الجمعة، 18 فبراير 2011

هام وعاجل




ياشباب ، درءاً  لعمل ثوره مضاده
وبما ان الموضوع بدأ يظهر فيه فعلا بشارات
 

خبر عاجل انا حصلت عليه بنفسى : فيه فعلاً مظاهره هتطلع بكره  تأييد لمبارك واعتذار له ، هتبدأ من ميدان اسفنكس  
(في ميدان سفينكس الساعة 11 صباحا وهيطلعوا منه إلي ميدان مصطفي محمود يصلوا الجمعه هناك ونبدأ مسيرتهم ، هذا هو المخطط له فعلياً )

الموضوع مابقاش سهل وفيه فعلاً تحضير لثوره مضاده 

وفعلا البلد لم يحدث فيها غير ان سيادة الرئيس تنحى وخلاص ، وببساطه تحت ضغوط شعبيه بتحبه وعايزاه ينقذها من الضنك اللى وصلناله بعده ممكن ترجعه تانى لان البلد بتنهار اقتصادياً ونفسياً ده على حد ترتيبهم وقولهم اللى بيحضروله برده ، وهو نفسه لازال فى مصر وباقى اتباعه فى القصر الرئاسى بيحضرهوله هو او ابنه
 

الموضوع بدأ باستعطاف الشعب بان الراجل مش راضى ياكل ياعينى وبيموت وفى غيبوبه كمداً وحزناً ، وبما ان شعبنا طيب وغلبان هيبدأ يعتذرله بعد ما يكون صعب عليه.

بالاضافه لوجود لسه الكلاب بتوع امن الدوله والمخابرات اللى بتعمل الان فى صمت اللى بقائهم حتمى مع بقاء مبارك وازلامه ، وما تنسوش ان بكره الشرطه احتمال تنزل مع الشعب اتحاداً معاه والله اعلم مين هينزل مع مين يقول ويعمل ايه ؟؟؟


والخوف كل الخوف ان ينزل رجال شرطه او امن دوله او مخابرات فى زي جيش ويضربوا الناس بالنار ، وتبقى فتنه بين الجيش والناس .


غير موضوع تانى اهم واخطر
 

وهوان جمال نفسه لسه له حق يترشح هو كمان فى الانتخابات اللى ممكن تتزور تانى ببلاش بعد ما يكونوا لموا كل اللى ممكن يحركوا اى مظاهره مره اخرى ضده او ضد التزوير 
وهيعتمدوا على ان الشعب بتاعنا بييأس بسرعه وهيقول اياكشى تولع هنعمل ايه اكتر من اللى عملناه بقى.

ويبقى ساعتها سلملى على جوزك يا اسماعين بيه

وابقى سلملى على الثوره



اوعوا دم الشهيد يروح هدر 

واخيراً اتمنى من كل قلبى ان يخيب ظنى 
فهذا ليس وقت احباط عن جد ، الا ان الحذر مهم جدا جداً فى مثل هذه الظروف

هناك 18 تعليقًا:

mrmr يقول...

لو فعلا صح ما تقوله وما تظنه يبقى البلد خلاص الله يرحمها وحيبقى فى دمار شامل للمصريين
استر يارب من هذا المجهول اللى ممكن يهدد شعب مصر

الـسـيـدة نـون يقول...

مممممممممممممممممم

ربنا يستر

عموما اعتقد ان الجيش مش هايسمح بالإختلاط بين المسيرتين


احنا هانبقى فى التحرير
وهما فى سفنكس
يبقى ان شاء الله مش هايحصل حاجة


انا ماكونتش عايزة انزل لأنى خلاص زهقت من المسيرات والمظاهرات وعايزة البلد ترجع تظبط حالها والناس تشتغل بقى

بس فيه خبر بيقول ان القرضاوى هايبقى موجود ويقول خطبة الجمعة

وانا بصراحة هانزل علشان اسمع الخطبة بتاعته

بس ارجو ان دى تكون اخر مسيرة وكل واحد يشوف شغله بقى
لان علشان مطالب الناس تتحقق لازم عجلة الإنتاج تدور وبالتالى يبقى فيه دخل للبلد

انت لا تتصور كم الفوضى اللى موجودة دلوقتى

وانتشار المظاهرات والمطالب الفئوية اللى معطلة حال البلد

ده غير ان الناس فاكرة الحرية يعنى فوضى

واحدة صاحبتى بتقولى انها كانت واقفة فى الاشارة
و واحد كان بيزعق معاها علشان هى واقفة وبيقولها ما تتحركى يا باردة
قالته يا حضرة الاشارة حمرا
يقوم يقولها وهو كان فيه ظابط مرور؟

الناس مابقتش تحترم الاشارات والكل بيكسرالاشارة
انا عارفة ان ده موجود من زمان بس الموضوع زاد بطريقة غبية جدا الفترة اللى فاتت بسبب عدم وجود اى تواجد امنى فى البلد
ولو لاقيت ظابط تلاقيه مطاطي راسى وخايف ياخد رد فعل صح تجاه أى انفلات امنى
خايف الناس تقوم عليه تاكله

حاجة تقرف بجد

زي ما يكون لازم يكون فيه رقيب علشان نحترم القوانين

فيها ايه لو احنا من جوانا احترمنا نفسنا واحترمنا قوانينا من غير ما يكون فيه سيف مسلط على رقبتنا

انا اسفة
عارفة ان كلامى مالهوش علاقة بالبوست
بس فى ظل الاحوال اللى احنا فيها دى اعتقد ان كل حاجة مرتبطة بكل حاجة

والواحد خلاص اتخنق

وعلى رأيك
الخوف ان الشعب ييأس بسرعة

ربنا يستر
ويثبت عزيمتنا يارب


سلام

اختك خيخة

مصطفى سيف الدين يقول...

اولا ان شاء الله ربنا يخيب الظن لأن ده لو كان فعلا السيناريو المرسوم هتبقى فيه مجزرة وماعتقدش الجيش هيوافق على المجزرة اللي ممكن تحصل
ثانيا بالنسبة لكون جمال مبارك لسه ممكن يرشح نفسه سؤالي ليك هو فين الدستور اللي ممكن جمال يرشح نفسه منه؟ مفيش دستور اصلا يعني لا جمال ولا غيره في اللحظة دي يقدر يرشح نفسه
ثالثا فعلا بقايا النظام وذيوله موجودة بس معتقدش علشان يظبطوا لجمال ولا لابوه دي كروت محروقة وهتنرفز الشعب اكتر ممكن يكون لحد تاني من النظام او محسوب عليهم علشان يبقى حماية للفاسدين لكن كون جمال او مبارك يرجع ده غير منطقي ولو هم بيفكروا كده يبقي وقعوا في الغباء السياسي يعني لا الشعب اللي خرج عشرين مليون مواطن هيوافق على كده وهيبقى بيعادي الكل
رابعا احنا في موقف قوة لازم نبقى واثقين من نفسنا عارف ليه علشان التوتر الاقتصادي اللي حضرتك بتقول انه هيستغله لازم نفكر في ده الاول ونبقى واثقين جدا في الجيش علشان مقدمناش غير كده
في النهاية تحياتي لعرضك للموضوع وان شاء الله بكرة هيعدي على خير وهيخيب الظن

ويكا يقول...

مرمر

ربنا يستر فعلا

ويكا يقول...

خيخه

ماعنديش تعليق بجد
الله ينور عليكى

كلامك ميه ميه صح ن ومعاكى فيه تماماً

بس انتى الظاهر ما اخدتيش بالك من كلامى عن اللى ممكن يلبسوا لبس جيش دول

بس عموماً انا معاكى برده فى موضوع الاقتصاد وعجلة التنميه دى وبالذات ان موضوع التظاهر ده للاسف لن يجدى بل بالعكس سيشتت كل الجهود سواء جهود الثوره او جهو المسئولين عن رفع الاقتصاد والاصلاح السياسى

اما لنقطة عدم الانضباط دى ، فده شئ طبيعى جدا جدا جدا والحمد لله انه متمثل فى ده بس

وان شاء الله هينتهى بسرعه جدا جداً

ويكا يقول...

مصطفى كلامك منطقى جدا وواقعى

واتمنى فعلا ان ظنى يخيب ، الا انى ذكرته تحذيراً لاخذ الحيطه ليس الا ، لانى بجد خايف على الثوره دى اوى وعايزها تحقق كل اهدافها ان شاء الله

وما تنساش ان فيه ماكرين كتير فى البلد ويتمنوا يخربوها

يارب ظنى يخيب

الـسـيـدة نـون يقول...

موضوع لبس الجيش ده يا وئام

اعتقد ان الناس خلاص بقى عندها وعي كفاية
وفاهمة ان افراد الجيش الحقيقين مش هايمسوهم بسوء

ولو حد لابس لبس جيش و تعرض لاى فرد بعنف .. الناس هاتشك فيه وهايبلغوا اى حد مسؤل

عموما ربنا يستر

موناليزا يقول...

ربنا يستر

غير معرف يقول...

هام ويخوف ويقلق اوى كمان
ربنا يستر ياااارب
ويعدى بكرا على خير وتمشى الامور على ما يرام وبأفضل حال يارب العالمين

وربنا يخيب ظننا كلنا يارب

Unknown يقول...

يمكرون ويمكر الله ، والله خير الماكرين

ويكا يقول...

موناليزا

ايمان

يارب ، ولغاية دلوقتى الحمد لله اهه العمليه ماشيه كويس

وبصراحه لما شوفت العدد ده كله حسيت بطمئنينه كبيره جدااااا جداااا

لان بصراحه انا لو مكان اى حد من الجماعه الخاينين دووول هترعب من المنظر

ولو ادونى ايه عمرى ما اقدر احاول حتى افكر فى حاجه ضدهم

دا فوق ال 2 مليون يا اخوانا ما شاء الله

ويكا يقول...

ا. محمد الجرايحى

الله يفتح عليك

ويكا يقول...

الحمد لله رب العالمين

الواحد كان على اعصابه والله

غير معرف يقول...

وياريت لو بتاندى بحرية الراى تعرض التعليق يعنى

ويكا يقول...

الغير معروف

بكل بساطه وثقه

لا طبعاً مش هنشر تعليقك لان برده وبكل بساطه
فيه تضليل شديد وغريب

انا بالفعل شوفت الفيديوهات ، وفيها كم من الاستهتار بعقل المستمع والمشاهد ما الله به عليم

انا فعلاً مش عارف ايه الجرأه فى الاستهبال دى

اوعى تقولى انك مش قاصد تستهر بعقل الناس
واوعى تقولى انك فعلا مصدقها ومش واخد بالك من عدم صدقها او جهلها
لاحسن ازعل منك وعليك وعلى مصر كمان

لانى مش متخيل مصرى كده ، انا اعرف ان كلنا اذكيه بضغ النظر عن وجهات نظرنا ولا توجهاتنا

عايز تأيد الريس ايده
عايز تروحله مشى من القاهر لشرم روحله

بس بالله عليك ابقى سلملى عليه
دا لو كان مستنيك اساسا ولا رضى يقابلك

الا انت عمرك سمعت عن انه قابل اى حد من الشباب علشان اى حاجه فى اى حاجه

وياريت برده تبقى تقولى انت اساسا بتأيده ليه ؟؟
طب الناس اللى ضده وكرهاه اللى هما حوالى 85 مليون الا 1500 واحد الىل هما طلعوا فى مظاهرة التأييد اللى انت كنت منها ، كلهم قالوا هما بيكرهوه ليه وعدوا كل حاجه وبالارقام

انت بقى واصحابك لغاية دلوقتى ولا واحد منكم قال هو بيأيده ليه

غير طبعاً انه صاحب الضربه الجويه
بلا خيبه

غير معرف يقول...

على فكرة انا مش بايدة لانى مع التغير ودا حقى ومطلب شرعى لكن الاغرب انى صراحة مصدقه وهقول على نفسى غبية لانى
زى ما انت بتقول مصرية يمكن اكون مشوشة ومصدقة اوووووووى وحاليا لكن مش هقول ان الفيديوهات عمل ناس مؤيدة للرئيس ولانى امتلكة فيديو عن موقع رصد وجروبات تانية بتوضح ان الميل المستخدم فى الجميع كان واحد وان الادمنز بتوعه هما هما اعضاء على الصفحة الرئيسية للموسونية وان نفس اللى بيحصل هنا ونفس حتى جملة ان عناصر شرطية
بتنزل وسط المتظاهرين نفسه الجملة وكانها بتتطبق فى كل الدول العربية
copy &past وبخلاف دا انا ملاحظة ان اللى بيمتلك المايك فى الميدان هو اللى بيسير الناس لوجهة نظرة وخاصة ان القرضاوى منع وائل غنيم يطلع على المسرح وبداء اللى حوالية فى عرض مطالب اخرى وجديدة وسمعت الرجل اللى بيقول انا عاوز اغير الدستور و .و.و.و وفى نهاية حديثة وبطالب كل الاعلام يطلعلنا ناس تقولنا اية الدستور دا اصلى مش عارف مش غريبة انه مش عارف ويطلع يطالب بتغير شئ مش عارفة على فكرة انا مبحميش نظرية المؤامرة ومبفرضهاش بالقوة ومقولتش اللى خرج دا خرج باجندة لكن متاكدة ان خرج لانه اتلعب على مشاعرة بالجوع والفقر وان الدعوة لاقت لنفسها المناخ الخصب فى مصر من فساد واستغلال سلطة وبالتالى كانت مهيئة للانتشار وجداااااااااااا بين الناس لكن لو بعدة حضريتك عن كلامى وعن الاحداث وعن شعورك اتجاه النظام
واتمنى دا وتراجع تانى الشريط كله وبهدوء وتحاول تسمع وجهة النظر المعارضة من الفيديوهات الى بقت منتشرة اوى ابحث عن فيديو حقيقة رصد وابحث عن فيديو سار واللى بتوضح فية ثغرات كلام وائل غنيم وابحث عن عمر عفيفى واحتلوا التليفزيون واستنوا اجبلكم التعليمات وانزلوا على الاحياء الفقيرة وادعو بدون رفع شعار حزبى او سياسى واكدوا على جمل الجوع والفقر ولما النت ينقطع عن مصر كلها وتلاقى شبكة رصد وكلنا خالد وغيره بيرفع صور واحداث بردوا مش غريبة وان التلجراف اللى مشهود على الاقل بمصدقيتها تنشر وثقية بتقول عن احداث مصر بتدخل امريكى ونظرة الفوض مش غريبة وان ويكليكس يعرض وثقية عن قطر ومحاولة ابتزاز مصر وان الدولة القطرية بتعت لمصر انها تخرج ايدها من الوضع الفلسطينى وتترك قطر هى اللى تحلة مقابل ان القناة متجبش سيرة مصر لمدة عام مش غريبة مش غريبة حد يهرب من سجن فى القاهرة يوصل لفلسطين فى نص ساعة ويخرج على قناة العبرية يتكلم
وغيره وغير بص تانى ابعد عن اى كلام ليا وابعد عن الاحداث واسمع الوجهاتين من النظر هات دى وهات دى يمكن فعلا انا مشوشة وغلطانة واى منطق هتتوصل ليه سيبه لكن ابحث لاننا مش شريط كاست ولا بغبغانات بنكرار بدون وعى ولاننا فى الاخر هدفنا مصر وبعيد عن دا كله انا متالمة من جملة سمعتها على قناة اخبارية عن مصر ان الناس بتتحرك بثقافة القطيع واحد بيقود والباقى مغيب ودا فعلا ثبت ليا

غير معرف يقول...

ع فكرة احنا اتنين غير معروف واخوات
واسفين لساء سلوكنا فى العرض لكن هو انتماء لمصر ويمكن مقدرنش نوصل وجهات نظرنا اسفين مرة تاينة واتمنى تراجع الواقائع تانى بعيد عن اى مؤثر من اى حد لانى عن نفسى فعلا نزلت بدافع شخصى وبدون اى جملة من اى حد لكن دعوة انى افكر بصوت مسموع مع حد يمكن الاقى اجابة وسط الناس اسفين مرة تانية

hend anwar يقول...

ليلتنا فل

ايه الرعب دااااااااا كله

بس فعلا انا سمعت ان فى كتير من مكتب الرئاسة قاعدين فيه
بيعملوا ايه ماتعرفش

ربنا يستر

واضح انهم بيصفوا حسابات


وبعدين امن الدولة دول عمرهم ما هايتغيروا من يوم وليلة


يااارب

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...