السبت، 21 مايو 2011

pause ............... خدلك بريك





نرجع بقى للحاله الاصليه اللى اتفقنا عليها فى بيت المدونين








وتطبيقاً لهذه القاعده فقد قررنا الاتى :


اولاً :    حـــــــــــــــالة تييييييييييييت كبيره (فى اى حد مضايقانا او حاجه مزعلانا او شئ خايفين عليه ...... طظ ... كفايه بقى ما يستاهلوش اكتر من كده ...... اخدوا حقهم معانا خلاص ...... وعملنا اللى علينا  )




ثانياً :   حـــــــــــــاله من الاستجمـــــــــــــام العام ومحاوله لنسيان اى ( قـــــــــــرف).


ثالثاً  :  مصــــــــــــــــــــر بتولع يا فوزيه ................ اوك مفيش مشكله هريح شويه وارجع اطفيها معاكم لانى لو فضلت اطفيها معاكم بالمَيه هتولع اكثر لانها  حريقة سببها ماس كهربائى ( زى ما اتعودنا ) وحرايق الكهرباء مش بتطفى بالبساطه دى ولا بكترة المَيه بل بالعكس كل ما حاولنا نطفيها اكثر كل ما ولعت اكتر


لذا فقد قررت انى هريح شويه وافكر بروقان لما اهدى واركز ، اذاى اطفيها ، علشان اعرف فعلا اطفيها و ماولعشى انا كمان معاها


رابعاً :  لازم اروح اتفسح فى اى مكان ان شاء الله فى اقرب وقت ممكن ، وفعلا جارى التخطيط اهى فرصه نستفاد بحالة الولعان اللى فى مصرنا حبيبتنا ( اكيد السياحه مضروبه والحاجه بقة رخيصه)  ...... وش ابتسامة واحد ندل :))


خامساً :  عايز بعد ما اتفسح ارجع ان شاء الله واركز فى شغلى اوى اوى اوى وطظ فى اى شئ تانى .....لما بتنجح فى شغلك ... بتلاقى قرايبك بيحترموك ويعملولك الف حساب ......
اما لو فشلت كل واحد فيهم بيعمل عليك دكر وابن بارم ديله واللى فاهم الحياه صح واحمد زويل التانى ...... يا اما تلاقيه لو قريبك يسيبك ، لو صاحبك ينفضلك او مراتك تتخلى عنك .......... وطبعا مش كل الناس كده ... اكيد فيه ناس محترمين.


سادساً : عايز ابقى بجح شويه بزياده وادور على مصلحتى وما اتكسفشى ...... لو ليا فلوس كتيره عند حد مستنطع فيها ومأخرها اربع شهور عن ميعادها اتصل بيه وافكره باللى حصل لحسنى مبارك لما ساب الحكومه ترغمنى غرامات مرور كتير حصل فيه ايه  وانه مش اجدع من حسنى مبارك عندى يعنى  ......
ولو بدى واحد فلوس كتير لاى سبب اطلب منه وصل او ورقه بيهم علشان ما يعمليش فيها اهبل بعد كده ويبقى يا مش فاكر هما كانوا كام بالظبط او مش فاكر انى اديتهومله خالص ،او يأخرهم اربع خمس شهور برده  وفى الاخر هبقى انا الغلطان




ثامناً : ان مفيش سابعاً اصلاً ( مش عايز اكتب سابعاً ، حد عنده اعتراض؟؟؟)


تاسعاً : محدش له عندى حاجه ، اعامل الناس باحترام اكيد ...... لكن ماحدش له الحق انه يتدخل فى حياتى الشخصيه خلااااااص او يقولى اعمل ايه .... كفايه بقى انا حاسس ان حيالتى بقت مراحيض عامه ، احساسى انى عايز ابقى مصدر راحه للاخرين وتحقيق اهدافهم لا يعنى انهم يتدخلوا فى تفاصيل حياتى


عاشراً واخيراً : انا خلاص لازم انفذ الكلام اللى فوق ده ان شاء الله


احد عشر :  اه احد عشر ايه المشكله
نعم ؟؟
قولت فى النقطه عاشراً  انها  "عاشراً و اخيراً" ؟؟
ايه المشكله يعنى هو انا مش لسه قايل فى تاسعاً اللى قبلها ان  محدش له عندى حاجه  اشمعنى دى بتنسوها ؟؟؟
هو احنا دايماً كده ننسى البنود اللى بتدى للاخر حقوقه ونبقى فاكرين كويس البنود اللى نكتفه بيها ......




اثنى عشر :      انا خلصت خلاص



اراهن : ان حد اخد باله انى ما قلتش احد عشر برده ..... نياهاهاهاهاهاهاهااااااع







هناك 8 تعليقات:

الصديق الوفى يقول...

السلام عليكم ازيك يا اخ ويكا انا عجبنى اوى البوست ده بس ينقصه شىء فى الترتيبات دى انك تجعل لله فيه نصيب فهذا هو مايريح حقا وليس الدنيا. سلامى اليك

Haytham Kilany يقول...

صباح الفل والروقان والخطط الجامدة
اديها بريك من ماركة
خراب يا دنيا عمار يا دماغى
او من ماركة
طظ
أو من ماركة
يا حضرة العمدة يا حضرة العمدة
خير يا واليه
الويه دخلت البيوت يا حضرة العمدة
عقبال النور يا وااااليه

mrmr يقول...

كويس خالص بس نفذ بجد
وانا كمان ناويه اخذ بريك واهدى اعصابى هههههههه

شكرا على النصيحه

zizi يقول...

من حقك تاخد بريك ومعاه واحد شاي ولا حد له عندك حاجة ...اقولك حاجة..اضربها صرمة تعيش مرتاح ..بس معلش نقي اقدم واحدة عندك عشان هي ما تستاهلش واحدة جديدة ..خسارة فيها ..هي اصل طولها زي عرضها وأحياناً بيكون عرضها أطول من طولها ..حا نعترض ؟؟؟

ويكا يقول...

الصديق الوفى


صدقت

ياااااااااااااااارب

يا ارحم الراحمين

ارحمنى وتوب علي انك انت التواب الرحيم


اللهم عافنى واعف عنى ، انا واخوانى المسلمين

واهدنا جميعاً يا ارحم الراحمين

ويكا يقول...

مهاترات عاقل

عقبال السيراميك كمان يا معلم

ويكا يقول...

مرمر

والله العظيم صدقينى


دماغك هتفك وهتلاقي نفسك الوحيده من اللى حواليكى اعصابك هاديه ومبسوطه

فعلا الاهتمام بالاخبار ده ضغط عصبى يفجر الدماغ والاعاصاب والله

ويكا يقول...

زيزى


صدقينى اقدم صرمه دى حاجه كتيره اوى كمان وخساره الصارمه حتى

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...