الاثنين، 21 يناير، 2013

انا بحب التعليقات

انا حد بيفرح لما بيلاقى تعليق متسابله هنا جديد
حتى ولو ما نشرتوش ... وده غالب الظن
بالرغم من تواجدى الاساسى على الفيس .... وراحتى فى شعبه اكتر من راحتى فى شعب التدوين
الا انى لازلت بأشعر بخصوصيه و راحه نفسيه وسعاده لما بلاقى عدد التعليقات اللى مش منشوره ذاد
لان ده معناه ان فيه تعليقات غالبا خاصه جت
قد يكون ده موجود عند كل الناس لان ده معناه عندهم انهم مهمين و ان فيه ناس بتقرالهم
بس انا الموضوع عندى مختلف شويه
لانى تخطيت فكرة ان حد يقرالى هنا دى او لا
يمكن علشان اغلب التعليقات اللى بتجيلى خاصه شويه
يمكن علشان جزء كبير منها بيتناول ناس مهمه بالنسبالى
يمكن علشان بعضها فيه لعبة عروستى او فزوره ... او حد مضايق احيانا منى اوى ( نفسى افهم ليه ) وبينفس عن اللى جواه
يمكن علشان انا اجتماعى اوى وبحب اى نوع من انواع التواصل الاجتماعى 

عموما فى الاخر المحصله هى انى :
" بحب التعليقات اللى بتجيلى "

هناك تعليقان (2):

ويكا يقول...

الاستاذ المجهول اللى باعتلى تعليق غريب جدا جدا جدا
عباره عن سؤال عن احد المدونين

سؤالك غريب .... اسلوبك اغرب

الاجابة بتاعته مش عارف تتجاوب ازاى

لو اجابتى بنعم فالموضوع اكيد شخصى جدا ومش مباحلك ولا مباح لامثالك ولا لاى حد ده شئ فى منتهى الخصوصيه والحقوقيه والاحترام

اما لو اجابتى بلا فالموضوع لا اعلم عنه شئ ولا استطيع اجابتك ولو حتى بالتوقع
فهذا امر صعب معرفته او توقعه

واخيراً سؤالى المنطقى لسؤالك :
وانت مالك :) هههههه
غريبه اوى الحكايه دى بجد هههههههههههه

ويكا يقول...

استاذى الفاضل

صاحب التعليقات الغير منشوره بخصوص الامر اعلاه

هو انت مستغرب اوى كده ليه ؟!!!
هو الموضوع صعب اوى كده ؟!!!
على فكره انا اعرف ناس تانيه كانت بتعمل كده برده .... ولو اتجوزوا تانى انا واثق انهم هيعملوا كده برده

لا اخفيك سرا انا كنت ممكن ابقى زيك كده ان هذا الامر شئ مميز

الا انى اكتشفت قريباً انه عادى جدا
فبالتالى انا مستغرب استغرابك اوى ان فيه حد كان بيعمله مع حد
بغض النظر الحد ده انا ولا غيرى اصلاً
اما بالنسبه لاستنتاجك هههههههه فعندا فيك مش هريحك برده
خليك كده
ولو ان الامر ما يخصنيش الا انى مبسوط بيك كده هههههههههههههه

Related Posts Plugin for WordPress, Blogger...