مش عارف

مش عارف حقيقى مش عارف ولا فاهم ... مين الغلطان ومين المغلوط فى حقه؟؟!! الناس المفتريه دى اللى كل حبه نسمع عنهم هما اللى غلطانين ؟!! ولا احنا اللى غلطانين فى حقنا؟! الموضوع ده بجد محتاج حسبه... يعنى مثلا ، احنا نقعد نسأل نفسنا شوية اسأله كده ، ونجاوبها بينا وبين بعض بحيث الجماعه اللى خربين بيوتنا دووول ما يسمعوش ويتحججوا بيها. السؤال الاولانى والمهم مثلاً : - هو احنا لو مش موجودين اساساً، كان انحك علينا؟! - الاجابه : لاء طيب سؤال تانى : - هو احنا لو مش بندى فلوسنا لحد يشغلهالنا كانت ضاعت ؟! - الاجابه : لاء طيب بلاش ده.... - هو احنا لو ماكناش عايزين نتغنى باننا نشترى شقق واراضى علشان لما تغلى نبيعها ونكسب حتى ولو هتغلى وما يشترهاش الا الاغنيه ( واللى ما معهوش ما يلزموش) ، كانت الشقق غليت ولا الاراضى ولعت؟!! والشباب ماعرفشى يتجوز؟؟ - الاجابه : برده لاء - طيب لو ما جريناش كلنا على الاراضى الفاضيه وقلنا نلحق نبنيها علشان نلحق الاسعار الغاليه ونبقى من اصحاب البيزبس ، كان الحديد والاسمنت غلى؟؟!! - الاجابه برده والله العظيم : لاء طيب سؤال كمان معلشى بس والله مهم خالص خالص : - هو لو احنا (اصحاب المحلات والتجار اللى بيقولوا انهم على قد حالاتهم ) ما غلوش الحاجه الطاق طاقين علشان غليه شويه عليهم ، كانت الحاجه غليت علينا بالشكل الغريب ده ؟!! - الاجابه و سبحان الله وكأنى بغششكم برده: لاء طيب اقولكم حاجه مره واحد صاحب اخويا فاتح سوبر ماركت ، بتجيله البضاعه لغاية عنده ، نزلتله كارتونة ( مش عارف ايه كده فيها حوالى 40 قطعه) زايده 2 جنيه . عارفين زود تمن القطعه ازاى ؟! خلاها من ربع جنيه لنص جنيه ، واللى يسأله " انت غليتها ليه " يحلفله مليون يمين انها غليت عليه وبقى مضطر يغليها علشان ما يخسرش. طيب سؤال اخييييييييير والله العظيم : - هو لو اى حد فى حضراتنا ، من الناس اللى زعلانه اوى دى وبتسب وتلعن فى الحيتان الكبار اللى خربوا بيوتنا ، لو اى حد فينا اتغنى مره واحده وبقى راجل اعمال كبير او صاحب مصانع او عقارات ، بالله عليكم هيحسس على الشعب ؟! او هيتقى الله فيه؟!! الاجابه المره دى بقى عارفين ايه: - برده لاء اه لاء وستين لاء ، لان الناس الحيتان دى اساسا من الشعب واللى بيكبر معاهم من الشعب وصاحب الشقه اللى لو طال يخليها بدل 15 الف جنيه الى مليوون جنيه هيخليها ، برده من الشعب والباشا صاحب السوبر ماركت ده برده من الشعب . صح ولا انا غلطان . وعلى رأى عادل امام: " احنا ؟..... احنا ؟......احنا ولاد كل.........." والعالم اللى فوق دووول مظاليم معانا. اللهم انفخنا وفسيييييهم ، اللهم شلحنا وغطيهم" ماشى ياولاد ................الشعب. <

حنتوزو لاوى بوزوا هوه اللى سرق التوك توك

مع ان الناس كلها عرفت خلاص ان "حنتوزو لاوى بوزوا" هوه اللى سرق التوك توك الا انه لغاية دلوقتى ماحدش قبض عليه. مش غريبه دى شويه؟!! اكيد مسنود ، ومسنود جامد كمان. طيب ذنبه ايه الغلبان ده اللى اتسرق ، اكمنه توك توك يعنى وصغير وغلبان. والله حرام ... حرام مهو البلد دى ملهاش مكان للغلابه ولا الصغيرين. اللى معاه جنيه يساوى جنيه ,,, والكبير كبير ,,, والنص نص ,,, والصغير ما نعرفوووووووش. والتوك توك هيفضل توك توك مهما عمل ومهما جاب وسايط ، مش ممكن يبقى عربيه ابداً . عارفين ؟!! التوك توك ده فعلا مظلوم والله . زى ما واحد قال ، لا منه محصل عربيه ولا منه حصل فيزبه. وديما الناس كلها تتريق عليه ، مع انه بيقضى مصالحنا ورخيص ومش مقصر معانا خالص. بس هنعمل ايه بقى ، احنا ديما كده ، نتشطر على الغلبان. اه والله بنتشطر على بعض بس والغلابه. (اللى زى التوك توك) راخر ربنا بيسلط علينا اللى بيطلعه على جتتنا. المهم نرجع لموضوعنا لاحسن انا خلاص قربت اعيط ، وصعب عليا التوك توك خالص. هو احنا كنا بنتكلم على ايه؟!! اه حنتوزو اللى سرق المأسوف على عمره التوك توك. اكيد وراه راس كبيره ... واكيد مشارك وزير مهو مش معقول يبقى سارق التوك توك عينى عينك كده والناس كلها عارفه وما حدش يكلمه ولا يجيبله حتى سيره. طيب وبعدين يا اخوانا؟؟!!! هنسيبه ؟!! افرضوا باع التوك توك ده او غير ملامحه او باعه لواحده امريكانيه نفسها فى توك توك صغير تربيه وجات تاخده من عندنا؟!! لازم نتصرف احنا مش لازم نسكت حتى ولو وراه مليون وزير ولا حتى يكون وراه (....................) ايه ده؟! ثوانى ...الباب بيخبط. خير يارب..... ثوانى وهرجعلكم واوعوا تنسوا .... لازم نتحرك. ...... ............. .................... يا اخوانا ، انا شكلى مضطر استأذن وما تعملوش حسابى فى موضوع الحركه ده ..... لانى رايح مشوار صغير مع ناس اصحابنا جولى دلوقت وجاى وما تخافوش مش هنسى ادعيلكم من هناك...... واحتمال اغيب شويه ما تخافوش ولا تقلقوا ..... اكيد هخرج ويفرجوا عنى .... ................. ثوانى ياباشا جى معاك اهه .... بس ما تضربشى بس .... واستنى حتى لما اقفل النت علشان ماحدش يسمع الضرب .... مش منظر يعنى .... تيييييييييييييييييييييييييييييييييت ، تيت تيت تيت.

كلنا هذا الرجل

........................

اوعى تقولى ........... "لاااااااااااااااااا ، مش انا ياباشا اللى ياخد على قفاه" والله بتاخد على قفاك ... وعلى فكره انا ماجبتش سيرة الحكومه ولا السلطه (ايوه ماحدش يوقعنى فى غلط)) انا اقصد بتاخد على قفاك من ناس تانيييييييييييين خالص (مش الحكومه)) المهم نرجع لقفاك ، سورى اقصد للقفا عموما. ازاى بقى بتاخد على قفاك ، اقولك انا دا لو انت قال مش عارف يعنى نبدأ طبعا باللى مفيش خلاف فيه و قسم الشرطه (اللى طبعا شغال فيه ناس من الشعب) مش حكومه يعنى.

ده مش محتاج منى شرح ولا توضيح .

دا ، انت عارف كويس لو رحته هتاخد فيه ايه بالظبط وفين.

وياعم علشان اوفر عليك انا عارف انك مارحتش قسم قبل كده ولا اخدت اى حاجه (ده اكيد انا عارف ، مش انت اللى تروح القسم)

بس قولى يا فالح، انت عمرك ما وقفت فى طابور عيش (مجازا يعنى) على اساس ان فيه طابور يعنى.

بلااااش الطابور لانى عارف برده انك عندك اشتراك والعيش بيجيلك لغاية عندك, خليها الباص (بلاش الباص دى برده لان اللى بيركب الباص مش بياخد على قفاه ولا حاجه)، اقصد اتوبيس النقل العام ، هاااا ؟!! فاكره ولا افكرك؟؟!!

اكيد انت راجل عامل اشتراك مكيف ومش بتركب الاتوبيس الياي دة برده انا عارف.

طيب الكليه يا فااااااااااااااااااااالح، اتكلم ولا اخلينى ساكت؟؟!!

اقولك : انا هقولك كلمات مفتاحيه وانت هتفهم، ( الدكتور- المذكره – اعمال السنه – الدروس الخصوصيه ) فهمت ولا اوضح اكتر، ان الله حليم ستار.

ايه؟

خلصت جامعه ؟؟!!

ماشى

خلاص يبقى الشغل يا فالح؟!! هتعترف ولا اتكلم؟؟!!!! (دى والله واضحة خالص زى الشمس)

ايه؟!! بتقول ايه؟!!

مظبط مديرك ؟! يابن الايه.

طيب ماشى

مهو انا مش هسيبك

خد عندك طيب:

المروووووووووووووووور

الطرق اللى بتتعور (اقصد بتمشى) عليها.

الضرايب.

المستشفيات.

الصرف الصحى واللى مش صحى.

المصالح الحكوميه (اقصد طبعا اللى بيديرها ناس من الشعب).

البطااااااااااااااله.

اختصر.....

ماشى

يبقى (جمهورية مصر العربيه)

وفى الاخر ،(((( انا اصرح واهيب بكل من قرأ الموضوع انه ما يفمشى ابدا ابدا انى اقصد الحكومه ده كلام مغرض))).

ايوه بلاش توقعونا فى الغلط لحسن انا عارفكم।

وعلى فكره كمان ، مش انا اللى كاتب المقاله دية؟

مع السلامو عليكو

...........

تعبت خلاص ونفسى اكاكى

هل تشعر برغبة ملحه في الطيران؟!!

هل تشعر أحيانا انك نفسك تبيض؟!!

هل تحس انك نفسك تدن؟! (زى الديك)

هل تشعر إن كل ما يطلعلك ريش ، حد يقصقصهولك؟!!

لا ما تفهمنيش غلط، انا مش حاسس انى انا ديك ولا حاجه. ولا حتى فرخه.

لكن ما اكدبشى عليك، انا حاسس ان ريشي متقصقص اول بأول.

ولو عايز الصراحة، انا حاسس بجد انى هاين عليه اصوت ، وألم الناس كمان.

اه والله.

انا مش عارف ألاقيها منين ولا منين ، ألاقيها من بتوع المرور ولا العالم بتوع الطرق والكباري ولا بتوع الضرايب ولا العالم اللى واقفين فى الشارع بيسترزقوا على قفايه دوول.

تصدقوا ؟! لولا الملامه كنت سيبت شغلانة الهندسة دي اللى مش جيبه همها وكنت اشتغلت سايس.

ايوه سايس. انت عارف السايس بيلم كام فى اليوم يا راجل يا محترم ؟!

السايس!!

يا سلام على السايس. اجدع واحد فى مصر .

لا دكان ولا راس مال ولا سجل تجارى ولا ضرايب ولا الكلام ده كله.

هيه حتة خرقه قديمه وصبح صبح ياعم البيه.

ولما ربنا يفرجها عليه ويكبر الشغلانه ويصرف شويه علشان يطور من نفسه ، بيجيب فوطه صفرا قديمه او يستلفها من اى ذبون مش عايزها.

واحلى كلام ياعم الحج.

هو يدوب يرفعلك مساحات العربيه، بس. ويبقى مطلوب منك جوزين لحاليح يامعلم دا لو انت واد كحيان ويدوب بتستلف فلوس البنزين زى حالاتى.

وما يبقاش عاجبه والله كمان.

دا انا مره ياراجل يا محترم ، ركنت عربيتى فى الشارع ، والله العظيم فى الشارع وبعيد عن المنطقه بتاعت الباشا السايس ، اللى هيه عباره عن منطقه فى الشارع برده ، (اصلى ما معاييش) ما انتوا فهمين الفوله.

(المهم)

لقيته طلعلى منين مش عارف وقالى: "انت راكنها فى الشمس ليه كده ياباشا ما تيجى تركنها فى الضل هنا"

بس على مين ، دا انا فاهمه.

المهم، قلتله: "لا ، مش مشكله ، اصل انا هجيب حاجه وامشى على طول "

قالى: "اتفضل ياباشا سيبها وما تقلقش"

وبينى وبينكم : انا قلقت ، وقلقت جدا كمان.

المهم، وانا ماشى لمحت الباشا بيعمل ايه؟؟!!!

بيرفع مساحات العربيه , قلت فى بالى جالك الموت ياتارك الصلاه.

كملت طريقى وسلمت امرى لله

المهم خلصت اللى انا بجيبه وبشويش انا وصاحبى اسحبنا نحية العربيه وقلت استغفله واركب العربيه واطلع مره واحده وكأنى مش من البلدى .

بس مين ، كان غيرى اشطر. طلعلى ياعم الحج منين والله ما اعرف.

خلصت خلاص ، فسلمت امرى لله بدل ما يتقال عليه معفن، وفضيحه كمان ،

جيت ضارب ايدى فى جيبى فلقيت ربع جنيه على نص جنيه واحتمال كان فيه جنيه برده متهيقلى .

فقلت " خير الامور الوسط"

وجيت واخد حتة النص جنيه اللى فى جيبى وودعته بحراره كانت بتحرق قلبى والله ومديت ايدى اللى اتمنيت انها كانت تنمل في اللحظه دى ولا تتمد وتديله حته من تعبى وشقايه بدون سبب ،غير اللهم انه رفعلى المساحات بس، ياساده يا محترمين. (ولو كنت اخدت بالى، كنت رفعتها انا والله)

بس اه النصيب بقى.

الجميل بقى فى الموضوع ايه ؟!!

انه كان هيضربنى وقام قالى: " لسه نص جنيه كمان يا استاذ"

بصراحه انا ما فهمتش او بمعنى اكثر دقه ماحبيتشى افهم"

امت قلتله: "لا كده كويس"

فقام هوه عملى " فضيحه"

بس الموضوع خلص الحمد لله وأخد النص جنيه.

المهم

نرجع لموضوعنا,

انا بجد

نفسى ادخل اوضه مقفوله ، بس ما حدش يسمعنى ،

واقعد اصرخ . اصرخ.

يا اما اكاكى. اكاكى.

اصل انا بعيد عنكم رخصتى اتسحبت , وهدفع فوق ال300 جنيه, انا ونصيبى مع سيادة المرور.

انا لو اعرف , كنت اديت للراجل الجنيه والله.

عموما هبقى احكيلكم حكاية الرخصه . لو فضلت عايش ، وما بضتش

سلام.

ما تيجى نجرب

الدنيا كلها بقت شعارات ...شعارات اللى يقولك موضوعنا صريح ، واللى يقول موضوعنا جرئ واللى يقول .... موضوعنا اول مره حد يتناوله... كله بيقول.......... والمشكله ان انا كمان مسمى مدونتى "بصراحه" (شعار برده) طيب ايه العمل؟! وبعدين الموضوع ده ملوش حل ولا ايه؟! ياعم ملناش دعوه. خلينا فى نفسنا احسن. ايوالله .... من تدخل فى مالا يعنيه سمع مالا يرضيه.. وخلى اللى يتكلم يتكلم.. هو الكلام بفلوس. هو حتى دى هنخنق على الناس فيها .... كل حاجه بقت بفلوس , وبقت نار ومحدش عارف لا يشترى ولا حتى يبيع. فخليهم يقولوا زى ما هما عايزين , والله يكرمكم محدش يضايقهم. هما اكيد عندهم حق ... وهما كمان اول ناس تنفرد بالموضوع اللى كل واحد منهم ده بيتكلم فيه. نخلينا فى نفسنا احنا بقى .... ياريت يعنى ماشى؟! طيب احنا ... ايه الموضوع .... اقولكم ايه الموضوع. كل الحكايه ... ان انا عارف ان كل واحد فينا ... متنيل على عينه عنده بلاوى زرقه مخبيها. (منطقه ضلمه يعنى كده ماحدش شايفها) وما يقدرشى حتى يحرك لسانه بيها . واحيانا نفسه نفسها تخاف تحدث نفسها بيها. ليييييييييييييييييييييييييه؟؟!!!!!!! لانه مكسوف من نفسه منها. اه والله . بس طول ما هو كده بيبقى مخنوق خالص ، خالص . واحيانا بيبقى مش عارف يعيش. فعلا مهو يا عينى مش عارف يفضفض لحد .ومش عارف يأنب نفسه بانه يحكى لصاحبه او صاحبتها عن اللى عمله او عملته , لان صاحبه او صاحبتها هيبصلهم بصه مش اللى هيه. علشان كده انا عملت المدونه دى. وعلى فكره المدونه دى مش لحضرتى بس ، اكتب فيها اللى انا عايزه . لا دى هتبقى بتاعتنا كلنا. وانا مشرف بس لانى ماعنديش استعداد اقعد اكتب والناس تقعد تهز دماغها. بتخنق , وبسرعه كمان. علشان كده . انا عايزكم تشاركوني الفكره دى .عايز كل واحد يدخل باسم مستعار او باسمه الحقيقي هوه حر بس ياريت ما يذكرشى اسم حد حقيقى . ويكتب كل اللى فى نفسه . (اى اعتراف نفسه يعترفه من زمان). بس ياريت يبقى الكلام حقيقى وبلاش القصص والافلام اللى الواحد بيقراها دى على المنتديات اليومين دووول. ايه رئيكم ؟!! ما تيجى نجرب.