الأربعاء، 8 ديسمبر 2010

سؤالين

 استجابة للدعوه اللى بعتتهالى الست مرمر (الله يبارك فيها كده وتعيش وتبعت ، وما تغبشى كتير عن التدوين) للاجابه عن سؤالين مهمين قد سبق ارسالهم لها:

الاول :
هل انت ممن يحب التدخل فى شؤن الاخرين؟؟

الثانى:
وما الاسئله التى ممكن تستفزك ؟؟


طيب ، نيجى للسؤال الاول الا وهو ، هل انا احب التدخل فى شئون الاخرين ، وهنا لنا وقفه مع كلمة (الاخرين)  ..... فالامر بالنسبه إليّ يبدأ عند هذه الكلمه ليتم تعريفها أولاً  ، فالاخرين انواع فمنهم من هو قريب ومنهم من هو غريب ومنهم من هو حبيب .
فأيهم نقصد؟ فى السؤال!
ثم بعد ذلك هناك وقفه اخرى مع كلمه هى اصل السؤال ، ألا وهى (التدخل) ، فالتدخل شئ يختلف عن الاهتمام ، فالاهتمام شئ محمود دائماً الا فيما ندر . اما التدخل فهى كلمة ذات طعم يوحى بالامتعاض للوهله الاولى فهو يعطيك انطباع انه تدخل عنوه رغم انف صاحبه وباالتالى يكون مذموماً وهذا ما توحيه الكلمه ،  بالرغم من انه فى حالات كثيره يكون محموداً  ( اعتماداً على اجابة السؤال الاول ، وهو : من هو هذا الاخر الذى سوف اتدخل فى شأنه).

* طيب بعد الشرح الفيلسوفى اللى فوق ده واللى نسيتنا بيه السؤال الاول والتانى كمان ، بل نسيتنا اننا بنسألك انت اساسا  ، اجابة حضرتك ايه ؟

ماشى

الاجابه : بوجه عام لااااا ، بل بالعكس  بقيت دلوقتى ما بشغلشى بالى بأى حد ما يهمنيش ، الا انى لازلت لا استطيع ان اتمالك نفسى احياناً فى متابعة وبشغف من هم يهمونى ويمثلوا لى قيمه فى حياتى ، فهؤلاء لا استطيع ان انفك عن متابعتهم واحياناً الاصرار على معرفة ما يضايقهم .

* يبنى الاجابه خلص تعبتنى

حاضر.
 لا يا عم مش بتدخل ، ارتاحت ، افففففف هى مدونتى ولا مدونتك ....... دا انت انسان حشرى ......


* طب ما كنت قلت ام الكلمتين دول من بدرى بدل ما توجع دماغنا بحبة الفلسفه بتاعتك اللى ما بتبطلهاش دى ..... لازم يعنى مين هو الاخر ، ومين هما دول ؟! ومعنى التدخل والاهتمام والحصه قلبت لغه عربيه والفرق بين الفاعل والمفعول به .... وظرف الزمان والمكان ......... 

الله !!  يعنى بالله عليك ينفع يعنى اجاوب السؤالين كده وخلاص واشحطت الناس من مدوناتهم واجيبهم هنا علشان كلمه ولا كلمتين ، وبعدين السؤالين مهمين فعلا ولازم ياخدوا حقهم ، ولعلمك بقى والله العظيم انا اختصرت كتيييير ، الموضوع كان ممكن يبقى فيه تفصيل اكتر من كده بس انا اعتمدت ان الناس هتفهم على طول المعنى اللى عايز اوضحه ، ومع ذلك ما تزعلشى ياعم خلينا نجاوب السؤال اللى وراه على طول.
(فى سرى :   دا انت عيل رخم)

السؤال الثانى :وما الاسئله التى ممكن تستفزك ؟؟

الاسئله الغبيه بوجه عام ، انا بكره الغباء ، بكرهه بشكل مخيف ، والاستهتار.
او الاسئله اللى بحس فيها ان اللى بيسألها بيسألها مش اهتماماً بيا بل جمعاً للمعلومات وزيادة حصيلته من المعلومات الخاصه بالاخرين - ( الناس الحشريه يعنى) - او اللى عنيهم مدوره، حاكم انا عندى عقده من الناس دى بصراحه.


تمام يا عم ؟!! 
 علشان تعرف بس ، شفت الاجابه المره دى كانت مباشره ازاى وعاديه ، لان السؤال بسيط ومش محتاج تفصيل ، علشان تعرف انى راجل معتدل  والله وعادى بأدى كل شئ حقه.
اى خدمه

ماشى يا سيدى ، عموماً تشكر يا ذوق ، ونبقوا نتقابلوا فى الحركه الجايه ان شاء الله ، سلام

طيب بما اننا خلصنا والحمد لله  ممكن اسأل حضرتك سؤال مهم شويه (حازز فى نفسى من اول ما بدأت أكتب البوست بصراحه ، لان حضرتك كل شويه تعلق عليا وتتنرفز وتقولى خلص) .

هو ميييييين حضرتك اساساً؟!

هناك 17 تعليقًا:

-_- يقول...

معلم من يومك يا ويكا

ويكا يقول...

جامعه واحده يبنى

غير معرف يقول...

التعليقات مفتوحه يا باشا

الصراحه انا اتلغبطت
هو مين فيكم اللى بيتكلم
الحاج وئام ؟؟
ولا ويكا ؟؟
اصلها تفرق

كل عام هجرى وانت بخير والاسرة كلها بخير

عام هجرى سعيد

ويكا يقول...

لا ما تفرقشى كتير ، وئام هو ويكا اللهم فى حاجات معينه بس بيبقى فيه فرق.

يعنى مثلاً لو عايز اكتب قصه ، ممكن اقول خطيبتى قالت ، وقصه تانيه اقول مراتى قالت ، هنا هيبقى ويكا لان ويكا بيختلف فى الحالات دى باختلاف المقال.
ده مثال

لكن بوجه عام : الكلام اللى هنا لا يعبر بأى شكل من الاشكال عن رأى صاحبه وخاصة لما يكون فى السياسه او الحب (لان فى الحالتين الحكومه هتقفشنى) ههههههههه :)

مدونه ما كفايه بقى يقول...

بتكره الغباء؟ احم طب استأذن بقى انا قبل ما أفضح نفسى وتكره تدخل مدونتى تانى هههههههههه

إجابتك مميزه والله وطبعا من حسن اسلام المرء ألا يتدخل فيما لا يعنيه

أنا بحاول والله بجد مدخلش نفسى فى حاجه متخصنيش وربنا يشهد

بس أحيانا يغلبنى طبع النساء الحشريه

وساعتها بندم انى أتدخلت هههههههه

بس سؤال صحيح : من الحاج الرخم ده؟

تحياتى

زهرة(جنى)الاسلام يقول...

السلام عليكم
اعترافات رائعة
لكن حاسة ان فى لغبطة فى الاخر ممكن اكون انا مش فاهمة
على فكرة البوست اللى قبل دة عجبنى جدااااا

افروديت يقول...

والله ضحكتني ياويكا وانامش عندي نفس

بس تعرف

دمك خفيف

Unknown يقول...

انا حجاوب عنك ببساطة
انت لا تحب التدخل في شؤون الاخرين وتكره كره العمى والشيطان ان حد يدخل في حياتك سواء من باب الفضول او (الرخامة )او حتى الاهتمام اذا كان من شخص تقيل على قلبك
الاسئلة اللي ممكن تستفزك :دي مش محتاجة سؤال لان انت شايل بطارية مستفزة باستمرار مش محتاجة حد يسخنها .بس متعتبرش ده تدخل مني عتبره استعانه بصديق لما تكون الاجابة تايهه

Noha Saleh يقول...

فعلا فى فرق بين الاهتمام والتدخل
اتفق معاك فى النقطة دى
كل سنة وحضرتك طيب وعام هجرى سعيد ان شاء الله

ويكا يقول...

ايه ده ، انا ردودى على التعليقات اتشالت ولا ايه؟

المدونه دى لها ادمن تانى ولا ايه يا جدعاااان ؟؟؟

ايه ده لا يكون الراجل الحشرى اللى فى البوست ده بجد ويكون اخد الباسوورد كمان وبقى يشيل ويحط فى التعليقات بمزاجه ؟!!!

انا فاكر انى رادد على التعليقات والله ..

الله المستعااااان ، انا بدأت اقلق

ويكا يقول...

ما كفايه بقى

ما تقلقيش ، انا مش بطبق القاعده دى على اللى اتورطت خلاص فى معرفتهم يا بنتى ، بعتبر ده قدرى وامرى لله. :)

ههههههه

وبعدين اسمها حضرتك "من حسن اسلام المرء ، تركه مالا يعنيه "

بس عموما اه فعلا ، وصدقينى الحكايه دى بتريحه جدا جدا فى دنيته كمان.

اما موضوع النساء والحشريه ده ، امال انتوا تعبانين وتعبينا معاكم من شويه يا بنتى.

الراجل الحج الحشرى ده ، انا اساسا نفسى اعرفه ، وبعدين الموضوع كبر وشكله كده اخد الباسوورد كمان وبدأ يدخل فى ام التعليقات كمااااان. دا سنته سوده ان شاء الله بس اعرفه.

ويكا يقول...

زهره

شكرا اوى .

ولو انتى مش فاهمه اخر البوست ، يبقى كويس كده بقينا اتنين ، بقى اسهل نشوف حد يفهمنا احنا الاتنين ، وبالذات الراجل اللى ما اعرفوش ده

ويكا يقول...

افروديت

اى خدمه ، عدى الجمايل بس

ويكا يقول...

واحد من الناس


ههههههههههههه

ويكا يقول...

نهى صالح

وانتى بصحه وسعاده وبخير ان شاء الله.

وبالتوفيق ان شاء الله فى سكة الكتابه والاحتراف باذن الله

ستيتة يقول...

صباح الفل يا باشمهندس
محتاجين خدمة في مدونة اخبار المدونين


صفائح دم من رجل من 20- 40 سنة لم يتبرع قبل هذا التبرع بعشرين يوم
رقم الموبيل 0105462614

شكرا جزيلا وربنا يبارك فيمن يساعد

ويكا يقول...

خلاص يا دكتور
الاعلان ثوانى وهتلاقيه فى بيت المدونين ان شاء الله


جزاكى الله خير وتقبل منا ومنكم

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...