الجمعة، 27 مايو 2011

ثـــــوره .......... خصوصى

بدأت بناس حاولوا يعملوا فتنه بين المسيحيين والسلفيين بحكم انهم لقوا السلفيين عددهم كبير جدا ومؤثر لعل وعسى انهم يكسروا شوكتهم هما والاخوان .
وبالذات بعد  ما ظهر تأثيرهم ده فى الاستفتاء اللى فات (تأثيرهم كان الاكبر بدون ادنى شك  وبشهادة المخالفين لهم ) 
مما اعطى هؤلاء انطباع انهم فى الضياع الشعبى والانعدام الوجودى فى الشارع المصرى ..... وان البيضه لن تكون لهم
وانهم لن يجدوا مبتغاهم فى الانتخابات القادمه ولن تقوم لهم فيها قائمه 
وبالتالى قامت الدنيا ولم تقعد فى الجرائد والقنوات والمجلات والتويترات والفيسبوكات .... طبعاً من قبل الخائفين والمرجفين 
على اهل الثقل الشعبى والتخويف الانتخابى القادم ..... السلفيين والاخوان وبالاخص طبعاً السلفيين ....
شويه لما الدنيا اتلمت فى موضوع السلفيين ده والناس عرفت الحقيقه والموضوع جاب نتيجه عكسيه والناس اللى ما كانتشى عارفه السلفيين وتوجههم الحقيقى وسلوكهم والفرق بينهم وبين الاخوان ، بدأوا يعرفوهم اكتر ......... 
بدأوا ينادوا بتأجيل الانتخابات البرلمانيه من باب اعطاء الفرصه للاحزاب الجديده لاخذ فرصتها فى الانتشار الشعبى ....
على اساس ان الانتخابات اللى هتتعمل دى معموله علشان سعادتهم ينجحوا ودى مجرد شكليات بس ولا ايه ؟!!
كانوا فين معاليهم قبل كده ؟!
وعلشان للاسف مالهمشى شعبيه سعادتهم بدأوا يطلبوا انها تتأجل ، فالمجلس العسكرى رفض برده .......
فحسوا ان الليله كده مش بتاعتهم ، فقالولك ما بدهاش بقى ، مفيش انتخابات ومفيش دستور هيتعمل بعد الانتخابات اللى ناس غيرنا هتنجح فيها دى 
لان اللى هينجحوا (غيرنا ) دول هما اللى كده هيحطوا الدستور اللى هيبقى على غير هوانا ، خلاااص يبقى علينا وعلى اعدائنا ، يبقى مفيش مجلس عسكرى اللى مش ماشى على هوانا ده وواقفلنا زى اللقمه فى الزور ومفيش انتخابات والدستور يتحط دلوقتى قبل الانتخابات اهو على الاقل نبقى ضمنين اننا اللى هنشارك فيه 
وطبعا المجلس الرئاسى اللى عايزينه لازم يبقى ناس على مزاجهم ، والدستور برده يبقى على مزاجهم وملعون ابو الشعب اللى مش عارف مصلحته ده
ولازم طبعاً للكلام ده لابد له من ثوره وهوجه والبلد تطلع معانا ....... لان دى ارادة الشعب المهاود الغلبان اللى بيطلع معانا فى اى حاجه ......
واضح ان مفيش فايده والبلد دى مكتوب عليها تتحكم من دكتاتورززززز مختلفين بأشكال مختلفه لكن النتيجه واحده ....


اللى خايف منه بقى ، ان الجماعه (القيادات اللى نازله دى ) لما تشوف عدم اقبال جماهيرى عليهم وتخوف من نواياهم

يقلبوا المطالب للمطالب العاديه بس اللى هى الاسراع بمحاسبة الفاسدين وعميل مش عارف ايه وحد ادنى لايه واقصى لابصر ايه

الكلام اللى هو مش محتاجه ثوره اصلا خد بالك

ثوره يعنى تغيير نظام كامل مش تحقيق مطالب

لو الموضوع قلب بطلبات يبقى تعرف انهم ولاد اللذينه فهموها بسرعه وغيروا التوجه


وكل اللى فوق ده برده هما عندهم حق فيه لانهم هما النخبه وهما اللى بيفهموا وهما اللى عارفين مصلحتهم ..... ااااا اقصد مصلحتنا 

وابقى سلملى على الثوره يا اسماعين بيييييييييييه


الخميس، 26 مايو 2011

انا مش نازل بكره



ان شاء الله انا مش نازل بكره



وعلشان كترة المزايدات 


اللى ودانى ادام ماسبيرو ادام المنصه فى اعتصام ماسبيرو اللى فات وبالرغم من احتمالية عمل مشكله جامده معايا  وكلامى مع الناس هناك المولعين والسخنانين من اى كلام فى الدين من جانب المسلمين   التفاصيل هنا

هو ... هو 


اللى مش هينزلنى بكره ان شاء الله 


وطبعاً مش علشان عدم الاستقرار ووضع البلد والكلام الخايب ده 


لا خااااااااااالص 


تااااانى اهه 

لنفس السبب اللى ودانى ماسبيرو هو نفس السبب اللى مش هينزلنى بكره 

وافهموها انتوا بقى





بس سؤال على الهامش:

لكل المشجعين للنزول بكره وخلاص او مش عارفين الاهداف الرئيسيه لغداً : لو تم الموافقه على الطلب الرئيسى عغداً الا وهو اختيار مجلس رئاسى ، تقدروا تقولولى مين اللى هيختارهم ؟؟؟؟
وهيتم اختيارهم على اساس ايه ؟؟؟
اللى هيجاوبنى ويقنعنى هنزل بكره معاه ان شاء الله

الأربعاء، 25 مايو 2011

قال رسول الله صلى الله عليه وسلم

وعَنْ أنس رَضِيَ اللَّهُ عَنْهُ قال، قال رَسُول اللَّهِ صَلَّى اللَّهُ عَلَيْهِ وَسَلَّم: "إذا أراد اللَّه بعبده خيراً عجل له العقوبة في الدنيا، وإذا أراد اللَّه بعبده الشر أمسك عَنْه بذنبه حتى يوافى به يوم القيامة" وقال النبي صَلَّى اللَّهُ عَلَيْهِ وَسَلَّم: "إن عظم الجزاء مع عظم البلاء، وإن اللَّه تعالى إذا أحب قوما ابتلاهم، فمن رضي فله الرضا، ومن سخط فله السخط"
رَوَاهُ الْتِّرْمِذِيُّ وَقَالَ حَدِيثٌ حَسَنٌ.

وعن أنس رضي الله عنه قال (كنت أمشي مع رسول الله صلى الله عليه وسلم وعليه برد نجراني غليظ الحاشية، فأدركه أعرابي، فجبذه بردائه جبذة شديدة، فنظرت إلى صفحة عاتق النبي صلى الله عليه وسلم وقد أثرت بها حاشية الرداء من شدة جبذته، ثم قال: يا محمد مر لي من مال الله الذي عندك، فالتفت إليه، فضحك ثم أمر له بعطاء). متفق عليه.

أَخْرَجَ مُسْلِمٌ وَأَبُو دَاوُد وَابْنُ مَاجَهْ : { إنَّ اللَّهَ تَعَالَى أَوْحَى إلَيَّ أَنْ تَوَاضَعُوا حَتَّى لَا يَفْخَرَ أَحَدٌ عَلَى أَحَدٍ وَلَا يَبْغِيَ أَحَدٌ عَلَى أَحَدٍ } .


وقد ذكر النبي صلى الله عليه وسلمأن الكذب لايتفق مع الإيمان , وذلك فيما أخرجه الإمام مالك من حديث صفوان بن سليم رضي الله عنه قال: قلنا : يارسول الله أيكون المؤمن جبانا ؟ قال: نعم , قيل له : أيكون بخيلا ؟ قال : نعم , قيل : أيكون المؤمن كذابا ؟ قال : لا ([2]) .

# قال رسول الله صلى الله عليه وسلم :

( آية المنافق ثلاث : إذا حدث كذب ، وإذا وعد أخلف ، وإذا اؤتمن خان )

الراوي: أبو هريرة المحدث: البخاري – المصدر: صحيح البخاري – الصفحة أو الرقم: 6095
خلاصة حكم المحدث: [صحيح]

الثلاثاء، 24 مايو 2011

خلاصات 3



ما بين الحقيقة و الكذب

درجة نقاء الــــــــــــــــــــــروح

**************************

راقبوا الله فى انفسكم وأهليكم
يرحمكم الله

************************** 

الخيانه ...... الخيانه ....... الخيانه 
اياكم والخيانه
فلقد استأمنكم احد ما على اسمه وعرضه ونفسه وماله
وولاكم ظهره ثقتاً فيكم او مراهنتاً عليكم
فلا تطعنوه فى ظهره
ولا تثبتوا له بأنه راهن على حقير

************************** 

الألم شئ لا يقيسه صاحبه لكى يستطيع ان يصفه لكم
الا انه يستشعره كما ولو لم يشعر بمثله من قبل احد غيره

************************** 

الحياه جميله ..... مهمه ...
الا انها حقيره 
اوى اوى والله يا شباب


************************** 

لا اريد من اى  احد اى شئ 

فقــــــــــــــــط

الدعاء 
لان التفضل والاستجابه ستكون من 

الله




************************** 


اتعجب بشده ممن يحارب 

الله 

ما عنديش غير كلمه واحده له 

انا ما شفتش احمر من كده

************************** 

انا بعمل ذنب...... ممكن 
الا انى لازلت اعترف انه ذنب

و هناك من يعمل الذنب ويحعله حلالاً ليفعله 
ليس هذا الا ضعف شخصيه منه لعدم قدرته على مواجهة خطأه
او فساد فطرته

ونسأل الله العافيه

************************** 
لازلت اتكلم عن الخيانه

لانتشار انواعها واشكالها وكأنها اصبحت فاكهة المسلمين

علشان خاطرى 
ماحدش يخون تانى 
كفايه بقى

************************** 
انتوا لسه ما قررتوش تبطلوا خيانه ؟!

بطلوا بقى ...... واوعوا حد يقولى انا مش بخون

دووووور انت بس كده ، واكيد هتلاقيك بتعملها وانت ..... 
(واخد بالك صدقنى )




السبت، 21 مايو 2011

pause ............... خدلك بريك





نرجع بقى للحاله الاصليه اللى اتفقنا عليها فى بيت المدونين








وتطبيقاً لهذه القاعده فقد قررنا الاتى :


اولاً :    حـــــــــــــــالة تييييييييييييت كبيره (فى اى حد مضايقانا او حاجه مزعلانا او شئ خايفين عليه ...... طظ ... كفايه بقى ما يستاهلوش اكتر من كده ...... اخدوا حقهم معانا خلاص ...... وعملنا اللى علينا  )




ثانياً :   حـــــــــــــاله من الاستجمـــــــــــــام العام ومحاوله لنسيان اى ( قـــــــــــرف).


ثالثاً  :  مصــــــــــــــــــــر بتولع يا فوزيه ................ اوك مفيش مشكله هريح شويه وارجع اطفيها معاكم لانى لو فضلت اطفيها معاكم بالمَيه هتولع اكثر لانها  حريقة سببها ماس كهربائى ( زى ما اتعودنا ) وحرايق الكهرباء مش بتطفى بالبساطه دى ولا بكترة المَيه بل بالعكس كل ما حاولنا نطفيها اكثر كل ما ولعت اكتر


لذا فقد قررت انى هريح شويه وافكر بروقان لما اهدى واركز ، اذاى اطفيها ، علشان اعرف فعلا اطفيها و ماولعشى انا كمان معاها


رابعاً :  لازم اروح اتفسح فى اى مكان ان شاء الله فى اقرب وقت ممكن ، وفعلا جارى التخطيط اهى فرصه نستفاد بحالة الولعان اللى فى مصرنا حبيبتنا ( اكيد السياحه مضروبه والحاجه بقة رخيصه)  ...... وش ابتسامة واحد ندل :))


خامساً :  عايز بعد ما اتفسح ارجع ان شاء الله واركز فى شغلى اوى اوى اوى وطظ فى اى شئ تانى .....لما بتنجح فى شغلك ... بتلاقى قرايبك بيحترموك ويعملولك الف حساب ......
اما لو فشلت كل واحد فيهم بيعمل عليك دكر وابن بارم ديله واللى فاهم الحياه صح واحمد زويل التانى ...... يا اما تلاقيه لو قريبك يسيبك ، لو صاحبك ينفضلك او مراتك تتخلى عنك .......... وطبعا مش كل الناس كده ... اكيد فيه ناس محترمين.


سادساً : عايز ابقى بجح شويه بزياده وادور على مصلحتى وما اتكسفشى ...... لو ليا فلوس كتيره عند حد مستنطع فيها ومأخرها اربع شهور عن ميعادها اتصل بيه وافكره باللى حصل لحسنى مبارك لما ساب الحكومه ترغمنى غرامات مرور كتير حصل فيه ايه  وانه مش اجدع من حسنى مبارك عندى يعنى  ......
ولو بدى واحد فلوس كتير لاى سبب اطلب منه وصل او ورقه بيهم علشان ما يعمليش فيها اهبل بعد كده ويبقى يا مش فاكر هما كانوا كام بالظبط او مش فاكر انى اديتهومله خالص ،او يأخرهم اربع خمس شهور برده  وفى الاخر هبقى انا الغلطان




ثامناً : ان مفيش سابعاً اصلاً ( مش عايز اكتب سابعاً ، حد عنده اعتراض؟؟؟)


تاسعاً : محدش له عندى حاجه ، اعامل الناس باحترام اكيد ...... لكن ماحدش له الحق انه يتدخل فى حياتى الشخصيه خلااااااص او يقولى اعمل ايه .... كفايه بقى انا حاسس ان حيالتى بقت مراحيض عامه ، احساسى انى عايز ابقى مصدر راحه للاخرين وتحقيق اهدافهم لا يعنى انهم يتدخلوا فى تفاصيل حياتى


عاشراً واخيراً : انا خلاص لازم انفذ الكلام اللى فوق ده ان شاء الله


احد عشر :  اه احد عشر ايه المشكله
نعم ؟؟
قولت فى النقطه عاشراً  انها  "عاشراً و اخيراً" ؟؟
ايه المشكله يعنى هو انا مش لسه قايل فى تاسعاً اللى قبلها ان  محدش له عندى حاجه  اشمعنى دى بتنسوها ؟؟؟
هو احنا دايماً كده ننسى البنود اللى بتدى للاخر حقوقه ونبقى فاكرين كويس البنود اللى نكتفه بيها ......




اثنى عشر :      انا خلصت خلاص



اراهن : ان حد اخد باله انى ما قلتش احد عشر برده ..... نياهاهاهاهاهاهاهااااااع







الجمعة، 20 مايو 2011

بتبــــعدينــــــــــي



بتبعديني عن حياتك بالملل
وخلتيني اقول خلاص مافيش أمل
استمري هتخسريني
استحالة هتكسريني
وحسسيني انك حجر
او ورده دبلت ع الشجر
صبرت صبر غريب رهيب لا يحتمل
كل اللى ممكن اعمله معاكي اتعمل
بتوهميني ان الحكاية بتنتهي
ابعد وقبل ضياعي منك تندمي
مابقتش بعرف دمعتك من ضحكتك
أصرخ مافيش ولا صرخة مني تسكتك
ما عرفش ليه بتعذبيني
ساكته الحياه بينك وبيني
احساسي بيكي راح اكيد
مش محتمل




الخميس، 19 مايو 2011

خلاصات 2

احياناً صبر لحظات ................... يتوقف عليه مصائر امور كثيره


**************************

ان تصمت قليلاً وتستمع 
(قد يفرق بعض الشئ )
 وان تعطى من امامك فرصه ليتكلم ولو كلاماً سخيفاً وتنتظره لينهى كل ما عنده 
(قد يفرق كل الشئ)

***************************


احياناً انت فى حاجه ان تعيد جميع حساباتك ........ لكن على اساس انك انت المخطئ ، حينها قد ترى كل شئ غيرما كنت تراه منذ قليل


***************************

الحب ليس كل شئ ......... ولكنه ليس اى شئ

***************************


هذا ليس بجيد ............ هذا مرفوض ......... ( لا اعتراض عندى ... لكن
  (من منظور من ؟!)

***************************
 
الحياه ليست بتلك الاهميه ................. فهى لا تستحق كل تلك العناء

***************************

الاحلام ليست مستحيله ............... 
طالما تكرم الله علينا بأن كان هو ........ ( الله )

***************************

نحمد الله ان جعل رزقنا بيديه 

***************************

لو خاننا احد فهذا خطأنا اولاً واخيراً

***************************

بالرغم انهن اشرار الا اننا لا نزال نتمسك بهن ......... 

فهل هذا سحر اسود؟!

***************************

انها هادئه ...... مطيعه  ...... طيبه ....... على نياتها ......
زى القطه المغمضه  ......... 
( والله انت اهبل )

 ***************************

صديقك الحقيقى هو نفسك ولا احد اخر

***************************

انت صديقى الصدوق ...... انت افضل عندى من اخى ......... 
(هو مبالغ بعض الشئ ) .......
فوقت اختلاف المصالح ..... لن تجد له صديقاً مثل نفسه 

***************************

الحياه ....... هى كده ومش هتتعاش الا كده 

***************************

الامل ....... ليس كالرجاء

***************************

الله .......... هو الملك ....... الباقى ......
ليس لك احد سواه ....
فلا تخسره ايضاً .....

***************************

بَحِبك .......... بَحِبِك    ...............  
....  ( ادينا هنشوف ) .......


***************************

وبعدين ........... ولا قبلين

***************************

اضحك ولا اعيط ؟!!
اللى هتستمتع بيه اعمله

***************************

زوجتى ............. اكيد زى زوجتك ........... 
بس عموماً الله يعينى

***************************

ايه اللى ما كنتش عايز تقولهولى ؟!
هو الشئ اللى لسه مش عايز اقولهولك

***************************

زعلان منى ؟!
اكيد مادام سألت السؤال ده

***************************

انت بتكلمنى ؟!
مادام سألتنى السؤال ده يبقى للاسف اكيد مش بكلمك

***************************

ازاى تعرف انك بتحب؟!
لما تبدأ تضايق وتغضب

***************************

هو انا مؤدب؟!
لا .... الناس هى اللى قليلة الادب

***************************

اظافرى جميله 
لازم اقصها
***************************

انا مش بحب اطبخ  ...... بس بدأت اطبخ
يبقى بدأتى تحبيه بجد


***************************


لا تحزن
كلنا هذا الرجل

***************************

مش عارف ليه حاسس انكم مستنيين الخلاصه اللى وراها لسه 


بس انا خلصت للاسف

نتقابل فى الخلاصات الجايه




السبت، 14 مايو 2011

"من أمام ماسبيرو ...... احدثكم"

نظراً للحركه الواطيه اللى عملها البلوجر معايا وإلغائه لهذا البوست 

فتانى البوست اهه

وبعتذر للناس اللى بعتو تعليقات وما اتنشرتش او ما لحقتش ارد عليها لانها للاسف برده طارت ............. عاااااااااااااااا

المهم 

نرجع للموضوع تانى




اولاً ما حدش يسألنى ايه اللى وداك
او
روحت تهبب ايه بدقنك دى ، وهما كلهم مسيحيين وكان ممكن يقطعوك
لانى ما اعرفشى
انا كنت رايح مشوار وكنت واخد طريق الكورنيش عادى وناسى موضوع المظاهره والاعتصام بتاع المسيحيين ده
واذ فجأتاً ألاقى الطريق واقف فجأه والعربيات بتلف وترجع عكسى ، فسألت الناس قالولى علشان فيه اعتصام ومظاهره
فإذ فجأتاً اقرر انى مش هلف ولا ارجع تانى (بالرغم من انى مشهور عنى انى بلف وارجع تانى كتير - بسبب انى بتوه بالعربيه كتير)
الا انى لم الف ولم ارجع تانى
واذا بأنى قررت انى اكمل فى وسط استغراب ناس كتير وبالاخص الناس المسلمين اللى كانت واقفه فى الشارع بتحول الطريق قبل ماسبيرو بفتره ، بل انهم لم يتوقعوا انى هروح فعلاً وتخيلوا انى عايز الف من الفتحه اللى قدام شويه
المهم سابونى فعلا اعدى
وبعدين انا دقنى مش كبيره اوى يعنى فبالتالى ماحدش هيعتبرنى متدين اوى ، حاكم الناس بتقيسها بالحجم وانا دقنى على قدى والحمد لله حاجه تايوانى كده يعنى
المهم
قررت وقتها اننا سنذهب
وبالفعل هذا ما حدث
وكنت الذقن الوحيده الموجوده امام ماسبيرو
ربنا يستر
الشباب المسلمين اللى كانوا بيبيعوا اعلام هناك ، كانوا مرعوبين عليا وحاولوا يرجعونى كتير او على الاقل ما اتكلمشى مع حد
وهذا ما لم يحدث
اصريت ادخل ادام المنصه ووقفت اتفرج ، وبدأ الحوار
بواحد مسيحى طبعاً قرب منى واتكلم عادى من غير ما يذكر انه مسيحى ، وبدأ يكلمنى عن انهم فى التليفزيون بيقولوا انهم بيكسروا وبيعملوا وهما مش بيعملوا كده
قلتله اه فعلاً انا شفت الاخبار دى الصبح انكم كسرتوا الازاز وحاولتوا تقتحموا المبنى ...... قالى دول عالم كدابين ومنافقين
فانا فعلا استغربت اوى اوى ، لانى فعلاً شايفهم عاديين بيهتفوا بس اه الجيش محاوط المكان بعدد متواضع جدا جدا من العساكر واسلاك شايكه وكأنى فى دوله تانيه ، بس برده مفيش اى عنف او قلة ادب
الا ان واحد من الواقفين قالى لا فعلا الكلام ده حصل امبارح
المهم
قعدنا نتناقش فى اللى حصل وان البلد بيتلعب بيها وان مفيش اللى بيتقال ويتناقل ده فى الاخبار
كبر الموضوع ولقيت عدد لا بأس به من الناس ملمومه حواليا وبيتناقشوا بكل ادب ، الا انهم واضح انهم زعلانين اوى
وده اللى زعلنى
انى اكتشفت ان فيه عدد كبير منهم فعلاً مصدق
هتستغربوا طب وده يزعلنى فى ايه
اه يزعلنى
لانى حسيت انهم ناس غلابه اوى و متقالهم كلام مش حقيقى فعلاً انا استغربته جداً
قعدنا نتناقش واوضحلهم توجه المسلمين ايه ويعنى ايه سلفى ويعنى ايه اخوان ودينا بيقول ايه (ما تستغربوش وتقولولى هما مستنينك لما تفهمهم مهم عارفين )
لا ياباشا منك ليه ، الناس دى فعلاً مش عارفه حاجه ، ومتفهمين غلط ، وانا كنت مستغرب جداً من اللى بيقولوه ومن الاخبار اللى متقالالهم
والغريب بقى انى لقيت ناس كتير تانيه متضايقين انهم بدأوا يتجمعوا حواليا ويتناقشوا معايا .... وبدأت اسمع ناس من بعيد بتزعقلهم
"انتوا هنا ليييه ، اقفوا اهتفوا معانا ادام المنصه تانى" وهما يردوا عليهم يقولولهم :
"حاضر بس ثوانى احنا بنتناقش مع الراجل - اللى هو حضرتى"
شويه ولقيت واحد (لو قولتلكم مبرشم يبقى بقول عليه فايق) ، جاى عليا فجأه وانا فى وسط الناس وهاجم وبيقولى
" لاااااا احنا فقنا خلاص من اللى كنا بنشربه .... خلاص فقنا خلاااااص " انا فعلاً اتخضيت من منظره ...... اذا كان ده كده فايق امال لو مبرشم كان هيبقى شكله عامل ازاى
السؤال هنا بقى
ده مين ؟؟؟
بيعمل ايه هناك ؟؟؟
عايزين تفهمونى انه صاحب قضيه ؟
ودارى باللى بيحصل حواليه ؟؟
ما علينا
المهم الناس حجزته بعيد عنى فعلاً خوفاً من ان الموضوع يتطور تانى زى اليوم اللى قبليه وتحصل مجزره تانى
المهم كملنا كلامنا قامت الناس اكدتلى كلام انهم شافوه صوت وصوره من شيوخ سلفيين انهم دعوا الناس انهم تروح الكنيسه وتولعها
ما صدقتش واصريت ان ده مستحيل يكون حصل لان انا عارف قناة الناس اللى بيقولوا انها اذاعت الكلام ده وعارف ان السلفيين مستحيل يدعوا لفتنه زى دى
الغريب بقى لما روحت فعلاً وفتحت الفيديوهات استغربت جدا جدا ، معقوله الناس ممكن تكون ساذجه كده ؟ ولا هما فعلاً اللى بيقولوا كده وخلاص؟
الفيديوهات مالهاش اى علاقه لا بشيوخ سلفيين ولا اى قناه اسلاميه ولا اى شئ
اللى استغربته اوى اوى بقى امبارح هو انى لقيت القسيس اللى واقف على المنصه عمال هاتك اتهامات للسلفيين انهم متشددين واعدائهم اللدوديين ، والاغرب والاغرب انه استدل على عداوتهم وسوئهم بموضوع مسجد النور ، طيب ايه علاقة القسيس بالمسجد؟؟
و ناس كتير فعلاً لقيتهم بيتكلموا معايا فى موضوع المسجد ده ، اه صحيح انا لقيتهم بيقولولى حاجات غريبه اوى متداوله بينهم فى موضوع مسجد النور ده لا حصلت ولا حتى اتكتبت فى جرايد ، ولا لها اصل ولا فصل بس مش ده الامر الغريب الاكبر من وجهة نظرى
الغريب فعلاً انهم ايه علاقتهم بيه ؟؟
ولما سألتهم فعلاً ما عرفوش يردوا عليا وسكتوا بل اتفقوا معايا فعلاً انهم فى النهايه مالهومشى دعوه
 فى النهايه اضطريت امشى لما جه ناس مسلمين من برا غالبا قد يكونوا شرطه لابسين ملكى واصروا ياخدونى بره بعيد خوفاً عليا
وبالرغم من انى كنت مصر افضل شويه الا انى فى النهايه انصاعت لرغبتهم لاسباب كتيره
خاصه ان عدد كبير جداً بدأ يتلف حواليا ويتكلم معايا وده ما كانشى عاجب ناس كتيره تانيه من المنظمين للاعتصام وكان واضح انهم من الممكن يعملوا  اى حاجه علشان يفركشوا الجو الودى الحوارى العقلانى ده
وهنا الخوف مش عليا بس الخوف على الفتنه الجديده اللى ممكن تحصل لو فعلاً حصل إشكال تانى كبير وده كان سبب رئيسى انى مشيت فعلاً
انا ليه بكتب البوست ده بالرغم من انى لم اكتب اى شئ من الحوار اللى حصل بينى وبينهم مع ان وقفت وقت لا بئس بيه معاهم
لانى عايز اقول الخلاصه
ناس كتير من اللى هناك دى ، مع انهم ايجابيين بوجه عام ومن النوع اللى بيخرج وبيحاول يعبر عن رأيه
الا انى اكتشفت اننا كلنا غلابه (مسلمين او مسيحيين) واغلب المصريين بيظيتوا مع الظيته ، وبيصدقوا اى حاجه تتقالهم وعاطفيين جداً
وعندهم استعداد يموتوا بسبب خبر كذب ما اتحققوش منه
وهنا مربط الفرس
لازم نفوق يا جماعه
اللى فاهمين فعلاً مش كلهم امناء ومش كلهم بيقولوا الحقيقه
احنا بننساق ومش بنبقى عارفين منساقين على فين
وممكن نموت واحنا متخيلين اننا متنا دفاعاً عن الحق وهو لا حق ولا حاجه
عايزين نحافظ على بلدنا ...... عايزين نبقى واعيين اكتر
مش عايزين نصدق اى شئ يتقالنا
عاوزين نحافظ على بلدنا

الأربعاء، 11 مايو 2011

هنا .... لنا وقفه




هنا ارانا متجهين الى نفق عميق مظلم ظالم اهله ولو كانوا قله
لقد شاهدت الان ما احزننى كثيراً ، الا وهو تطاول بعض المتخلفين الغير متدينين من بعض المسيحيين الذين لا ينتمون الى المسيحيه فى شئ على مشايخنا الافاضل جميعهم سواءا اخوان ام سلفيين ام حتى ازاهره
ولقد استأت كثيراً فأنا لم ارى اى شئ مثل ذلك من قبل من مصريين سواء من مسلمين او مسيحيين
و لا الله لنور وضياء وجوه هؤلاء لاعز واوضأ من رقاب اؤلئك الذن يسخرون منهم ، انظروا الى الوجوه والى ضياء نورها التى تضئ الايام بها ، لله انى لادين لله بانهم اعز واكرم على من والدى الذى احسن تربيتى وانفق على ، فهم ميراثنا وهم صلتنا بالصحابة ورسول الله ، لا نغالى فيهم ولا نجعل مثل هؤلاء يخرجونا مخرج المغالين فى شيوخهم كما غالو فى قساوستهم واحبارهم ، الا انهم شيوخنا ومعلمينا وطريقنا الى الله الذين من علمهم وهديهم نقتبس ، اللهم اجعل مثل هذا العمل فى ميزان حسناتهم وارفعهم واعزهم فى الدنيا قبل الاخره ، ولا اقول الا ان هذا هو مثل الشجرة المثمره تقزف بالحجاره لتلقى بأفضل الثمر



الاثنين، 9 مايو 2011

الى كل المصرين ..... لا تشربوا السم


ايه رأيكم لو فوقنا كلنا وبطلنا ننجرف زى الخرفان ورا اى اشاعه او اى حدث ونتناقل الكلام ذى البغبغانات وننقسم كل مره الى نصفين ، نصف يبيهاجم ويلوم والنصف الاخر بيدافع وبيبرر .
وما فيش حد بيقعد يحلل هو ليه حصل ده وبالذات دلوقتى او ليه تهموها فى دول بالذات .......... او ليه الحاجه دى بعينها؟!
ايه رأيكم لو رجعنا كلنا ايد واحده تانى .
بس المره دى ايد مُصره على البناء واستكمال المشوار ... ايد ناس وشباب واعى وسواعده شديده ؟؟


ايه رأيكم نقتنع ان اللى بيحصل ده لا مسيحين عادين ولا مسلمين ولا سلفيين ولا اخوان هما اللى بيعملوا اللى بيحصل فى البلد ده ..... 
وان دول هما هما اللى كانوا بيبعتوا ناس فى الشوارع ايام الثوره يروحوا فى اطراف الشوارع ويضربوا نار علشان يخوفوا الناس ويروعوهم ويكمل من الناحيه التانيه الاعلام الموجه (متمثل فى الزعيم انس الفقى ) بنشر الاشاعات والاخبار الملفقه عن انتشار البلطجيه ، اللى فى نفس الوقت كانوا هربوهم من السجون علشان يسهلوا انتشار وتصديق فكرة انهم فعلا بلطجيه اللى بيعملوا كده ؟؟؟


ايه رايكم لو  نقتنع انهم يا اما يهود خوفاً من توجه المصريين فى التعاطف مع الفلسطنيين وسعيهم للمصالحه 
او هما فلول ظباط امن الدوله المجروحييين اوى اوى ..... 
او انهم رجالة حزب دولة بورتو طره الموجودين متجمعين بكل قواتهم وادمغتهم الوسخه فى مكان واحد بشكل ما اظنوش اتكرر قبل كده  ( انهم ياتجمعوا بالشكل ده فى وقت واحد كل الوقت ده ....... 
او مثلاً علشان ننسى مبارك فعلا وعياله من المحاكمه  - (زى ما ده فعلاً حصل وتكون دى هديه من احباب مبارك فى الخارج امريكان او يهود او ايا كان)  -  (نظام اهه اى خدمه هنحميك هنحميك ، وهنخليها احكام عرفيه وساعتها الجيش ممكن ما يحاكماكشى ويطلعك بتشريفه كمان ..... مهى احكام عرفيه بقى ...... وان كان لو السيناريو كده .... غالبا هيبقى افضل طبعاً انا كاتبه اختصاراً بس وليس تفصيلاً) .........
ليه ما يكونوش شوية مندسين (بس مندسين فعلاً وعملاء للامريكان ) امثال مايكل منير ده ولا اسمه ايه مش فاكر ..... اللى عمالين يجروا على السفاره الامريكيه كل حبه  (بما يعد خيانه عظمى لمصر ويجب ان يحاسب عليها كل من فعلها او حرض عليها )

انا كنت قريت مره عن البرادعى انه كان فكر فى 2005 انه يقسم مصر لنوبه ومسيحيين ومسلمين ...... ايا كان هو فعلا ذكر كده او لا.... بس (كده ده ) فعلاً موجود  ......

يا جماعه انا ملاحظ ان فيه اشاعات تانيه كتيره بدأت تتناقل وتتنشر زى ما تفتحوش لاى حد ، فيه ناس بتخطف مش عارف ايه ... نصابين بتوع ايه ..... هدفها كلها لو ركزتوا زعزعت الشعب وتخويفه تانى وتفقيده الثقه فى بعضه البعض .......

اسرائيل قالت هنولع فى مصر لو فتحت معبر رفح ..... انتوا مفكرينا تقصد حرب ؟!! تبقوا فعلا غلابه وعلى نياتكم 


طبعاً يقصدوا فتن وشغل مخابرات وموساد ....... وده ان دل فيدل على انهم لهم ناس جاهزه ولهم نظام شغال تمام فى البلد ولهم جرايد ومجالات وقنوات كمان .......
 ليه ما نفوقشى ونقول لكل دول لأ ...... ليه ما نركزشى ونرجع  لكلمة  ( ايد واحده ) تانى ؟!


احنا مش اتفقنا ان بايدينا مصر بكره احلى ؟!!

ليه نخليها بايدينا مصر بكره اوحش ؟!!
دا لو حرب ارحم واحسن لكرامتنا على الاقل يبقى حد حاربنا واحنا حاربنا وخسرنا ... لكن نهدمها بايدينا بسبب اننا بنصدق اى حاجه فى اى حاجه
انا متهيقلى نموت بدرى واحنا اذكيه افضل بكتير ما نعيش طول عمرنا اغبيه

تعالوا نقول للاشاعات تانى لاء

تعالوا نبطل اتهام لبعض 
تعالوا نشغل بقى عقلنا
تعالوا نكمل ثورتنا

حدثنى صاحبى

حدثني اليوم
أحد الأصدقاء بنبرة يائسة بسبب ما يتعرض له الاسلاميين في مصر من هجمة ضاريه سببها الرئيسي أنهم ينادون بتطبيق شرع الله
الله الذي خلق الكون و ما فيه و من فيه و أنزل كتابا" مطهرا" 


قال عنه رسول الله صلى الله عليه و سلم : 

كتاب الله فيه خبر ما قبلكم ونبأ ما بعدكم وحكم ما بينكم ، هو الفصل ليس بالهزل ، هو الذي لا تزيغ به الأهواء ، ولا يشبع منه العلماء ، ولا يخلق عن كثرة رد ، ولا تنقضي عجائبه ، هو الذي من تركه من جبار قصمه الله ، ومن ابتغى الهدى في غيره أضله الله ، هو حبل الله المتين وهو الذكر الحكيم ، وهو الصراط المستقيم ، هو الذي من عمل به أجر ، ومن حكم به عدل ، ومن دعا إليه هدي إلى صراط مستقيم.
 

و فصل الله هذا القرآن و فسره من خلال صحيح سنة نبيه المصطفى صلى الله عليه و سلم الذي قال :
( تركت فيكم ما ان تمسكنم بهما لم تضلوا بعدي أبدا" كتاب الله و سنتي )
 
و انني أحب أن أطمئن صديقي هذا و أقول له لا تحزن فما يحدث اليوم أمر أخبرنا به رسول الله صلى الله عليه و سلم من 1400عام مضت حينما قال:


( بدأ الاسلام غريبا" و سيعود غريبا" فطوبى للغرباء )

و قوله صلى الله عليه و سلم :
( سيأتي زمان على أمتي القابض فيه على دينه كالقابض على جمرة من النار)
 

و تذكر قول الله تبارك و تعالى على لسان سيدنا موسى في كتابه العزيز
 (قال موسى لقومه استعينوا بالله واصبروا إن الأرض لله يورثها من يشاء من عباده والعاقبة للمتقين) ( 128 الأعراف)

اجعلها شعارك صديقي و العاقبة للمتقين
منقول

الجمعة، 6 مايو 2011

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...