب الاسئله اللى تم اعادة توجيهها ليا من الست مرمر (صاحبة مدونة شباب على طول ) ومؤخراً برده من الريس (صاحب مدونة انا الريس) وامرى لله .......
وخوفاً من اى نوع من انواع العقاب اللى ما اعرفشى ممكن يبقى ايه بالظبط ....... فيبقى نلم الدور ونجاوب افضل .....
بس قبل ما ابدأ ، فيه موقف حصل دلوقتى حالاً وانا بكتب دلوقتى..... كوميدى جداً .... بس فى طياته معانى كتيره اوى مش وقت الحديث فيها ..... نتكلم فيها بعدين ..... لكنى لازم احكيهولكم ، وما حدش يبلغ ابطاله انى شردتلهم لاحسن اتحبس.
الموقف :
بفرج والدى وولدتى مشهد على اليوتيوب عن ملك دوله من الدول او رئيسها ..... (فيديو خيبه شويه كالعاده) ، فوالدتى علقت عليه وعلى رئيس تانى كده كلنا عارفينه تعليق مش اوى .... فوالدى رد وقال .... هو مش كده غيبه برده ؟!!
فانا جاوبته على طول : اه طبعاً .....
ترد والدتى بمنتهى الطيبه والدهشه الحقيقيين وتقول : ايه ده .... حتى الرئيس ؟!! (تقصد ان هو الرئيس الكلام عنه كمان تبقى غيبه ؟!!!!)
ههههههههههههههه
واضح اننا فى مصر اتعودنا ان من اهم وظائف الرئيس بتاعنا انه بما انه الريس (بتاعنا ) يبقى عادى يعنى مهو الريس ومباح اننا نشتمه مش بتاعنا.
هههههه
نرجع بقى لموضوعنا :
الاسئله :
1. من أرسل لك الدعوة ؟
مرمر (صاحبة مدونة شباب على طول ) + مستر بريزيدنت صاحب مدونة (انا الريس)

2. ما هي كتب الطفولة التي بقيت عالقة في ذاكرتك؟
والله يا جماعه ، انا افتكر ان كان فيه مجله او كتاب او حاجه كده مش عارف ايه هى كانت تسمى (بم بم ) ، بتاعت اللبان دى ..... غالباً دى كانت قصص على شكل مسابقه ...... مش عارف بصراحه ، بس انا فاكر بم بم دى. لانها كانت لذيذه جداً.

3. مَنْ أهم الكتاب الذين قرأتَ لهم ؟
اهم الكتاااااب ، اهم الكتاااااااب ، والله ما انا فاكر ..... بس بوجه عام اللى على بالى دلوقتى هو:
طبعاً (نبيل فاروق) سلسلة ادهم صبرى اغلبها ان لم تكن كلها – (والشياطين الـ 13) ، مش فاكر مين التلتاشر دول بس فاكر انها كانت حلوه برده.
(ديل كارنيجى) - (شريف عرفه) قريتله كتاب فى البرمجه العصبيه كان جميل جدا بصراحه.
(يوسف معاطى) برده بحب اقراله كتير جداً ، كوميدى ساخر، بس بيعجبنى اوى لاسباب كتيره اهمها الكوميديا وثانيها اشياء اخرى كتيره بين طيات سطوره.
(انيس منصور) كنت دايما اقرا العمود بتاعه فى الاهرام او الاخبار مش فاكر .... بس متهيقلى الاهرام.

4. من هم الكتاب الذين قررت ألا تقرأ لهم مجددا؟
بعض المدونين والصحفيين اذا اعتبرناهم كتاب . والسبب بسيط جداً ، الا وهو انهم اعتقدوا انهم فعلا كتاب ..... كما انهم اعتقدوا ايضأ بكامل حرية الكتابه والتعبير فحادوا عن الصواب وتركوا لخيالهم ولشياطينهم العنان ان يكتبوا ما تمليه عليهم نفوسهم المريضه ، فافسدوا الذوق العام ، وتسببوا فى فتح ابواب لن تغلق الا بغلق ارواح بشر اذا ما حاولت اغلاقها.
(ملحوظه هنا : انا لا اعنى اى احد قريب منى او ادخل اقرأ له باستمرار حتى ولو لم يعجبنى بعض مقالاته ، بل اعنى من توقفت تماما عنهم ومن اول وهله)
5.في صحراء قاحلة ، أي الكتب تحمل معك؟

بما ان السؤال كتب مش كتاب ، فان الجواب هيبقى :
(القرآن) ، اولاً بما انها هتبقى محنه بقى واحنا ما بنعرفشى ربنا او القرآن الا فى المحن (الا قليل من عباد الله الشكورين)، ثانياً لانه فعلا هيبقى خير معين وحافظ.
ثم اكيد كتاب فكاهى علشان يطرى على قلبى شويه من اللى هشوفه. وروايه او روايتين ، من الادب العالمى ، لاحسن انا بيجيلى شلل من اغلب الروايات العربيه بصراحه.
6. ما هو الكاتب الذي لم تقرأ له أبدا ، وتتمنى قراءة كتبه ؟

والله كتير ، وهتستغربوا الاسماء اللى انا هكتبها دلوقتى وهتقولولى امال انت قريت ايه؟! هقولكم ما انا عايز اقراهم اهوه ..... J
جاهين – صلاح عبد الصبور – احسان عبد القدوس – عبدالوهاب مطاوع ، يوسف ادريس.
سؤالين مهمين .
السؤال الاول : هل انا معجب بهم ولم تتسنى لى الفرصه انى اقرأ لهم.
الاجابه : ابسلوتلى ....... انا ما اعرفشى ذوقهم واسلوبهم هيمشى معايا ولا لاء ..... ( طبعاً لان كل واحد له اسلوب معين بيحبه) ... لكن كل ما فى الموضوع ، انا كل ما اقرا لواحد او اشوف البروفايل بتاع حد او اتناقش مع اى سين من الناس ، الاقيه بيقولى الاسماء دى وكأنهم انبياء ، فانا عايز اشوف ايه الحكايه ، وهل انا فاتنى شئ مهم للدرجه دى ولا ايه؟!!!!
السؤال التانى : طب وايه اللى خلاك ما قرأتش لهم لغاية دلوقتى؟!
الاجابه: والله يا عم الحج كل ما اروح مكتبه وامسك كتاب لحد فيهم ، اتخض ونفسى تتسد ، اصلى مش بحب الكتب اللى بحس انها دش كتير اوى دى. (ياعم انا كنت بذاكر بطلوع الروح). هى ناقصه.

7. ما هي قائمة كتبك المفضلة ؟
السؤال عن المفضله مش اللى قريتها صح؟
عموماً والله كتير بس مش فاكر شئ منها بس استنوا هفتكر اللى يجي على بالى وبدأت اقرأ فيهم مؤخراً :
كتب كتيره ليوسف معاطى – كتاب (لماذا كل من حولك اغبياء) لشريف عرفه ..... ههههه ..... هتضحكوا .... بس صدقونى اغلبنا مقتنع بكده فعلاً فلازم نقراه ...... – كتاب (دع القلق وأبدأ الحياه) لـ ديل كارنيجى ، وانا انصح الجميع بقرأته فهو مصدر كل الكتب الحديثه التى تتعامل مع النفس البشريه وكيفية الاستمتاع بالحياه والنجاح والتعامل مع الاخرين. – بدأت فى كتاب (كيف تكسب الاصدقاء وتؤثر فيمن حولك ) ايضاً لـ ديل كارنيجى لانه عاجبنى جدا لكن توقفت من فتره طويله ، لانها مش طلبه اوى معايا اكسب اى اصدقاء ، كفايه اللى بشوفه. – كتاب (لاتحزن) لـ عائض القرنى ، قرأت فيه شويه ، وتوقفت ، بس برده يبقى غلطان اللى ما يحتفظشى بنسخه من الكتاب ده عنده ، لانك لو زعلان افتح اى صفحه فى الكتاب ده ، اى صفحه صدقنى عشوائيه ، اقرأها وشوف ايه اللى هيحصلك –
مجموعه لا بأس بها من الروايات العالميه ، وشكسبير ...... بجد رائعه ....
...... امممممم ايه تااانى ؟ مش فاكر والله ...... لو افتكرت وانا بكتب دلوقتى هرجع واكتب تانى .
8. ما هي الكتب التي تقرؤها الآن ؟
حالياً ......... امممممممم ...... متهيقلى انا متوقف بقالى اكتر من شهر ...... الاجابه : (مفيش).
9. أرسل الدعوة لأربعة مدونين من أجل مشاركتنا بذكرياتهم مع القراءة ؟

هطلع ندل وابوظ الفكره ، ومش هبعتها لحد ، ههههههههههههههههههههههههه
اصل بصراحه اغلب اصحابى اللى انا عايز افرودهالهم اندال ومش هيجاوبوه ، وهيبقى شكلى وحش. فبالتالى وليه ، انا اطلع بكرامتى افضل.
وبعدين اصل كمان (الريس) صاحب مدونة انا الريس قايم بدور جامد اوى ، وباعتها لناس كتير ، فاكيد هيجوا فى السكه .
شكراً لمرمر اوى وللريس ، اللى عملوا فيا العامله دى .

هناك 8 تعليقات:

Ramy يقول...

يا سيدى يا سيدى (:

بجد والدتك عتدها حق

(:

هو كمان الريس مش هنعرف نتفش فيه (:

بس أنا من موقعى هذا

أحب أقولك أُحيك على صراحتك الجميلة جدا

بس بم بم يبقى كتاب

لن أغفر لك هذا اللبان (:

هههههههههههههه

دة كان البوم يا ويكا يا خويا

(:

لكن ان شاء الله هأشترى دع القلق و أبدأ الحياة

تاج جميل يا ويكا (:

مش عارف ليه كان عندى احساس ان انت كنت هتندل و مش هتكتبه

بس كل مخاوفى طلعت كدب (:

بالتوفيق دايما يا ويكا ربنا معاك

mrmr يقول...

الريس ده مش بنى ادام
يبقى عيب بجد اللى بتعملوه
يا سيدى عيب دى نميمه وربنا ح يجاسبكم

اما بخصوص النداله فهو كان فعلا يا رامى ناوى يطلع ندل بس لولا ما جات الدعوه من الكبير قوى اللى ميقدرش يرفض طلبه دا الريس بحاله انت عايزه يعتقل ولا يوديه ورا الشمس

اما بقى يا ويكا بخصوص الواجب فانت طلعت عندك ذاكره احس منى تصدق انا برضه كنت بجيب مجله بم بم ولا الالبوم البان ونلصق يا عمنا الصور فيه ياااااااه يا ويكا فكرتنى بحاجات كتير كنت نسياها
اعمل ايه فى الزهيمر اللى تعبنى

شاطر شاطر شاطر يا ويكا يا شاطر
علشان حليت الواجب باكو لبان هديه منى ليك
تصبح على خير
ربنا يفرح قلبك

ستيتة يقول...

ضحكتني يا ويكا اضحك الله سنك
بم بم؟
ههههههههههههههههههههههه
انا بكره الواجبات دي عمى
ورامي بعته لي وكل شوية يقول لي انا مش ناسي
عاااااااااااااااااا
يارب رامي ينسى علشان معملش الواجب يارب :)

تحياتي

ويكا يقول...

رامى

ايه ده هو بم بم كان البوم ؟!!
بس عموما الالبوم كان بالنسبالى اجدع من الكتاب لانى فاكر انى كنت بلزق فيه حاجات كتير كده.
وانا اظن ان اسهم كثيراً فى عبقريتى الحاليه ، ههههههه.

لازم تشترى دع القلق ، لاااازم

اما بالنسبه للنداله ، يبنى هى دى اساس مشكلتى وعيب ، انى لا اجيد الى الان موضوع النداله ده .

نفسى اتعلمه بس مش عارف والله.

ويكا يقول...

مرمر

انا هسيبك لضميرك يعذبك ، اكيد قريتى الكلام اللى سيبتهولك ، واكيد ضميرك بيعذبك دلوقتى .

ولن اغفر لكى ، ولن اترك حقى فى اللبان ايضاً.

ويكا يقول...

د. ستيته

اولاً
انا ليا سندوتش كده عندك لانى ضحكتك وانتى كنتى متنرفزه وزعلانه فى البوست الاخير ده.
وبعدين
اه بم بم .

طب والله العظيم انتوا ما انتوا عارفين حاجه ، يا اخوانا والله العظيم ايام زمان كان التعليم ممتع لغاية مرحلة الاعدادى وبعد كده قفلوا تانى عليه .
وكان فيه تنافس وتركيز بين الشركات على جودة التعليم وكفاءته.

يعنى لو تفتكروا ، الكراسات اللى كانوا بيسليموهالنا ، كنتوا دايماً لازم تلاقوا على دهرها الارشادات ، والنصائح. لو تفتكروها كانت جيده جدا بحق.
الكتب وامل وعمر دخلوا الفصل عملوا عمايل ما تحصلش ، قومى ياماما صلى العصر ، قبل ما بابا يجى من مصر .

ههههههه
كان فيه عيب العمايل الوحشه من امل وعمر . وكان فيه صلاة عصر.

الشركات كانت كل انواع دعاياها منصبه على التعليم برده ، وعلى سبيل المثال بم بم ده فعلا .

انتوا متخيلين ازاى طفل عنده خمس سنين او اربعه يروح يشترى اللبان مخصوص علشان يقعد يلصق صور يكمل بيها قصه . او شخصيات.
انا مش فاكر الالبوم كان فيه ايه ، لكن فاكر ان ده ما اول اهتماماتى اللى تفاعلت فيها مع شئ قصصى.

غير معرف يقول...

هههههههه
بم بم
كان البوم صور يا عمونا
كنت بجيبه واجيب اللبان وافتحها والزق الصورررررر
واللى يكمل الالبوم يكسب....
كانت ايام جميله فعلا
أما بالنسبه للواجبات زماااااان كنت أول ما اروح افضل مفتحة عنيه لغاية ما كم الواجبات تخلص
كنت بخاااااااااااااف أوى
لا مش أوى
مووووووووت
الأ أضرب
هههههههههه
باين عليا أنا كدا طلعت ندله
اربعه بعتولى الدعوة وانا مندلة لغاية دلوقتى
مبروك عليك الواجب
عقبال ما أحله بقا
ادعيلى....

Kiara يقول...

مامتك دي ثكر :)

اعتقد ان فترة الطفولة فيها حاجات كتير مشتركة عند اغلبنا :)

استمتعت باعترافاتك :)

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...