الاثنين، 9 يناير 2012

ويكا ... وكلامه الانتيكا


انا تهت منى 
انا مش انا 

************************

تديهم كل حاجه علشان تبقى ليهم .......... ما يشوفوهاش 
تقولهم خايف اضيع منكم ......... ما يشوفكش 
تضيع منهم ....... يلوموك 
ترجعلهم ........... يعايروك
تحاربلهم ..... للاحتفاظ بيك لهم ..... يحاربوك
تخلص ....... ما يهتموش ...... 
تخون ....... يفضحوك 

لأول مره لن اقول عليهم اغبياء 
لانى هقول عليك انت اللى كنت ولازلت غبى

*********************************

وما الدنيا الا مسرحيه ....... سخيفه
سخيفه اوى والله يا رجاله 

*********************************

هو انا امبارح كنت صاحى ....... ولا نايم ؟؟!
انا كل اللى فاكره ان فيه حاجات انفجرت 
وغرقت الدنيا

********************************

المجلس العسكرى هيقعد ...... المجلس العسكرى هيمشى
المجلس العسكرى هيقعد ....... المجلس العسكرى هيمشى
( انتخابات النقابات خلصت - انتخابات مجلس الشعب خلصت - وانتخابات الرياسه دعايتها شغاله واحتمال تخلص فى غضون شهور هى كمان  -   والبلد كلها بيتعاد صياغتها ....... )
والناس الكبيره شغاله " سواء للصح او للغلط "
  والشباب لسه فى غيبوبه ، ولم يشارك فى صياغة البلد ....................
اصل اهم شئ تسليم السلطه لحكومه مدنيه
طيب   " :(


******************************

الناس انتخبت حزب النور والحريه والعداله بنسبه فاقت ال 70 % بكتير ......
وبما ان الناس عارفه ان الفتره الجايه فى تاريخ مجلس الشعب هى فترة صياغة دستور وهوية مصر
وبما ان الاتنين دول بيقولوا انهم تيار اسلامى و على اساس ده الناس اختارتهم
اذاً فوق الــ 70 % من الشعب المصرى عايز الدوله والدستور والقوانين اسلاميه ........ 
( مش توافقيه )
والا كان انتخب توافقيه ............ ( يا رجاله )

نفسى اعرف مين  توافقيه دى ...... فجأه كده هبطت علينا فى الاعلام زى ما كل حبه يهبط علينا حاجه ......
هى كلمة ( انتوى ) دى هى السبب فى الكلام اللى بيجد كل حبه ده والله .
 منه لله اللى كتبهاله

طبعاً كمان شويه هلاقى تعليق شحط محط من واحد  غير معروف بيتهمنى بكبشة اتهامات عجيبه غريبه
( طبعا واحد نخبه هو اللى باعتها )
اقوله 
اقرا اسم المدونه حضرتك .... وضيف عليها انى ما بجيش بالضغط  النفسى او  الاعلامى 
يبنى دا لعبتى 


********************************

اللى دماغه ناشفه ........... فيه اللى دماغه انشف  


********************************

الديموقراطيه المفرطه ...... تفسد الاخلاق 
حتى اسألوا العيال ولادى 

*******************************

حالات من المقاطعه والاضرابات فى اوساط الشباب تعم البيت ( ما بين 3 و 4 سنين ) ويساعد فى انتشارها 
عدم التوافق بينى وبين سيدتنا المصونه زوجتى .....
 ما زاد من احتمالية الانفلات الامنى 
وعدم السيطره على مدى المقاطعات والاضرابات 
الا انه تم الاستعانه بجهات خارجيه ....... لتهدئة الموفق والسيطره عليه 
وكانت المساعدات من قِبل هذه الجهات  من خلال عمل بعض الضغوط و المحاصرات النفسيه  ........ والإغراءات الأكليه ( موز و شيكولاته والذى منه )
 وتم الوصول للنتائج المرجوه والحمد لله 
هئ ...... قال مقاطعه قال ..........
انا مصر ولا ايه ؟! 
ولا اكونش المجلس العسكرى 

*******************************

انا لسه بفكر 
ويارب تحصل حاجه لوحدها من عند ربنا ....... وتيجى من عنده 
حاكم انا بتطور مع الامور ....... زى التطور الطبيعى للحاجه الساقعه

*******************************

انت مش انت ............. وانت  جعـــــــــــــــــــــــان

********************************

الدنيا برد جداً 

********************************

حاله من الاستمتاع ....... والخنقه ............. والغضب الداخلى .......... والارتياح ............ والقلق ........... والتفائل  ..... والخوف .... والحذر ..... والاطمئنان ..... والأمل ..... 

هذا انا ....... و هذه هى حياتى 

*******************************

لا 

*******************************
اه 

*******************************

وليه لاء 

*******************************

مش لازم انا دايماً اللى اخد الخطوه 

******************************

احياناً ببقى جدع ................ واحياناً تانيه بتمنى ابقى ندل 

******************************
رساله وصلتنى تواً نصها :

" اخيراً الحمد لله ، طلع يقول قلت لبابا انا اسف وقلت للشيطان يا ايها الاحمق مش هسمع كلامك وهو فرحان اوى "

انتهى نص الرساله 
و تعليقى عليها :

اولاً : الواد ابو 3 سنين ده جاب احمق دى منين ؟!! 
ثانياً : مش قلتلكم من شويه انى مش المجلس العسكرى.
ثالثاً : 

ما اجمل ان تجتهد فى تربية اولادك ، وتُبلغك زوجتك بالنتيجه الإيجابيه .

*****************************

عمر ..... ما شاء الله ..... واد راجل اوى 
بس شكله هيتعبنى

رقيه ..... ما شاء الله ........... بنوته عسوله جدا جدا .....
بس شكلها هتخوفنى عليها 

*****************************

المرأه ...هى المرأه 
لن تتغير .... ولن تتبدل 
وستنتشر .... وتنتشر ...... وتتوغل ...... وتخترق  ......

الحل الوحيد معاها ..... انك تشرب اسبرايت 
او 
سم فيران

**************************** 

"العيشه واللى عايشينها"

كلمه ..... كانت اساسيه فى حياتنا لغاية من شويه ............ هل هتفضل تتقال بكره ؟!!

****************************

عيش ندل تعيش مبتسم .......... عيش راجل تموت مبتسم  

****************************

الفيس مهنج
ولسه ما وصلتش لقرار 

****************************

الراجل او الست الغير معروف 
اللى هرينى

يعنى اعمل ايه يعنى قولى 

اروح اتجوزها علشان ترتاح ؟!!

اهدى بقى يااد

****************************

اخر حاجه عايز اقولها 

ان انا لسه ما خلصتش ..... فيه حاجه كمان 

****************************
هى:

انا مش بزعل من تعليقات الغير معروفين 

هئ ، ولا بيهمنى 
عااااااااااااااااا




هناك تعليق واحد:

غير معرف يقول...

تديهم كل حاجه علشان تبقى ليهم .......... ما يشوفوهاش
تقولهم خايف اضيع منكم ......... ما يشوفكش
تضيع منهم ....... يلوموك
ترجعلهم ........... يعايروك
تحاربلهم ..... للاحتفاظ بيك لهم ..... يحاربوك
تخلص ....... ما يهتموش ......
تخون ....... يفضحوك


دي كلمات اغنية جديدة ولا إيه ؟


طا خد عندك بئا

اديك تقول مخدتش
وان خدت متدينيش
و تشوفنى تقول ماشفتش
بئا انت مشفتنيش؟؟
يللى هواك يدروش
لا روح متدروشنيش
انسالك اللى فات وارجع اكلمك
بالعقل والثبات احاول افهمك
وابعتلك ناس تعاتبك
و اسوء عليك حبيبك
اديتك الحنان والود حرمتنى
اديتك كل شيء
و عملتك من لا شىء
و طلعت ولا شىء
يا خسارة ما قلتليش
اسقيك شهد المحبة
تسقينى مرها
وعينيك ليه تستخبا
وتدينى دهرها
معزش حاجة عنك
تحرمنى حتى منك
الله الغنى عنك يللى مرحمتنيش
واديك تقول مخدتش

  قيراط حظ ولا فدان شطارة ... مقوله سمعناها كلنا و حفظناها عن اجدادنا ... ب س لما بدأنا نتعلم و نشوف العلم الحديث و الغرب و تكنولوجيته بدأنا...