الاثنين، 18 أكتوبر، 2010

بيـــت المدونيــــن + تحديث ..... إختار معانا شعار بيت المدونين





تعالوا نختار مع بعض او نقترح الشعار بتاعنا  اضغط هنا

الفكره بكل بساطه     بيت المدونين

اننا هنجمع اكبر قدر من المدونات المصريه والعربيه وهنقسمها على حسب نوعها او توجهها (ساخر - سياسى - عام - منوع - دينى .....)

وده طبعاً بشكل مبدئى لغاية ما ننسق مع صاحب كل مدونه على حسب رأيه هو فى مدونته بيعتبرها ايه ........

اما مكان البوست هنحاول على قد ما نقدر نخليه خاص بس لاخبار المدونين ........ يعنى البوستات هناك هتبقى اخبار المدونين او التدوين بشكل عام ...... (اعلان تجمع تدوينى - اعلان عزومة عشى واحد ابن حلال عاملهالنا ...... مش مائدة رحمن طبعاً ..... انا اقصد عشى عشى يعنى ...... هوبر ...... :))

واحد اتجوز للاسف ....... واحد طلق والحمد لله ....... كده يعنى .....

عيد ميلاد نلم هدايا لصاحب عيد الميلاد ...... ونقسمها معاه ........

من الاخر مكان نتلم فيه وكل الناس تتابع كل الناس من خلاله ....... اللى يعرف خبر اكيد عن حد وعايز يشردله مفيش مانع ..... الا لو صاحب الخبر نفسه مش عايزه يتنشر ..... بس كله بحسابه يا معلم  :) .........


من الاخر بيت المدونين هيبقى ان شاء الله بمثابة لوحة الاعلانات بتاعتنا كلنا اللى بنعرف فيها كل حاجه عن بعض ........

هيشرف عليها فريق عمل بسيط ...... بدأ بيا .... وان شاء الله الحب الجميل ......... ,  وانا بطالبها تتصرف وتعملنا شعار جميل لها بحيث كلنا نحطها عندنا فى مدوناتنا.وباقى الفريق هيكتمل اول بأول ان شاء الله

وبطلب من كل المدونين اللى عنده فكره او اللى ممكن يبقى من فريق العمل ، ما يبخلشى علينا بالاشتراك والتواصل معانا.

المدونه لسه بتبتدى ومش فى شكلها النهائى ، يعنى عايزين نعملها مع بعض .
منتظرين اقتراحاتكم.

سلام يا جدعااااااااااااااان

هناك 19 تعليقًا:

قلــ"بـــلال"ــــــب فارس يقول...

معاااااااك

ويكا يقول...

قلب فارس

ادينى العنوان والتصنيف (دينى - سياسى .....)

mrmr يقول...

تم يا فندم
انا جايه اسلم نفسى من غير ضرب نار
وسلام كبير قوى قوى للسيد ويكا صاحب الفكره الجهنميه
يعطيك العافيه
واقعد بالعافيه برضه

sony2000 يقول...

معاااااااااااااااااكو:)
بسلم نفسي من دلوقتي اهو

محمد التركى يقول...

السلامو عليكم

معاك ياعم ويكا معاك

والنبى ماتسبونى لوحدى
خدونى معاكم


فكره تجنن
ربنا يسهل وتخدونى معاكم


تحياتى للأفكار الجهنميه

محمــــد التركـــى

بت خيخة وأي كلام يقول...

الله يا ويكا
حلوة الصورة اوي اللى انت حاططها مع البوست
اجمل ما فيها صورة الولد اللى على اليمين
اللى شعره اصفر و لابس شورت ازرق وتى شيرت اخضر مقلم وجزمة حمرا
اصل البامبينو ده فيه شبه كبير من ابني


سلام

اختك خيخة

بت خيخة وأي كلام يقول...

معلش ممكن اقول حاجة تانية

هى الصورة حلوة جدا
واللى فهمته من كلامك ان الصورة دى هاتكون شعار مؤقت لبيت المدونين

وكويس انها شعار مؤقت لان رغم انها صورة جميلة جداااااا
الا انها طفولية جدا

الصورة مش لايقة مع فكرة المدونة اللى انت بصدد انشائها

الصورة تليق اكتر مع مدونة خاصة للاطفال


و رغم ان الصورة مش لايقة _من وجهة نظرى_ الا انى عايزة اسجل اعجابى الشديد بيها
لانها حلوة جدا وبريئة جدا

بس خلاص

سلام

اختك خيخة

Noha Saleh يقول...

معاكم من غير كلام
فكرة هابلة جدااااااااا
ده لينك مدونتى:
http://kalamfaddy2.blogspot.com/

وتصنيفها ممكن يكون عام

Noha Saleh يقول...

انا علقت بس مش عارفة التعليق وصل ولا ايه...هعلق تانى
انا معاكم
فكرة هايلة

يوميات شحات يقول...

فكرة جلوة و يا ريت تضيفوني معاكوا

الحب الجميل يقول...

بت خيخه
وصورة البنت اللى على الشمال اللى لبسه فستان بينك وجذمه حمرا حلوووة اوى برضو
بتفكرنى ببنتى برضو
اصلى انا اللى مختاراها مش ويكا

وياريت لو عندك صورة حلوة تبعتهالى ونشوف ونختار الأحسن
ولا إية رأيك ؟؟؟
وزى ما قولتلى انه شعار مؤقت ولو كنتى كلفتى نفسك ووصلتى لحد مدونة بيت المدونين كنتى شفتى صورة المدونه التانيه واختارتى معانا ؟؟؟
صباحك فل

richardCatheart يقول...

حلوه الصوره

مبروك على البلوج الجديد

ربنا يكلل مجهدكم بالخير

منار يقول...

طيب حضرتك انا معنديش مدونة
و الفكرة عجبتنى وعايزة اكون معاكم
لازم يكون عندى مدونة علشان اشترك؟

ويكا يقول...

منار

لا مش لازم ابداً ، اولاً انتى ممكن تشتركى باكتر من طريقه:
1. بأفكار جديده.
2. لو بتجيدى شئ معين زى الرسم التصميم ، اى شئ ممكن يستخدم فى المدونه ، هنبقى اكيد مبسوطين برده.
3. تعليقى وتواجدك معانا طول الوقت

ويكا يقول...

يا رداااااله

ياردااااااله

تم اضافة الدميع ، وكل واحد يروح البيت الكبير (بيت المدونين ) ويشوف تصنيفه صح كده ولا لاء ، وكمان يشارك فى اختيار الشعار الجديد

منار يقول...

هى المدونة الجديدة دى علشان بس تنشرو فيها الببوستات الجديدة عند باقى المدونين
ولا علشان تنشرو اخبارهم؟

هو انا ينفع اضيف حضرتك عندى على الماسينجر؟

ويكا يقول...

الاتنين يا منار :)

موناليزا يقول...

قرأت الموضوع اول ماحضرتك نزلته والفكرة جميلة طبعا
بس بصراحة انا مش فاهمة ايه المطلوب بالظبط
وخصوصا ان المدونات اللى بتكون من النوع ده ماحدش بيهتم يدخلها
فيه موقع اسمه بيت المدونات العربية
http://www.tadwina.com/
فيها تقريبا نفس الفكرة

Tears يقول...

فكرة لطيفة

Related Posts Plugin for WordPress, Blogger...