الأربعاء، 11 مارس 2009

حنتوزو لاوى بوزوا هوه اللى سرق التوك توك

مع ان الناس كلها عرفت خلاص ان "حنتوزو لاوى بوزوا" هوه اللى سرق التوك توك الا انه لغاية دلوقتى ماحدش قبض عليه. مش غريبه دى شويه؟!! اكيد مسنود ، ومسنود جامد كمان. طيب ذنبه ايه الغلبان ده اللى اتسرق ، اكمنه توك توك يعنى وصغير وغلبان. والله حرام ... حرام مهو البلد دى ملهاش مكان للغلابه ولا الصغيرين. اللى معاه جنيه يساوى جنيه ,,, والكبير كبير ,,, والنص نص ,,, والصغير ما نعرفوووووووش. والتوك توك هيفضل توك توك مهما عمل ومهما جاب وسايط ، مش ممكن يبقى عربيه ابداً . عارفين ؟!! التوك توك ده فعلا مظلوم والله . زى ما واحد قال ، لا منه محصل عربيه ولا منه حصل فيزبه. وديما الناس كلها تتريق عليه ، مع انه بيقضى مصالحنا ورخيص ومش مقصر معانا خالص. بس هنعمل ايه بقى ، احنا ديما كده ، نتشطر على الغلبان. اه والله بنتشطر على بعض بس والغلابه. (اللى زى التوك توك) راخر ربنا بيسلط علينا اللى بيطلعه على جتتنا. المهم نرجع لموضوعنا لاحسن انا خلاص قربت اعيط ، وصعب عليا التوك توك خالص. هو احنا كنا بنتكلم على ايه؟!! اه حنتوزو اللى سرق المأسوف على عمره التوك توك. اكيد وراه راس كبيره ... واكيد مشارك وزير مهو مش معقول يبقى سارق التوك توك عينى عينك كده والناس كلها عارفه وما حدش يكلمه ولا يجيبله حتى سيره. طيب وبعدين يا اخوانا؟؟!!! هنسيبه ؟!! افرضوا باع التوك توك ده او غير ملامحه او باعه لواحده امريكانيه نفسها فى توك توك صغير تربيه وجات تاخده من عندنا؟!! لازم نتصرف احنا مش لازم نسكت حتى ولو وراه مليون وزير ولا حتى يكون وراه (....................) ايه ده؟! ثوانى ...الباب بيخبط. خير يارب..... ثوانى وهرجعلكم واوعوا تنسوا .... لازم نتحرك. ...... ............. .................... يا اخوانا ، انا شكلى مضطر استأذن وما تعملوش حسابى فى موضوع الحركه ده ..... لانى رايح مشوار صغير مع ناس اصحابنا جولى دلوقت وجاى وما تخافوش مش هنسى ادعيلكم من هناك...... واحتمال اغيب شويه ما تخافوش ولا تقلقوا ..... اكيد هخرج ويفرجوا عنى .... ................. ثوانى ياباشا جى معاك اهه .... بس ما تضربشى بس .... واستنى حتى لما اقفل النت علشان ماحدش يسمع الضرب .... مش منظر يعنى .... تيييييييييييييييييييييييييييييييييت ، تيت تيت تيت.

هناك تعليقان (2):

وجدوووووووو يقول...

"هش هش يا ديك التوك توك دا مش ليك"
دا الشعار الجديد اللى رفعته البلد الايام دى لكن حبوا يعمموها شويه و هيبدلوها " هش هش يا يا محتاس _البلد دى لولاد الناس"
و طبعا احنا عرفين ان احنا مش من ولاد الناس دول أحنا ولاد ......... منستهلش ولا ناكل ولانشرب لأن الناس دى مش فضيالنا بصراحه هما فى ايه ولا ايه هيلقوها منا ولا من مين كتر خيرهم مخصصين 2% للبحث العلمى و الدعم زى ما أحنا عارفين مش لقين نوديه فين ولا البنزين و المواصلات و العيش لكن احنا بنعض الأيد اللى بتمدلنا علشان مدا هما حبوا يكسروا سننا و يكممونا علشان منعضهمش و بصراحهخ كفايه كدا على الناس دول احنا عضناهم بما فيه الكفاية ربنا يكون فى عونا .... أقصد ربنا يكون فى عنهم ..........
أبوحفص المصرى

غير معرف يقول...

ههههههههههههههههههههههههههه
عجبنى موضوعك جدا وتشبيهك للتوك توك اللى هو .........
وانا مالى يا اخويا حدش قال لك انى عاوزة ازورك ؟
اما بقى سى حنتوزو لاوى بوزو فدة فى منه كتير فى السوق
على كبير وعلى صغير
وفى حنتوزوا لاوى بوزوا كبير مسرح حنتوزوزوهات ( ايه دة ) ما علينا .... خلينا فى موضوعنا
مسرحهم فى السوق يمصوا دم التكاتك الغلابة
ولسة ياما هنشوف
كانت معكم اختكم الصغيرةnanna من موقف الاتوبيس على ما تفرج وويكا يوصلنى بعربيته

Related Posts Plugin for WordPress, Blogger...