الأحد، 22 يناير، 2012

فى ظل الوحده



اللهم قنا الفتن .....

ما ظهر منها وما بطن ....

اللهم ارحم زوجة حصنت زوجها




رساله قصيره 1



يفتقد العالم الاسلامى عامة والعربى خاصه احساسه بأهمية التنميه


البشريه الحقيقيه لا المزعومه ورفع وتطوير المهارات الانسانيه لديه مما شارك فى 


سرعة هبوطه وعدم تطوره 

وتحوله الى كائن مستهلك , مستمتع بالانتظار والترقب والكسل

وخلق فينا جزءاً كبيراً من الاناماليه والتواكل ..... و نمى بداخلنا الروح 

السلبيه والاهتمام بالملذات اكثر من استمتاعنا بالعمل والمشاركه الفعاله

لقد عاش العالم العربى حقبه من الزمان لا يُحسد عليها من 

استغلاله من قبل حكام جهال فارغين من اى مضمون او فكره او اى امل فى غد مشرق

مما افرز شعب متباطئ فاقد الامل فى اى تحول الى الاصلح او الى الرياده حتى ولو قام 


هذا الشعب بثورة تذهل العالم بأثره

اننا فى حاجه لتجديد الدماء ..... وغسيل للعقول وافاقه من حالة 

االتنويم المغناطيسى التى تسببت لنا فيها الانظمه الفاسده المُغيبه الخائنه



الخميس، 19 يناير، 2012

جزء من الحب



هل فكرت يوماً فى ان الكلب هو الحيوان الوحيد الذى لا يعمل شيئاً من أجل اكتساب 

رزقه ؟

 فالدجاجه تضع بيضاً والبقره تدر لبناً وعصفور الكناريا يغنى 

بصوت شجى ..................

أما الكلب فلا يحسن الا  ...........

الحب .......

هلا جربت يوماً ان تعطى الحُب ؟!!

هل جربت يوماً ان تكون مصدر الحب واظهار الاهتمام لمشاعر واحاسيس أعز الناس 

؟!


ان لم تكن جربته ..... فأعلم انه فاتك الكثير .....


************

انا هاريحك

بصوا يا اخوانا 
البوست ده 
هعتبره اول واخر بوست اتكلم فيه فى الموضوع ده

وبالذات بعد الكم الهائل من الغير معروفين اللى بيجولى ويخنقونى ويكلمونى فى ام الموضوع ده

يا اخوانا انا بعلن بكل وضوح اهه 
****

والله العظيم مش انــــــــــــــــــا 

لا انا بتكلم عن حد ولا حد والله العظيم بيتكلم عنى 


مش انــــــــــــــــــــــــــــــا المقصود 

خلاص؟!

************************** 

اللى فات ده كان التريحه .... اتمنى بقى ما اشوفشى التعليقات الغير معروفه اللى بتجيلى كل شويه دى بتسألنى او بتناقشى فى الموضوع دى 

ده اللى يخصكم ويخص اسألتكم 

*************************
بخصوصى انا بقى واللى يخصنى :


اسمحولى اسأل نفس الغير معروفين دول شوية اسأله :

س1 : ما علاقتك بالمدعوين محل الاسئله دى ؟
س2 : انت مُصر تعرف ليه شئ لا يخصك او لا يمت لك بصله ؟
س3 : هو انتوا كتير ولا واحد بس وكل شويه يتحول ؟
س4 : من انت ؟
س5 : هو انت مخنوق منى او مننا ليه ؟
س6 : هو انت رابطنى بأى حد تانى ليه اصلاً ؟
س7: انت متجوز او متجوزه ؟
س8: عندك عيال ؟ ( فى حالة متجوز)
س9 : هل انت مؤمن بالتعدد ؟
س10 : انت او انتى لك كام اخ ؟
س11: انت اخر مره اتخانقت مع شريك حياتك امتى ؟ ( فى حالة متجوز)
س12: انت بتخنق عليا انا بس ولا على باقى الناس؟
س13: الاسئله والتعليقات اللى بتسيبهالى دى حصرى ليا بس ولا لاء ؟ ( اصل انا بحب )الحصرى اوى.
س14: انت متأكد ؟
س15 : انت تعبت ؟
س16: هل انت منتظر منى سؤال كنت المفروض اسألهولك وما سألتوش ؟

*********


اخيراً تعالى بقى  نتصالح ونلعب لعبه كنت بلعبها زمان

انا هقول كلمات فوق بعضها وانت رد عليها بكلمات بنفس الترتيب

احمد
حبيبى
انت
انا
هو
لا
ليه لا؟
ممكن
مصر
القصه
اللعبه
مدونه
شراب
الواد
مراتى
جوزى
سنه
عام
ثوره
حلمئه


بس خلاص



وحده



ما أأنس الوحده

فهى الشئ الوحيد الذى لا يتركك 



الأربعاء، 18 يناير، 2012

وانا نايم ( تحديث )











انا وانا نايم 
مش ببقى انا 
ببقى حد تانى
( ببقى رومانسى اوى )
الله يخرب بيت كده

انا تأكدت النهارده 
ان الانسان فى مرحلة ما بين النوم والصحيان دى 
بيبقى متحرر من كل قيوده ( الوضعيه )
بمعنى
ان الانسان وهو صاحى 
بيبقى ذو طباع معينه 
احيانا بيبقى
 صارم جداً
قاسى جداً
حازم جداً
غتت اوى
جاف احياناً
قليل الذوق كتير
.
.
.

وهلم جرااا


لكن من الواضح برده 
ان مش بالضروره كل الطباع دى تكون 
حقيقيه
نعم
قد تكون مصطنعه
فقد تكون ( حوائط صد - هروب  - إلتزام - اضطرار - قرار  - قلق ..... إلخ )


مما يثقل كاهل صاحبها بشده طوال اليوم
مما يجعله 
احياناً
ينفضها عن كاهله فجأه لوهله
ويستسلم لطبيعته 
( فقط فترة ما قبل النوم ) 
كى يستطيع ان ينام بهدوء 
ويعود لفطرته الملائكيه
بدون تصنع او إختلاق
ويكون اكثر صدقاً .... اصدق تعبيراً
مما يجعله يبوح بأشياء كثيره 
قد يكون من المستحيل البوح بها فى الحقيقه




*********************
تنبيه هام


اللى فوق ده
ليس للزوجات ( المصريات )
لاحسن واحده بنت حلال تقول اعمل بنصيحة وئام
وألحق جوزى وهو بيتطوح على السرير قبل ما ينام
( مرحلة ما قبل النوم )
علشان يقولى كلام رومانسى او يقر ويعترف باللى مخبيه


فيقوم يطلقها 
وتيجى تمسك فى خناقى انا


عزيزتى القارئه 


انا قلت بيبقى على طبيعته مش بيبقى رومانسى 


يعنى غالبا فعلا هيطلقك 


فنصيحه 
غورى من وشه الساعه دى نهائى 
وحاولى حتى ما يسمعشى صوتك


اللهم بلغت اللهم فأشهد


*****************


انتهى

خلوه ... وصوت ندى ... وتدبر

كان يقول : كباية شاى مع سيجارتين

وانا اقول : خُلوه واطمئنان نفس مع آيتين 


***********************
ان الله لا يهدى كيد الخائنين


***********************

ان النفس لأمارة بالسوء

***********************

لا يضيع اجر المحسنين


***********************

ان الحكم الا لله 
عليه توكلت وعليه يتوكل المتوكلون


***********************

فصبر جميل 
والله المستعان على ما تصفون   ..... ( دمعه )

***********************

نرفع درجات من نشاء وفوق كل ذى علم عليم

***********************


انتم شر مكانا والله يعلم ما تصفون

***********************

انما اشكوا بثى وحزنى الى الله 

***********************

انه من يتقى ويصبر فان الله لا يضيع اجر المحسنين

***********************

الحمد لله رب العالمين



الثلاثاء، 17 يناير، 2012

ويكا ... وكلامه الانتيكا


ليس بالضروره انك تحب 
انك تمتلك من احببت 

********************************

اختلف زى ما انت عايز
لكن ما تجرحش

********************************



قول بحبك زى ما انت عايز
لكن مش لازم يكون كلامك صدق


********************************




"  ما اقدرش اعيش من غيرك  "
الغريب انه بيعيش يا أخى !!!!


********************************




انا سبت حاجات مغريه كتيره علشانه
وهو سابنى علشان حاجه دنيئه اوى
عجبى


********************************




"احنا مختلفين تماماً
اذاً
احنا ننفع لبعض جداً  "

كنت مقتنع بيها فتره طويله اوى 


********************************




اختيارك غير موفق
وستثبت لكى الايام 
لكن حينها 
لن اكون هناك لتعتذرى


********************************




واحده مجهوله بتعلق عندى اسمها 
" واحده فاهمه "
عمرى ما شفتها فاهمه اى حاجه 
خساره 
كان نفسى تكون فاهمه 


********************************




واحد مجهول بيعلق عندى بحرقه
نفسى اعرف السبب 
 مش علشان ازيل السبب 
لا
علشان 
اكتر منه


********************************




" انت واحد خربؤ " 
هى هى بالظبط
" انت واد تييت "


********************************




انت حد جميل اوى 
انت حد حساس جدا
انت حد  ........   ولا بلاش دى 
الغريب ان اللى بيبقى واقف قدامها بيبقى فرحان اوى
ما يعرفش ان  حد  ده 
كل البنات بتتكلم عليه .....
 يعنى مش هو 





********************************




المرأه دائماً ما تبحث عن الرومانسيه
والرجل دائماً ما يبحث عن الراحه
علشان كده عمرهم ما هيتفقوا

********************************



عندما يُحدث الرجل المرأه بقمة الرومانسية

اذا اعلم انه بالقطع ليس زوجها

والدليل على كده 
اسأل عليه مراته

هتقولك : " دا راجل خربؤ "

"لمعرفة معنى : خربؤ ... انظر اعلى "


********************************




"حتى لا يطير الدخان"


لا ما عنديش تعليق عليها
الجمله جت فى بالى بس 


********************************




نفسى اكتب بوست طويل اوى اوى والناس تقراه 

انا احياناً ببقى سادى من غير سبب


********************************




انا بلاقى نفسى ادمن ساعات فى جروبات على الفيس 
و بعرف لما بدخل الجروب بالصدفه ويعجبنى و اجى اشترك فيه 
الاقينى ادمن
:))

********************************




عايز اقول
الدنيا برد ) جداً 

لانى للاسف

نسيت ... ( ساقعه )
بالسين ولا بالصاد 
علشان كده هى 
 برد )


********************************




هو الكم الهائل من البنى ادمين اللى على الفيس ليل نهار ده 
بيجى كله منين ؟!
واضح فعلا اننا 85 مليون
منها لله الثوره اللى اجبرتنى استعمله

بس مش وحش برده 
اهو بيدى للواحد فرصه برده يغتت على خلق الله


********************************




قال هنرى فورد :


اذا كان هناك سر واحد للنجاح ، فهو القدره على ادراك وجهة نظر 


الشخص الآخر والنظر للاشياء بالمنظار الذى ينظر به اليها ، واى فرد 

عادى يمكنه ان يلمس صدق هذا القول ورغم ذلك فإن 90 % من 

الناس يتجاهلون هذه الحقيقه 90% من الوقت"





********************************



اذا اردت إقناع الناس بوجهة نظرك ... اسأل اسئله تحصل من ورائها على الاجابه بنعم



********************************



لم يقابلنى احد ذو شأن الا ان تنبأ لى
 بمستقبل باهر و شأن عظيم 
نفسى اعرف 
هو المستقبل ده من عند سن كام كده ؟!!
لاحسن انا زهقت بصراحه


********************************



 (دع الطرف الاخر يحتفظ بكرامته )

مبدأ 
احياناً كثيره لا انفذه
حينها اشعر كم انا قاسى القلب 

بس هما اللى بيستفزونى والله يارب



********************************



تولوستوى ..... وهو تولوستوى 
مراته كانت منكده عليه
لدرجة انه هرب من البيت منها وهو فوق ال80 سنه
ومات من البرد والالتهاب الرئوى
واخر وصيه له
ان مراته تتحرم تشوفه

والله العظيم كان طيب


********************************


اللفتات البسيطه لها اثرها العظيم فى الحياه الزوجيه

لذلك انصح كل راجل 
انتقاماً من زوجتك
اوعى تظهر انك اخدت بالك من اى حاجه حلوه


********************************



انتهى 

سعدت بكم



الاثنين، 16 يناير، 2012

انا ... والمرور ... والرخصه ... وهشام بيه

بدأت الحكايه العام الماضى عندما ذهبت لمرور طوسون لتجديد رخصة السياره
عندما انتهيت من جميع الاجراءات ولم يتبقى سوى استلام الرخصه  الكمبيوتر 
لأفاجئ انهم يسلمونى تصريح كرتوني بدلاً من الرخصه الكمبيوتر ( بحجة ان الحاسب عطلان ) 
ليست هذه المشكله
المشكله تكمن فى ان هذا التصريح مؤقت بوقت ، اى اننى لابد وان اترك عملى مره اخرى وأطخ مشوار لغاية المرور فى يوم عمل طبعاً ، لاعادة التعامل مع جهه حكوميه مره اخرى لاستخراج رخصتى ( وهذا امر فى حد ذاته قمة الظلم ) .
المهم  ....
 برده ليست هذه هى المشكله 


المشكله هى اننى كعادتى ..... كبرت دماغى ...... وبالذات فى ظل الظروف اللى البلد فيها دى
( اه استغلال للظروف بصراحه .... انا اقدر اقلكم انا كنت من اكبر المستفادين من ذلك الاضطراب الامنى المتفشى فى المجتمع ده ، وحالة عدم الاستقرار التى تشهدها البلاد  ..... فأنا لم اكن محتاج انى اتعب نفسى وأذهب لذلك الوجع دماغ والخنقه الروتينيه اللى اسمها المرور).
ولم اكدب خبر وفضلت ماشى بالسياره طول الوقت ده كله من غير ما اجدد الرخصه الكرتونيه هذه .
 إلى ان ابتلانى الله بذلك الوزير الجديد ( وزير الداخليه )  اللى اول حاجه عملها هى انه وصاهم عليا وقالهم :
هاتولى الواد اللى زى الكوره الكاوتش دوات اللى ماشى من غير ما يجدد رخصته ( الساريه لسه ده )
وهما كمان لم يكذبوا خبر
 وقفشونى يا معلم ، قبل ميعاد تجديد رخصتى الحقيقى بشهر ........... نعم   شـــــــــــــــــــهر 
يعنى سابونى سنه كامله ...... وزعلانين عليها قبلها بشهر ( خدوا بالكم انه مش ذنبى اصلا من الاساس )


المهم ادونى وصل مدته 7 ايام فقط .. فى خلالها لابد من الذهاب لمرور طوسون لدفع ( الغرامه .... واخدلى بالك .. غرامه  ) واستخراج رخصه عليها القيمه.
وطبعاً زى ما انتوا عارفين ... عملت ايــــه ؟!!
برده كبرت دماغى طبعاً ...... وزى ما انتوا متوقعين حصل ايـــــــــــــه ؟!!


لا ما حصلشى حاجه بصراحه المره دى ......... تموتوا ويحصل حاجه
المهم
رحت ادفع الغرامه واعمل الرخصه 


الناس بتوع اسكندريه .... عارفين طوسون فين طبعاً ....... وعارفين مرور ابيس فين ...... وعارفين مرور محرم بيك فين ....
رخصتى طوسون .... استلمها من محرم بيك ..... وادفع الغرامه فى ابيس ......... واسجلها فى محرم ..... وارجع استلمها من طوسون  ليه يعنى ؟!! 
اوبجيكشن ....... اعترض 
دا انا لو واخدنى كعب داير ..... مش هيبقى كده ......
وبرده ما خلصتش طبعاً لان الوقت اكيد خلص .... واضطريت اسافر العاشر ..... واكبر دماغى برده
المهم
روحت اخيراً وتفاصيل ممله كتيره جداً 


الا انه ا ستوقفنى هذا الحوار الذى سأختم به :
الموظفه مشيرة لى :  انت واقف حضرتك هنا ليه ؟!!
انا :   اتعجب قليلاً وانظر للشخص الذى يقف مثلى مثله بجوارى ولسان حال ( ما هو واحد تانى واقف جنبى اهه اشمعنى انا يعنى )
وبالفعل نظرت الموظفه له وسألته نفس السؤال ...... 
فكانت الاجابه من الموظفه الجالسه بجوارها : " لا دا تبع هشام بيه "
الموظفه : تسكت برهه ، و تنظر لى وتسألنى بشذر " وانت بقى تبع مين ؟! " 
انا : انا تبع ربنا 
الموظفه : ما كلنا تبع ربنا 
انا : "ممكن بقى اللى تبع ربنا يقف جنب اللى تبع هشام بيه ؟! "
الموظفه : تبتسم بحرج ، الا انها تقطع حرجها بصرامه فيها استحياء مختفى " اللى تبع ربنا بيقف على الشباك "
انا :  بإرتباك وحرج شديدين .... وبصوت استجمع العزه  " اللى تبع ربنا بيقف فى اعلى اماكن باذن الله " 
حالة حرج من الجميع ..... استأذن الاخ اللى تبع هشام بيه بأدب وخرج .... وخرجت معه ......
وبقى اللى تبع هشام بيه مع اللى تبع ربنا الاتنين برا ...... والاتنين شغلهم والحمد لله خلص 


اللى فوق ده نطلع منه بإيه ؟!!
نطلع منه 
انى عملت الرخصه يا جـــــدعان .....
لغاية ما اعملها الشهر الجاى تانى 
او 
تتسحب تانى كالعاده



الأحد، 15 يناير، 2012

صمتى



كل اللى حاسه

انه خلاص 


 " اتكسر اللى بينى وبينك " 

وفعلاً بتخسرينى 



ملحوظه : احترسى ، فأنتى تستنزفى اخر قطرات عمرى 

وانا عندما انزف 
تجدينى 

" صامت "

وكما ترين 

لقد بدأ صمتى ...
 ليقرض ما تبقى منكى




انتهى

رياح التغيير ..... بأيدينا مصر بكره احلى





السلام عليكم ورحمة الله وبركاته
اخواننا  واعزائنا
تعالوا نغير ونتغير 
تعالوا نغير مجتمعنا ....... تعالوا نبقى ايجابيين 
تعالوا نحب ربنا ...... تعالوا نحب مصر 
المشوار يدوب لسه هيبدأ ......... مش عايزين نتأخر تانى 
عايزين نجرى ونجرى 
عندنا شوية مصطلحات مش عايزين ننساها :
جهود ذاتيه 
عمل تطوعى 
عمل جماعى 
عمل خيرى 
ندوه
مؤتمر
ايجابيه 
مشاركه
امر بمعروف 
نهى عن منكر
اخوه فى الله 
(صدقة النعم )

عندنا جروب على الفيس ..... جميل ...... وهدفه جميل وراقى ..... اسمه ( بايدينا مصر بكره احلى )
شبابه هايل وهمته عاليه ....... وعايز يعمل حاجه حلوه 
وامكانياته معقوله بسبب كوادره المخلصه المثقفه ...... اللى ربنا جمعهم فى هذا الكيان لعلهم يخدموا دينه ..... وبلدنا ........ وعندنا مدونات كتييييييره وهايله واصحابها ايجابيين وراقيين لابعد حد ....... وقادرين على نشر الفكره

تعالوا نستغل وجود الكيانات دى ونية اصحابها  .... ونطلع كل طاقتنا .... لعلنا ننفع بلدنا ........ والله لقينا نفسنا عرفنا نعمل حاجه يبقى فضل من الله وتوفيقه ...... ما عرفناش يبقى ( ليس بعد الجهد اسف )

المهم ...... هنعمل ايه ......

كن ايجابى 
وشارك معنا فى  "حملة رياح التغيير ... بأيدينا مصر بكره احلى "

تعالوا نبدأ على طول من غير ما نتكلم كتير 

هنعمل ثلاث حاجات :

الاولى:

ان كل واحد فينا ينقل صوره سلبيه ( يُفضل لو عرف يصورها ويرفع صورتها ) ويكتب تعليقه عليها والناس كلها تعلق عليها ، وكل واحد يقترح طريقة لحلها ، لو حلها بسيط يبقى نتفق اننا نعمله على طول لو حلها محتاج ناس كبيره او قيادات سياسية او شعبيه هنحاول نوصلهم على طول باذن الله.......
الثانيه :

 العكس ، نجيب حاجه ايجابيه ( وبرده هيبقى كويس لو مدعومه بصوره )  ونتكلم عنها ونتكلم ازاى ننشر ثقافتها وازاى ننميها .

الثالثه :

فكره مش جديده وسبقنا بيها اكتر من حد منهم ،  ( اخى الحبيب ، الاستاذ احمد حبيب مطور البرامج المتعدده والمالتى ميديا ورئيس قسم الاعلام بجامعة الشارقه ، ومدرب التنمية البشريه الدولى ، وصاحب فكرة اكاديمية الاعلام العربى على الانترنت )

واللى سماها   ( زكاة العلم )
يعنى زى ما ربنا رزقك العلم فيبقى تتزكى على العلم ده على حد تانى بعلم منه  فى المقابل


اما احنا هنا هناخد الفكره ونوسعها شويه ونجعلها  (صدقة النِعم العنكبوتيه )

يعنى مش العلم بس ، لا ...... كل النعم اللى انعم الله علينا بيها الحمد لله.

يعنى مثلاُ :
-ربنا رزقك بعربيه يبقى لو حد شاورلك فى الطريق وهو واقف ييتكتك او بالليل لوحده ومش لاقى مواصلات يبقى تقف وتوصله معاك .. انت مش شايله على دماغك ...... ( طبعاً مع مراعاة السلامه وعدم الدخول فى خطر ) ، وبعد ما يركب وقبل ما تمشى و توصله تقوله هاوصلك بس بشرط  ....... تعمل خدمتين لاى اتنين بعدها ....... ( يعنى انا هعمل ليك خدمه لله ....... وانت تعمل فى المقابل خدمتين صغيرين تقدر تقدمهم لاتنين تانيين ... وتشترط عليهم برده انهم يعملوا كده برده ).

- ربنا رزقك مال ومشروع ناجح .... يبقى تتكفل بشاب بيبدأ مشروعه هو كمان ونفسه حد يقف جنبه .... يبقى تتبناه وتقف جنبه وتساعده وتقوله ده لله .... وانك هتقف معاه من الالف للياء على قدر ما تستطيع .... وفعلا تعمل كده كأنه ابنك او شريكك ....... وبرده تشرط عليه انه يعمل نفس الحكايه.   وان مطلوب منه هو كمان يتكفل باتنين يقف جنبهم زى ما انت عملت 

وللامانه برده :
والفكره دى مستوحاه من فيلم اجنبى قديم الا انها عبقريه فايه المانع من اننا ناخدها ونطبقها على ارض الواقع .....
-         كنت متخانق مع واحد او مع مراتك وحد ادخل وحللكم المشكله ، تتكفل باتنين تستحمل غتاتهم وقرفهم يكونوا بقالهم فتره متخانقين وتصلح بينهم ، و لازم تصلح بينهم ولو ما عرفتش يبقى لسه فيه اتنين لازم تصلح بينهم ( بس ما تستسهلش يا عم الحج ) ..... وبرده تطلب منهم لو اتصالحوا انهم لازم يعملوا كده ......
وبكده هنعمل شبكة خدمات لله فى مصر قد تنتشر لبره مصر ......... تخيل المنظر ، انت خدمت واحد والواحد ده خدم اتنين ، والاتنين كل واحد خدم منهم اتنين ( يعنى اربعه ) والاربعه هيخدموا 8 ، والــ 8 هيخدموا 16 وهكذا ........

وياريت ننشر اسم الحمله ....... لان وجود اسم للفعل ده ، هيزيد فى نشره وثباته لان البنى ادمين بيبحبوا وجود كيان للتوجه .....

رابعاً :

عندك مركز تدريب ، عندك عياده ، عندك اى كيان بيبيع خدمه مش سلعه ....... اعمل فيه حاجه خيريه بنسبه معينه ......... على سبيبل المثال ..... لو عياده ..... اختار اتنين عشوائيين من مرضاك كل يوم او كل اسبوع او كل شهر ...... واعملهم الكشف وكل الخدمات مجاناً ، حتى ولو طلعوا اغنيه ، مش مشكله ...... واطلب منهم ان كل واحد فيهم يعمل خدمه لاتنين تانيين مجانيه ....... واشرحله الفكره .........

وابعتلنا اسم عيادتك واحنا هنزورك ونحط عليها اللوجوا بتاع الحمله ( اللى هنعمله قريب اوى ان شاء الله ، ونقول ان المركز او العياده او ايا كان ..... مشترك فى حملة " رياح التغيير ..........  بأيدينا مصر بكره احلى "
وهكذا الناس لما تلاقى اللوجو والاسم هيسالوا هما كمان ..... ساعتها هتشرحلهم الفكره ...... وينفذوها هما كمان ........

وبكده هنبقى احنا ............... رياح التغيير القادمه ..... وبكده بأيدينا مصر بكره تبقى احلى .....
شبكه عنكبوتيه



وهكذا دواليك 


هتقولى .... مش كل الناس هينفذوا وهيصدقوا معانا .... وممكن يقولوا ماشى وصلنى وانا اعمل واما يعملشى او ينسى
هقولك  :
1.     عندك حق ، وبرده ممكن يصدق وما ينساش ، وممكن اتنين ينسوا وواحد لا يبقى كسبناه.
2.     لو نسى والحمله انتشرت ان شاء الله لما يشوف الكلام عنها ممكن يفتكر ويعملها ساعتها .
3.     زى ما قولنا ، ما تنساش ...... ليس بعد الجهد اسف.


الحمله هتبدأ ان شاء الله إلكترونيه (online ) .....  لو نجحت هتتحول لارض الواقع بسرعه شديده جدا ان شاء الله وسيكون لها اجتماعات دوريه .

الحمله ....... هيبقى اسمها ( رياح التغيير ------ بأيدينا مصر بكره احلى ) ..... هتبقى موسعه ان شاء الله على نطاق الجمهوريه ............ و هنطبقها على ارض الواقع بسرعه ان شاء الله (onlife )


الطلوب منك يا معلم بقى :
1.     انك تفعل الفكره من دلوقتى حالاً بعد ما تخلص قرايه وما تقولشى انك هتتكسف تقول للناس كده ..... ونظام .... ياعم انا هعمل الخير وخلاص وممكن احكيلهم الفكره ولو حبوا يعملوها هيعملوها .... لا طبعاً ، مفيش كسوف خلاص .... دا احنا عملنا ثوره ياعم واحنا عشرينات وتلاتينات فى السن بس ....... مفيش كسوف فيه ايجابيه خلاص.

2.     تيجى تنقلنا اللى حصل وتحكيلنا الحكايه علشان نوثقها ونشجع بعض ونحس بجدية الفكره وانتشارها.

3.     انك تبلغ كل اصحابك عن الفكره ، وانك هتبلغهم اسم الجروب هنا او المدونات المشتركه فى الحمله .

4.     لو عندك مدونه او جروب على الفيس او اى اكونت على اى موقع تواصل اجتماعى نيبقى انشر الحمله وحط اللوجو بتاعها اللى هننزله بعدين ، و بلغها على الاقل لاتنين ، واطلب من كل واحد انه حتى ولو ما اقتنعشى بيها يبلغها لاتنين غيره لعلهما هما اللى يقتنعا ( نعمة المعلومه .... لابد من نشرها مادام صالحه ).



رياح التغيير ..... بأيدينا مصر بكره احلى




لنك المقاله على الجروب



Related Posts Plugin for WordPress, Blogger...