الأحد، 21 فبراير، 2010

خطوبة ايه؟!!


هى : انا زعلانه جداً ومتضايقه.
هو : ليه؟؟!!!
هى : الخطوبه اتفركشت .
هو: طيب ممكن اطلب منك طلب حالا تعمليه
هى: ايه ؟
هو: اول ما اقلك عليه تعمليه
هو: ماشى؟
هى: حكم دة والا ايه ؟
هى: دة طلب
هى: اطلب
هو: ابتسمى دلوقتى حالا
هى: انت شايف ان دة وقته ؟
هو: اه
هو: اولا ، علشان بتكلمينى
هو: ثانيا ، علشان ببلاش ومش هتخسرى
هو: ثالثا ، ما تخافيش ماحدش شايفك ، فمحدش هيقول عليكى مجنونه
هى: لسة فى والا خلاص كدة ؟
هو: لا خلاص كفايه على الابتسامه دى المره دى
هى: طيب عموما كلمتك خلتنى ابتسم
هو: بجد؟
هى: اه
هو: طيب احلفى
هى: اقول لك ايه بس
هى: ابتسمت
هى: مش هجاملك فى دى
هو: ماشى
هو: شايفه الصوره اللى انتى حطاها دى
هى: اه
هى: متقولش اغيرها
هو: لا خالص
هو: جميله جدا جدا والله
هى: ربنا يخليك
هو: بس عباره عن ايه ؟
هى: مش عارفة
هو: ازاى بقى؟
هى: مش عاوزاك تضحك عليا
هى: سيبك انت
هو: لا والله مش هضحك عليكى
هو: قولى
هى: مش عارفة انا بحب ابص للسما كتير
هو: كويس
هى: وبحب القمر جدا
هى: كفاية ان منظره بيريحنى
هو: ليه
هى: مش عارفة
هى: من زمان وانا كدة
هى: مش علشان حب وبتاع
هى: انا طبيعتى كدة
هو: طيب اللى قاعد ده
هى: اه ماله
هو: شايفاه ازاى؟
هى: شايفاه منطوى مكسور
هى: بيناجى ربه
هو: لا خالص
هى: انت شايفه ايه
هو: ده واحد  نسى كل حاجه
هو: وخلى مع نفسه
هو: وبيستمتع بنسيم الليل وضوء القمر فى اعلى مكان  كأنه عايش وسط السحاب
هو: او كأنه سحابه جميله
هى: عادى
هو: بيحب
هى: كل واحد على حسب نظرته
هو: بس حبيبه شكله سابه
هو: فقعد مع نفسه
هو: فى مكان بعيد عند القمر
هو: وسط السحاب والنجوم والقمر
هو: يفكر بهدوء فى اللى  حصل
هو: بس غالبا
هو: هو فى حالة هدوء وتعادل
هو: لا هو زعلان ولا هو فرحان
هو: بس قلبه شويه سخنان
هو: بس فى الاخر
هى: ههههه تعبيراتك حلوة قوى
هى: كمل
هو: حاسس انه لسه قلبه عايش وما اتأذاش ، بس شويه سخنان
هى: لا وممكن يكون كان عايش فى قلق وتعب وخوف من القدر
هو: وعارف انه شويه مع ضوء القمر الجميل والنسيم العليل وهمس الطير بالليل
هى: ولما عرف النهاية ارتاح شوية
هو (وهو بيبتسم بحنان ويكمل) : ولمعان النجوم حواليه كأنها نيازك  اللى بتطير فى السما
هو: ممكن
هو: ارتاح
هو: واخد اجازه
هى: بس بردوا مكسور
هو: لا خالص
هو: بس قلبه سخن شويه
هو: علشان كده لا باصص فى الارض ولا باصص فى السما
هو: يدوب عينيه 45  درجه بلغة المهندسين
هو: ههههههههههههه
هى: باصص بين ايديه يعنى منطوى على نفسه
هى: مش باصص حواليه
هى: المهم
هى: انا مقتنعه بكلامك
هى: لانى عارفة انى لو شوفت الصورة دى فى وقت تانى هحس لها احساس مختلف
هو: لا
هو: انتى لازم تشوفيها بشكل تانى من دلوقتى
هى: عنك حق
هو: نرجع بقى للخطوبه اللى اتفركشت
هى: خطوبة ايه؟!!!!

ليست هناك تعليقات:

Related Posts Plugin for WordPress, Blogger...