الجمعة، 12 أغسطس، 2011

المرأه ...... والعالم الاخر




بعد فتره من التدقيق والتفحيص والتمحيص اتضح ان المرأه عالم اخر تماماً مختلف عن الرجل
بل ليس لها علاقه به من قريب ولا من بعيد اللهم بعض الاشياء الفسيولوجيه الطبيعيه المتفق عليها جنس البشر فقط
اما الافكار والمشاعر والمتطلبات والاهتمامات وطريقة النظر الى الاشياء والاولويات والقدره على القياس .... فكل هذا لا تجد اى تشابه بينها وبين الرجل فيه الا ما ندر
فهن بحق عالم اخر تماماً يجهله الرجال حق الجهل .... ولا يمتلكوا فيه اى من معطيات او مفاهيم تلك المرأه فالرجل دائماً ما ينظر الى الامور بشكل مختلف (هذا قياساً على خلفيته وصفاته المختلفه عن المرأه) ومن هنا يأتى دائماً الاشكال
فالمرأه ترى ان الرجل لا يتفهمها جيداً ............
 والرجل يرى نفس الشئ ......
فكل النساء يشتكين من عدم فهم الرجل لهن .............
 وكل الرجال يشتكون من عدم قدرة المرأه على الاستيعاب وفهمهم  ...... وقصور عقلها ......... (الى حد اتهامها بالغباء فى معظم الاحيان ).
والحقيقه هى ان الاثنان بنى بشر يحملوا قدر كبير من الجينات الوراثيه والصفات الحيويه المشتركه.
اذاً ما المشكله ؟؟!!
المشكله هى ان الرجل لم يكن انثى من قبل ولا المرأه لم تكن رجل من قبل ...فلا يعرف احدهما عن حقيقة الاخر الكثير  وكل منهم فى فلك يسبحون
لا هذا حاول بجديه فهم المرأه  ( وطبيعة عقلها وفكرها واحتاجاتها ) ........ ولا هذه حاولت  بجديه فهم الرجل ( وطبيعة عقله واولوياته واهتماماته ).
تجدوا النساء (السواد الاعظم منهن ) يشتكين من اربع شكوات متكررات من ازواجهن  (وكأن هذه الشكوات اسطنبه ) وهى :



  1.           ما بيقعدشى معايا ودايماً مشغول .... يا بيتفرج على الماتشات ليل نهار يا قاعد على النت بينام ويصحى عليه .... يا ليل ونهار مع اصحابه تحت وما بيرجعليش الا على النوم .
  2. بيتجاهلنى وبيسفه من رأيى ولو اتناقشنا فى شئ بيقلب بخناقه شديده ويزعل ويقوم ويسيبنى ويقعد يبرطم ويسب ويلعن.
  3. دائماً يقولى انى غبيه.
  4. غالبا بيبص لواحده تانيه وشكله بيلعب بديله ( ودى بتتفاوت بصراحه من ست لست .... بس لو مش موجوده بيبقى فيه حاجه تانيه الست حطاها للراجل مكانها مؤقتاً لغاية ما يبدأ يبص لواحده تانيه ).

 اما الرجال فتجدوهم (سواد الرجال ) يشتكوا من بعض الشكاوى شبه واحدة المبدأ مثال:



  1. عايزانى قاعد جنبها ليل نهار وكأنى مخلوقلها ...... اجى من الشغل كأنى لسه جاى من الفسحه تقولى مش خلصت شغلك خلاص تعالى اقعد معايا بقى ........ وكأنى كنت بلعب ولسه جاى فايق ومش طالع عين اللى خلفونى.
  2. عقلها صغير واراءها غريبه جداً ولو اتناقشت معاها فى موضوع تقعد تفتى وتبقى مقتنعه ان رأيها ( الغريب ) هو اللى صح وتبقى عايزانى اخد بيه ولو ما اخدتش بيه يبقى انا مش بحترمها ومش بقدرها ومش ............................................
  3. مش بتفهم انا عايز ايه بسرعه واديما مستعجله وبتبوظ اى حاجه كنت ناوى اعملهالها.
  4. خنقانى ومحاوطانى وعامله نفسها المفتش كورومبو ودايما "كنت فين – جاى منين – قابلت مين – كلمت مين ؟؟ "  ودايما تقعد تفتش فى الموبايل بتاعى فى المكالمات والرسايل  وتتلصص على الايميل وتفتشه لو نسيته مفتوح.

والسؤال هنا ؟!!!!
هل ده كويس ؟؟!!
جميله الحياه كده ؟!!!
طب مش ملاحظين ان الاربع نقط هناك هما هما الاربع نقط هنا ؟!!!! وده مش متعمد لا والله دا ده فعلا اغلب الشكاوى من الطرفين
طب ده معناه ايه ؟!!!

................ معناه انهم مش اصحـــــــــــــــــــــــــــــــــــاب ...........

معناه ان كل واحد منهم فى وادى مقتنع بأفكاره ودماغه لوحده ............... وان كل واحد منهم واخد جنب من التانى.
الراجل عايز يفرض مطلق سيطرته على الست ويبقى فى الاخر كمان شايف ان ده اقل واجب والطبيعى والمفروض ..... اوك ...... ماشى يا سيدى ....... وهى موافقه ...... ( بس فين التقدير بقى للكلام ده ؟!! ) ........ هلى بتكافئها على هذه الطاعه ؟!!!
لا اظن

الست بقى عايزه جوزها يتربط جنبها ليل نهار ........ حتى ولو زهقت منه يبقى قاعد فى الانتريه مستنيها منين ما تعوذه تلاقيه ............. استاند باى يعنى ............ مش عايزاه يخرج ولا يروح ولا يجى ..... يترزى هنا جنبها ماهى ما بتخرجشى كتير اشمعنى يعنى .
عايزاه خاتم فى صباعها (حتى ولو مش واخده بالها من الحكايه دى بس لو دورت هتلاقي نفسها كده فعلا ) ............... عايزاه لما تقوله فكره يطلع جرى ينفذها ......... و طلباتها كلها مجابه وانه دايما يقدرها ويقدر رغباتها حتى ولو كانت مستفذه ........... وليل ونهار قاعد يسبلها ويقولها كلام حلو ....... وفى الاخر تزهق هى بسرعه .......
طب ده كلاااام؟؟؟؟!

فيه كلاااااام كتير وتفصيل اكتر
لكن انا مش عايز اطول ..........
الا انى عايز نخرج بحاجه من الكلام ده .............


ضعوا الله بينكم و ....
اتصــــــــــاحبوا  ......................... اتصـــــــــــــاحبوا 

اعتبرها واحد صاحبك من العبط اللى انت مصاحبهم يا عم ................. وانتى اعتبريه واحده رزله ومتسلطه وحشريه من صحباتك يا ستى ...............
مع ان لو اتصاحبتوا مش هتلاقيكم كده والله .................
احكوا لبعض كل حاجه ............... حتى ولو حاجات ما ينفعشى تتحكى لحد وبالذات لبعض ...............
صدقونى الحكايه دى بتنفع اوى ........... والدليل هتلاقوا اعز اصحابكم هما اللى انتوا بتحكولهم ادق اسراركم .............. لان دول اللى انتوا حسيتوا ان حياتكم الخاصه بقت معاهم ....... فالاولى ان يبقى الزوجين هما اللى كده .....
بس بشرط حاولوا ما تعملوش حاجه بقى لو حكيتوها لبعض تجرحوا مشاعر بعض ....... ده احسن بكتير من انكم تعملوا حاجه وحشه وتضطروا تخفوها عن بعض ........

اخر الكلام ........................


ايات لقوم يتفكرون ................ تفكروا يرحمنا ويرحمكم الله
البوست كان فى الاصل هتريق فيه على الستات ..... لانى عدو المرأه زى ما انتوا عارفين نياهاهاهاهاهاهاهاع  ............ بس طلع كده لوحده  كالعاده ...............يلا قد يكون ربنا اراد لحد بيا خير ................... فاللهم تقبله يارب العالمين

شبحانك اللهم وبحمدك سبحانك لا اله الا انت استغفرك واتوب اليك

هناك 13 تعليقًا:

ويكا يقول...

وهو انتى ليه نسيتى

"ضعوا الله بينكم "

دول خطوتين مش واحده ........ ما ينفعشى ينفصلوا

ويكا يقول...

للى قفلها فى وشى

طب اعمل ايه انا بقى ؟؟!! اقول ايه طيب ؟؟؟

اكيد فيه سبب للتحول ياباشا ........ مفيش حاجه بتحصل من غير سبب

ويكا يقول...

هههههههههههههه

مين قال انى مش عدو مرأه ....... دا انا عدوها وعدو اللى يتشددلها كمان

طب شوفى البوستات القديمه حتى كده

ههههههههه

ويكا يقول...

اه فعلاً

انا فجأه جات فى بالى الفكره دى و حسيت انى عايز احتفظ بيها لنفسى لوحدى واقراءها وابتسم

وبعدين حاسس ان فيها خصوصيه عاليه اوى بينى وبين اللى بيقروا ويعلقوا حتى ولو الكلام عام خالص ..... الا انه فيه نوع من التواصل الاعلى

ويكا يقول...

ههههههههههههههه

شكراً يا ستى

ويكا يقول...

جامده اوى الفكره اللى انا عاملها دى

بس انا عايز حاجه اللى يعلق يكتبلى سيم علشان اخاطبه بيه ما دام مش هعرض التعليق ولا هكتب الاسم ............ او نسيبها مفتوحه كده وتبقى زى اللعبه كل واحد يعرف تعليقى اللى له

احلى حاجه ان الناس اللى مش عارفه هتفكر انى اتجننت هههههههههه

ويكا يقول...

هههههههه

حلوه فاكيسه دى

ويكا يقول...

مش عارف صح ولا غلط

التحليل ده محتاج افكر فيه شويه ..... لانى مش مركز اوى دلوقتى بصراحه ....... بس من الفكره العامه غالبا كده ممكن يكون كلامك مظبوط ....... بس ما اظنيش كده فى كل حاجه اكيد فى حاجات معينه

بس برده لسه هقرى الكلام تانى وافكر واقولك

اظن التعليق ده واضح من غير السيم ههههههههه

ويكا يقول...

لا ياباشا مش انا

ويكا يقول...

لا ياباشا مش انا

ويكا يقول...

اهو التعليق ده بقى بالذات كان لازم يبقى ليه سيم
علشان اجاوب واقول:

....... وانا كمان :)) ...........

ويكا يقول...

الناس اللى مش بعلق عليهم لان تعليقهم زى ما هما عارفين وصلنى خلاص و مش محتاج رد

ومتشكر فعلا على تواصلهم وانا سعيد فعلا باحتفاظى بتعليقاتهم

شكراً

ويكا يقول...

ههههههههههههههههههههه

يا سيدى ولا يا ستى والله ما انا

الله

ما تروح تسأل صاحب الشأن ياعم الحج

انا ايه عرفنى بالكلام ده

:))

انا لو اعرف ان الفكره دى كانت هتعمل كده فى التعليقات كنت عملتها من زمااااااااااان هههههههههههههه

Related Posts Plugin for WordPress, Blogger...