الخميس، 4 نوفمبر 2010

كل اختياراتى كانت صح ..... بس للاسف


الشويه اللى جايين دووول تقدروا تقولوا فرفشه ... فضفضه ...... سموها اللى تسموه .......

كل اختياراتى كانت صح ..... بس للاسف مش عجبانى .....
مخنوق وبدراى ..... ومش قادر ادارى .....
محتار ....
تعبـــــــــــــــان .......
جداً تعبان ......
فيه ناس مفكرانى زعلان منهم ...... وناس مفكرانى بهرب من مواجهتهم .....
وناس شيفانى بضحك .... وبيقول ده اكيد مش زعلان .....
وناس تانيه حاجات كتير تانيه ......
لكن ماحدش منهم فاهم ..... انهم مالهومشى دعوه ......
المشكله عندى .....
المشكله فى قلبى ......
حقيقى تعبان .....
ومحتار .... لحد الجنون .............
محتار فى كل شئ ......
مش قادر اخد قرار ......
لان كل القرارت تؤدى الى ...... الالم ....
كلها هتوجع ناس وهتوجعنى .........
مش قادر اوجع حد ...... بس نفسى فى حاجات كتير ......
هى مش كتير اوى ....... بس مهمه اوى .......
نفسى اقدر اكتب هنا كل حاجه مديقانى بجد ...... بس ما اقدرش
مش علشان خايف ..... لاء
بس علشان ....... ما اقدرش
خقيقى تعبان ......
................. موجوع فوق ما تتخيلوا..............

وكل اللى اقدر اقولهولكم ........ ان الالم النفسى اصعب بكتير واكثر وجعاً ..... من الالم العضلى ......
بكتير ......

انا اسف ..... انا واثق انى هوجع قلوب ناس طيبه كتير .....
بس صدقونى ...... انا واثق ان فيه هنا قليلٌ من الراحه ..... الا انه مهم ......

هناك 28 تعليقًا:

غير معرف يقول...

نسميها فضفضه
عشان مينفعش نقول فرفشه
بوست جميل
تسلم ايدك
تحياتى

موناليزا يقول...

ان الالم النفسى اصعب بكتير واكثر وجعاً ..... من الالم العضلى ......
بكتير ......

قلنا كده كتير محدش صدق.. أصل محدش بيحس بالنار الا اللى ماسكها

نصيحة اخوية طلع اللى جواك فى الكتابة حتى لو مش عايز تنشره هنا اكتبه فى ورقة واحتفظ بيها عشان لما ربنا بإذن الله يخفف عنك تقرأها وتعرف قد ايه ربنا كريم

mrmr يقول...

الالم النفسى اصعب بكتير واكثر وجعاً من الالم العضلى .
صدقت قولا ...
ربنا يعدى الازمه اللى بتمر بيها على خير
قووووول يارب

richardCatheart يقول...

والله يا اخى انت للواحد وهو مش مستحمل شكه

اليومين دول الواحد فعلا مش مظوط نفسيا

مش عارفه فى ايه هى سمه الحياه دلوقتى

معلش يا ويكا اصبر يمكن الهم ينزاح ياعالم ياخى

ربنا يرح قلبك وقلوبنا ويفتحها عليك وعلينا

واحد والسلام يقول...

مفيش حد في الدنيا اختياراته كلها صح لأن اي شىء بيألمنا احنا مسئولين عنه بالكامل او جزء فيه .ممكن تعيد حساباتك وياريت تستخدم زاوية تانية للرؤية ممكن الامور تكون اوضح . بالتوفيق ان شاء الله

الـسـيـدة نـون يقول...

السلام عليكم

ماينفعش ابدا بعد ما تقول على اختياراتك انها كانت صح ... ترجع وتقول بس للأسف

ماينفعش الأسف يجى بعد اختيارات صح

الأسف بيجى على اختيار غلط

او بيجى لما تختار حاجتين متناقضتين
يمكن الاتنين مش غلط
بس حاجتين ما ينفعش تجمعهم سوا فى حياتك
ولازم تختار بينهم حاجة واحدة

فبالتالى بتبقى تعبان ومش عارف تختار منهم ايه


ممكن ترجع بذاكرتك لورا شوية
وتشوف من امتى بالظبط حالة التعب دى انت وقعت فيها

لو فيه حاجة جدت عليك
يبقى تشيل الحاجة دى وترميها وتستأصلها من حياتك

وترجع لحياتك الطبيعية دون ادنى تعب

مافيش حد بياخد كل حاجة يا وئام
ومافيش حد اختياراته كلها صح

واساسا الصح ده نسبي

اللى انت تشوفه صح
غيرك ممكن يشوفه غلط


انا حاسة ان كلامى مالهوش علاقة بالبوست
بس كلامك خنقني انا كمان

وخلانى افكر فى كل اختياراتى


ربنا يفك كربك ويفرج همك ان شاء الله


سلام

اختك خيخة

just dream يقول...

والله لسه كنت امبارح بس بتكلم فى ان المرض النفسى او حتى الاوجاع النفسيه اصعب بكتييييييير من العضوى خصوصا ان الالم النفسى محدش بيقدر يوصل لاحساسك ومدى المك غير نفسك بس
بس يمكن على أد ماهو صعب اوووى على ماأد بحسه خييير اوووى لان ربنا بس هو اللى ف ايده يهدى نفوسنا فهنا بس بتلجاه وكلك ضعف وانك مفيش حد غيره جمبك وساعتها بس لما بتحس انك قربت اوووى بتبقى كأنك مسكت الدنيا فى ايديك
ربنا يزيح عنا اى هموم ويريح قلوبنا يااارب

Ramy يقول...

صديقى و عزيزى ويكا

أنا حاسس بكل بكلمة بتقولها

عارف يعنى ان انت عاوز تقول تعبان من ايه و ايه

بس خايف تجرح حد خايف تألم حد

حاسس بصراعك مع نفسك

حاسس بقلبك اللى بيتقطع من الحيرة

حاسس بيك لم بتكون عاوز تترمى فى حضن حد علشان بس تبكى و مش عارف

صدقنى فاهم و حاسس بيك لأبعد ما تتخيل

ربنا معاك يا صحبى و يخفف ألمك

و ربنا يريحك من غربتك مع نفسك

ربنا معاك بدعيلك من كل قلبى

بس أحكى يا صديقى و لا يهمك انا بعمل كدة

ربنا معاك

Noha Saleh يقول...

من وجهة نظرنا كل اختياراتنا بتكون صح فى البداية
لكن بعد كده بنقدر نفكر احسن
انما فى المجمل مش كل اختياراتنا بتكون صح

ابراهيم رزق يقول...

حاسب من الاحزان و حاسب لها
حاسب غلى رقابيك من حبلها
راح تنتهى ولابد راح تنتهى
مش انتهت احزان من قبلها
عجبى

يأسك و صبرك بين ايديك وانت حر
تياس ما تيأس الحياة راح تمر
انا دقت من دا ومن دا عجبى لقيت
الصبر مر و برضك اليأس مر
عجبى

محدش هيحس باللى جواك يا صديقى مثلك مهما عبرت بس اوعى تستسلم لليأس او للحزن لو فى فرصة للتاجيل و النسيان المؤقت يمكن تتحل من عند ربنا او واجه الموقف بكل جدية والامل فى ربنا كريم
ربنا يفك عن كل كرب
تحياتى ابراهيم رزق

فاتيما يقول...

بص بقى
اختك فاتيما مؤمنة بشدة
بالمقولة دى


لكل بنى آدم فينا
نصيب من إسمه


و ان شاء الله
يبقالك نصيب كبييييير
من اسمك يا وئام


انا هختلف مع خيخة
لأن الصح مش دايما مبهج
والا مكنش حد غلب
و لا حد غلط
او اختار غلط
الصح دمه تقيل
رخم
واجب و قيد
مفيهوش متعة
غير ع المدى الطويل
و البعيد
و انتا و حظك
يا تطلع مبخت و تعى الحكمة
او تطلع مسكين و تعيش و تموت و انتا متعرفش ان اختيارك كان احسن حاجة ليك بالفعل و كان لازم يكون سبب سعدك مش تعاستك

تعرف ؟
اوقات احس ان كتر التفكير و التدبر
شقى و تعب
اوقات لازم تركن دماغك
و تبطل تحسبها
و تفكر
و اوقات اكتر احس انى لازم اعتبر حاجات كتير حصلت و كأنها حاجة وقعت على راسى و انا ماشية و مكنش ينفع اتجنبها بأى حال من الاحوال
فكرة التحكم فى المصير
فكرة مرعبة
شبه مستحيلة
و لو الواحد خد قرارت متصوراً انها الصح و المفروض بقى يبقى سعيد بناء عليها ....فلما يحصل العكس
تبقى قمة الاحباط
و هذا ما استشعره حاليا ف سطورك

الأنسان مخير و مسير
متقعدش توجع قلبك و دماغك كتير
ما أصابك لم يكن ليخطئك
و ما اخطئك لم يكن ليصيبك

ربنا معاك دايما

خالص ودى
و روق كدا
يا ويكا يا ويكا

ويكا يقول...

بجد متشكر جدا جدا يا جماعه والله

و اجمل شئ فعلا حصل هنا دلوقتى ، انى لقيت كل الناس فاهمه انا بقول ايه وحاسه بيا بالرغمن من انى ما قلتش اى تفاصيل
الحب الجميل ... سميها اى شئ المهم تطلع ...
موناليزا ..... من غير ما اقراها انا عارف فعلا اد ايه هو كريم .... لانها لا الاولى والاخيره اللى اعرف فيها انه كريم ... سبحانه

مرمر ..... يارب يا مرمر بجد

مارو .... فعلا وانا ملاحظ ان ناس كتير كده فعلا .....
واحد والسلام .... عندك حق .

خيخه
مش عارف اقولك ايه .... بس اكيد انتى عارفه.

قول ياااارب .... ونعم بالله

رامى .....
بس يبنى ..... انت فعلا حاسس اوى .... كل اللى اقدر اقولهولك .... "هو ده"


ابراهيم رزق
انت عارف ... لو انت صلاح جاهين نفسه .... مش هتقدر تكتب الكلام ده على اى بوست كده ويطلع ماشى معاه .... انت مين يا عم ..... مش ممكن ... الموضوع ده غريب فعلا

فاتيما
على فكره انتى كلامك مجمله مش متناقض مع كلام خيخه مع تحفظى على ان الصح مش لازم يكون مبهج .... اذاى بقى لازم يكون مبهج .... بس زى ما قولتى ممكن ما يكونشى فى ساعتها البهجه دى لكن هيبقى مبهج اكيد حتى ولو بعد زمن ....

وزى ما قولتى الانسان مسير ومخير لانه ميسر لما خلق له.

وادعيلى وادعى للجميع انهم يروقوا

همس الاحباب يقول...

ان الالم النفسى اصعب بكتير واكثر وجعاً ..... من الالم العضلى ......
متفق معك قلبا وقالبا
ربنا يفك كربك ويزيح همك
تحياتى

shimaa elkholy يقول...

انا عن نفسي عندي قناعه قويه جدا ان البوح بمكنونات الصدور هو اهم حاجه فى العلاج النفسي

فكون انت تلاقي حد فى الدنيا دي تتكلم معاه بكل حريه من غير ما تخاف او تتكسف او تضايق ده يبقى مليون الميه اهم من الطبيب النفسي

عجبنى جدااا جداا كلمتك اختيارتي صح بس مش عاجباني

عارف حضرتك انا باسمي ده والله اعلم انا فهمت صح ولا لا
باسميه ازدواجية الفكر

انت اخترت صح بمعايير مين ؟

معاييرك الشخصيه ولا معاييرك الاجتماعيه

اعتقد بمعاييرك الاجتماعيه الى هى تنتمي الى المجتمع مش لشخصك

لانك لو كنت اخترت بمعاييرك الشخصيه اعتقد انها هاتكون مرضيه لك

انا اول مره ازور مدونتك

وربنا يخفف عنك ويارب ينولك امنياتك كلها ويجعهلك فيها الخير

ويكا يقول...

همس الاحباب

شكراً يا خالد واللهم امين

ويكا يقول...

ندى الياسمين

انتى تعرفى ان التعليق بتاعك ده خلانى افكر فى حاجات كتير اوى ....

ولازلت شايف انى لازم افكر فى اجابة سؤالك ده.

شرفتينى بجد وشئ فرحنى جدا وجود حد بفكرك ده هنا معانا واتمنى انه يتكرر كتير

نهى يقول...

مدونة حلوة اوى وكلام رائع ومعبر اتمنى لكم التوفيق
صديقتكم الجديدة نهى

افروديت يقول...

متندمش علي حاجة يا وئام واصبر أو حاول تنسي انك زعلان

صدقني مش مستاهله

تحياتي ليك

افروديت يقول...

الي وئام الأنسان ..

يمكن تعليقي السابق فيه تشاؤم أونوع من الخضوع لمشاكلناوتعبنا..

بس فكر معايا ... وهتقتنع
بتقول "كل أختياراتي ...."
اختياراتك يعني قرارات وتقريبآكلهامصيرية أكيدفي جزء من قراراتك اللي هي أختياراتك كان متأثربظروفك أو ظروف اللي حواليك أوحتي ظروف مجتمع عايشين فيه طول الوقت بيجبرنا علي أتخاذقرارات وأحنا أصلآ مش راضيين عنهاأوبيهابس للأسف مضطرين غصب عننا ...

بص الموضوع ده كبير ومش سهل بس خليني أقولك لوفي قرار أخدته ولاقيت ليه سلبيات دلوقت فكر في ايجابياته دايمآ عشان تتقبل الأمر الواقع بصدرمتسع

أسفه لطول تعليقي بس حبيت اكلمك بصراحة

"كل سنة وأنت طيب"

richardCatheart يقول...

كل سنه وانت طيب ياحج مقدما ان شاء الله يتقبل الله منك ومن كل حجاج بيته الحرام

يعود عليك بالف هنا

افروديت يقول...

أنت فين ياوئام بجد ليه مش باين؟


طيب.. أناجيت أطمن عليك يارب تكون بخير وسلام

غير معرف يقول...

نقول حمد لله على السلامه يا حج ؟؟

gogo!sf يقول...

الف حمد الله على السلامه يا ويكا

والف بروك على الحج

ربنا يتقبلها ان شاء الله

جوجو

كلمات من نور يقول...

الالم النفسى اصعب بكتير واكثر وجعاً من الالم العضلى ......

إن شاء الله الحج يكون غسل القلب والعقل والنفس بروحانيات إيمانية

ويبقى التواصل

فاتيما يقول...

ويكا يا ويكا

انتا فييييين؟؟

يا رب تكون بخير
والغيبة طولت شوية
ولا انا متهيألى ؟؟؟


ربنا يطمنا عليك دايما

انا قولت اعدى
واغلس

Unknown يقول...

يبني اناا اتخنقت من العنوان ده متجتب حاجة جديدة

حد من الناس يقول...

ارجوا من سيادتك زيارتنا فى مدونتنا الجديده

http://3alamakshoof.blogspot.com/

فرأيك يهمنا

شكراً لك

ويكا يقول...

انا متشكر جدا جدا يا جماعه على اهتمامكم اللى بسطنى وريح قلبى وفرج عنى.

انا بجد متشكر جداً

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...