مصر العزيزه

تصدقوا بالله ...... انا ما اقتنعتش اننا بلد عالم تالت ... ويمكن خامس كمان الا قريب .... يدوب من كام سنه كده ..... اه والله ... اصل انا كان ديما عندى نظرية المؤامره ...فكنت شايف دايما انهم بيسموا مصر عالم تالت كذباً وافتراءاً. وكنت شايفها ام الدنيا ..... واحياناً ابوها كمان ....... وان العالم اللى بره دووول ما يعرفوش حاجه عنها .... وبيكرهوها وخلاص ...... لكن الحق يتقال ، مصر هيه امى ...... مع انى مش عارف ليييه ؟! بس هيه امى وخلاص...... بس للعلم انا عندى ام كمان والله تانيه احتياطى يعنى ، لو انها هيه اللى تعبت فيه ...... بس برده مصر هيه اللى امى وما حدش يقدر يقول غير كده لاحسن انتوا عارفين...... ما تقولشى ايه اديتنا مصر ..... وعلى فكره انا ليه عمام كتير كمان وابهات ، اه طبعاً مأمور القسم بتاعنا ، عمى . سيادة اللواء النقيب الرائد امن الدوله اللى بيحرس مصر من الاوباش اللى زى حالاتى فى منطقتنا ، برده عمى. حتة العسكرى اللى ماسك البتاع الراديو اللى فى ايده ده برده عمى . مديرى فى الشغل هو كمان من النهارده لازم يبقى عمى , دا حتى الا ده. الريس جد جدى مش عمى بس. شيخ مسجد الاوقاف اللى جنبنا ، اللى فى البلد بالذات اللى لما حبيت اقوله ان اللى بيعمله ده بدعه ولا يجوز ، ويقوم هو يهددنى من فوق المنبر يوم الجمعه بأمن الدوله ، ده يبقى برده عمى . مع اعترافه على المنبر برده ان اللى هوه بيعمله ده مكروه بس عادى يعنى هو احنا هنبقى احسن من النبى ؟!! ده كلامه والناس عماله تهز دماغها ومبسوطه ، ان ده مكروه ولا ايه مش عارف والله . مع انى مش فاهم ايه العلاقه بس برده عمى. العسكرى اللى شاورلى امبارح فى ميدان رمسيس من خلف القضبان الحديديه اللى بيحبسو فيها الناس علشان ما يعدوش ، علشان اعدى بعربيتى مع ان الاشاره حمرا ، ده برده يبقى عمى . بس لو رحت لقيت وانا بجيب شهادة المخالفات مخالفه اسمها كسر اشاره هيبقى مش عمى ، ولا حاجه ، هيبقى لموأخذه ابن ............. كل العساكر اللى شاورولى امبارح بصراحه انى اعدى بعربيتى والاشاره حمرا دووول كلهم عمامى. اساسا انا ماشفتش اى اشاره مش لونها احمر امبارح اساسا الا ما رحم ربى وكانت برده مقفوله او مفتوحه تبع الاسطى العسكرى برده مش تبعها. الاجمل بقى ان الكلام ده فى القاهره عاصمة مصر ، لاء وايه وفى اهم ميادين فيها. عموما القاهره دى بقى امى . وماما سوزان مبارك طبعا امى. والست بقى مشيره خطاب ، اللى محرمه ختان الاناث كده وخلاص ومصره ان الدين الناس كلها فهماه غلط الا هيه ، دى بقى عمت الكل مش عمتى وبس. مش دى اللى ناويه تولع البلد ، يبقى عمتنا كلنا ، يلا خليها تبقى مليطه. وفاروق بيه حسنى ( ابونا) وما ينفعشى اقول غير كده . مفيش حاجه فى الاسلام عجباه يبقى (ابونا) طبعاً. والغريب برده انه لسه موجود لا مات ولا اتعزل من منصبه. انا اطلع والله الاقيه. ووزيرالمواصلات المتكسره واللى عايز يغيرها بعربيات جديده كتر الف خيره ، بس طبعاً يكون نوعها شيفروليه . علشان دى احسن نوع بيحافظ على المظهر الحضارى .(ملحوظه ده اكيد كلامه مش كلامى لان شيفروليه شركته مش شركتى). برده عمى. ولا وزير النقل والمواصلات ولا الطرق والكبارى ، كلهم عمامى ، لان مع ان الطرق كلها فى مصر بقالها اكتر من 4 خمس سنين ما اترصفتش ولا اتعدلت ، الا ان العربيات كلها عارفه لسه تمشى عليه ، فده اكيد انجاز. شكرا مصر شكراً عمامى وما تقولشى ايه اديتنا مصر قول انت اديت ايه ، جتك النيله. لمصر اقلكم اقعدوا بالعافيه اممممممممه يا اخوانا: انا لو اتأخرت شويه ، يبقى رحت ازور العيله واقعد معاهم شويه واحتمال ما ارجعش. عموما ربنا يستر.

ياخى حاجه غريبه

- الحمامات العامه....... -نعم ؟!! اشمعنى ؟!! -انت هتخشلى قافيه .....ما علينا.... اقلك اشمعنى . عمركشى دخلتها وما لقتشى كلام مكتوب على قفاها؟! اقصد على ضهرها ؟! طبعا مكتوب ..... اساسى هتلاقى مكتوب تعليمات ارشاديه يا اما كويسه وتحض على مكارم الاخلاق ، يا اما زى الــ ..... بيبى (بحكم المكان يعنى ) وقليلة الادب ، بس فى النهاية بتبقى تعليمات . ثم هتلاقى تحت التعليمات "تعليقات" على التعليمات. المشكله ان مش دى الغريبه ، لان خلاص اتعودنا على وجودها لدرجة اننا ما بقيناش نستغرب .... الغريب فعلا انها نفس الكلام بنفس التعليقات سواء فى القاهره او الاسكندريه او السويس او الاسماعيليه او العريش او جمصه . الشركه او المدرسه او الجامعه نفس الكلام هو هو ..... ليه؟! انا ما اعرفش ، طيب ليه بيكتبوا كده ، مش فاهم .... بس اكيد عقده بلاش دى ..... اصل احنا يا مصريين عندنا مواهب وحاجات غريبه بصراحه .... وطباع اغرب واغرب يعنى مثلاً لما واحد يدخل عليك فجأه تلاقيك طوالى سأله سؤال تعجيزى وهو ( ايه ده ؟! انت جيت؟!) مع انه لسه هييجى . او مثلاً لو واحد بيرن جرس على حد وانت جيت عليه ، بتسأله هو مار دش؟! يقولك لاء تيجى انتى برده رانن الجرس على طوووول ، ( وكأنك بتقول للراجل اللى واقف اجرب انا يمكن يكون اللى جوه مستهفقق ولا حاجه). الاجمل والاجمل بقى لما تسأل واحد فى الشارع وبالذات فى القاهره على مكان معين (فيقوم يوصفلك ) فتسأل واحد وراه على طول بعد متر واحد او اتنين والله تلاقيه واصفلك حاجه تانيه خالص خالص ...... يعنى لو الاولانى قالك شرق يبقى التانى يقلك غرب ........ بلاش دى كمان الحته النفخ بقى لو قاعد فى اى مكان ولقيت حوار بين اتنين ورميت ودانك اللى هياكلهم الدود دول معاهم ، ويكون الحوار عن حاجه حصلت بين افندى منهم وبين واحد تانى ..... لازم تسمع كلمات ...... (بس على مين) ....( مش انا ) ..... (دا انا والله كنت .....). والغريب ان كل الشعب بيقول برده كده ..... واضح اننا مستوردين ناس من بره نضربهم على قفاهم بدل ما نضرب بعض ...... ( مهو اصل مش على حد فينا). بص ياعم الحج احنا شعب غريب .... وتصرفاتنا مع بعض اغرب. ايه اللى خلى" القاف" " الف " انا مش فاهم . يعنى بدل "القلم" يبقى" ألم" وبدل " الجيم" "قاف" مش ادر افهم بصراحه. عموماً اتمسوا بالخير . لحسن انا خلاص فصلت واحتمال اكلى كام حرف على كام كلمه انا كمان من شوية الحروف المتبقيين لى . اه صحيح بمناسبة الحروف : بيقلك مره واحد ألدغ فى كل الحرف الا اربع حروف (فينادى على حسام يقوله يا تامر) ااعدوا بالعافيه امممممممممممه

عزاء واجب

بكل الحب والتعاطف اعزى الجد وليس الرئيس / محمد حسنى مبارك لوفاة حفيده محمد اسأل الله ان يثبته ويثيبه ويهديه بفضل اخد اعز ما يملك . ولا نريد ان نربط ابداً بين حسنى مبارك الانسان وبين حسنى مبارك اللى سايبها تخرب لغاية ما الخراب نفسه زهق. نحن لا نشمت ابداً فى موت الاعزاء ولا المسلمين. بل نحن شعب اصله الشهامه ، وان كانت بدأت ان تتلاشى مع الزهق والقرف. الا اننا فى الاصل عرب ولم ولن نتخلى ابداً عن شهامتنا ، ولا اخلاقنا العربيه والاسلاميه. فلقد ورثنا الاخلاص والرجوله والوفاء فبكل الحب والاعتزاز والوفاء نرسل تحياتنا وامنياتنا بحسن الصبر والسلوان.

رأيى فى الكتابه

الكتابه اجمل حاجه ممكن الواحد يعملها..... وبالذات لما يكون الواحد بيحب الكلام الكتير زى حالاتى..... تقعد تكتب تكتب ، وما حدش يقاطعك نهائى ..... ولا حد يعترض ..... بس فيه حاجه غريبه !! انك مش فى اى وقت تقدر تكتب ، مع انك فى كل وقت ما بتبطلشى كلام... حقيقى .... الكتابه دى فعلا ملكه .... مش اى حد بيمتلكها.... واجمل حالاتها لما تكون مهيس ...... اه ... لانك بتقول اللى جواك ومش بتفكر فى اى حاجه..... فبيبقى الكلام طالع من القلب فبيوصل للقب. رشق على طول واجمل حاجه اختراع المدونات ده بصراحه.... تقعد تبعبع زى ماانت عايز ولا حد هيسأل فيك ، بس بترتاح .... وبتحس ان انت ليك لازمه ، مع انك مالكشى لازمه. وتحس انك مهم كده وراجل ذو نظريه ، مع ان انت لا مهم ولا بتفهم فى البطاطا. علشان كده انا مبسوط ، وهفضل اكتب واكتب ان شاء الله . ومش مهم ان ما حدش بيعبرنى وبيدخل المدونه ، المهم انى اكتب . واتخلص من العقد اللى عندى ... والطهق والكبت. انا كان نفسى الاقى تعليقات بالهبل وعداد الزوار هيفرقع .... بس لا التعليقات مليه الدنيا ولا عداد الزوار بيعد ، لدرجة انه نفسه اتخنق منى . واحتمال يشفله مدونه تانيه يشتغل فيها. بدل الفقر اللى هو شيفه معايا ده. انا نفسى اتخنقت منى ، ومش لاقى اى جديد ، ان حد حتى يشتمنى حتى .... ولا الهوى. ان حد يقولى انت كاتب ايه ؟؟! ولا الدموع . احيانا بس بلاقى عداد الزوار زاد مره واحده من غير سبب ، وغالبا بيبقى السبب انى نسيت العدد اخر مره. ففكرت ان الفرق كبير ، وهو لا كبير ولا حاجه . بس برده انا مبسوط ومشوار المليار ميل بيبدأ بفرتة كعب. ولا يهمنى واقعدوا بالعافيه. ولا اقلكم واقعد انا بالعافيه اممممممممممممممممه

احلى هديه

من احلى الهدايا اللى وصلتنى هو التاج اللى اهدتهولى اختى الصغنونه الغاليه كوكيتا اللى انا لغاية دلوقتى منبهر جداً بأسلوبها اللى انا حاسس انه اكبر بكتير من سنها ।

واللى خلتنى اقتنع انى لا بعرف اكتب ولا اى حاجه ، اى والله

وانا بعتذر لها جدا انى اتأخرت على الرد عليه بس ده فقط لانى عايز اجاوب بعمق زيها ، بس بصراحه لما عرفت ان الموضوع مش موضوع مووووود وان العيب فيه فقلت اجاوب وخلاص

عموما يالله بقى وامرى لله ،

ياقوووووووى

اسمك....؟
وئام
 المشهور بيه وسط اصحابك..؟
 ويكا

مجال دراستك ؟
هندسة بترول وتعدين
 اسم مدونتك ..؟
 بصراحه
 الصوره الرمزيه لمدونتك بتعبر عن ايه ...؟
الصوره اللى موجوده ده مش رمزيه دى حقيقيه لحضرتى بس من ضهرى اخترتها لعدة اسباب

بحس فيها بسعة الافق والطموح والفكر والامل فى بكره (غير انى عامل فيها عم الغامض اللى بيطلع بضهره فى الفيلم)
 هل فكرت في اغلاق المدونه ؟ والسبب ..؟
خالص بل بالعكس عندى امل انها تبقى ملتقى فكرى فى يوم من الايام ان شاء الله
 ايه رد فعلك لو حد قل ادبه عليك في تعليق ...؟
 مش هنشر التعليق طبعاً وعلشان كده انا مش فاتح التعليقات الا بموافقه منى . لان للاسف الغير محترمين كتييير
 اسوء مدونه...؟
 اكتر من واحده بصراحه

انا كنت مفكر ان اللى بيفكر يعمل مدونه ده راجل ذو فكره وهدف فبالتالى عمرى ما توقعت اقابل حاجه وحشه بس للاسف قابلت

هيحصل ايه للايميل بتاعك لما تموت...؟
 بص ، انا عجبانى مقوله سمعتها :

"كل كلمة عاشت ، كانت قد اقتاتت قلب انسان حي ، حتى اذا ما متنا من اجلها ، انتفضت حيه وعاشت بين الاحيا ، والاحياء لا يتبنون الاموات "

اتمنى تكون وصلت.

السفر بالنسبالك ايه ...؟
متعه ، بس مش بحب الغربه يعنى فسحه بس
المود بتاعك ؟
 ديما واخد الامور جد وعلى اعصابى بس لما بهيس ببقى مشكله.

بتعمل ايه في وقت فراعك..؟
 انا بحاول على قد ما اقدر ما يبقاش عندى وقت فراغ.
 الأكلة المفضله؟!
 البيض المقلى والشيبسى او البطاطس المحمره والبيتزا البيتى
الصفات اللي ورثتها عن والدك؟
 الجديه واللى فى قلبى على لسانى وما اخفشى من حد
 الصفات اللي ورثتها عن والدتك ..؟
 طيبة القلب وانى اطلع اطلع واجى على مفيش.

اكتر ست حاجات بتكرهها...؟
 الظلم

الكذب

الخيانه

الخداع

الاستهتار

الغباء طبعاً

اكتر ست حاجات بتحبها...؟

اسرتى الاداره

علوم الكمبيوتر المختلفه

معرفة ناس جديده واعمل علاقات كتيره

علم النفس والعلوم الانسانيه كلها

الادب

شخصيتك نوعها ايه....؟
خضره وبأستك من فوق
لماذا دخلت عالم التدوين ...؟
بسم الله الرحمن الرحيم ، اولا انا بحب اشكر حضراتكم ، بس نفسى اعرف مين ابن الـــــــــــ .... اللى ذقنى ودخلنى .

لالالالا بجد بجد ، هو الموضوع كان بيراودنى بس كنت منتظر لغاية ما جه صاحبى العاقل بمدونته يوريهالى فأتشجعت وجيت خاشش براسى على طول

بس بجد تجربه جميــــــــــــــــــــــله
اجمل كلمه اتقالت في وصف مدونتك.....؟
 مفيش حد قال حاجه لان مفيش حد بيقراها الا ما رحم ربى

أهمية التعليق بالنسبه ليك ؟
 النتيجه

احسن بوست كتبته ....؟
 طبعا كلهم احسن من بعض ههههههههههه

بس احسنهم " تعبت خلاص ونفسى اكاكى" وتعليقى على بوست للاخت سبهلله بعنوان "وحتى يدوم الحب"

افضل بوست قرأته ...؟
 بوست " ويدوم الحب" لسبهلله لدرجة انى علقت عليه ببوست كامل وعملت مدونه جديده علشان احط اجمل البوستات اللى هقراها بسببه.
 تمرر التاج لمين...؟
 والله هو فيه ناس كتير بصراحه

بس انا هختار اتنين مش واحد " رغبة فى سرعة الانتشار" او من باب التغيير .

الاولانى لصاحبى العاقل صاحب مدونة " مهاترات عاقل"

والتانى للاخت الصيدلانيه التعبانه والشقيانه اللى انا والله تعبتلها اللى طالعه نازله " صيدلانيه طلعه نازله"واللى هيه طبعا غنيه عن التعريف" ولاز يجوبوه طبعاً ان شاء الله.

واقعدوا بالعافيه

امممممممممممممممه

ويدوم الحب

كما وعدت بأنى سأتشرف بالتعليق على المقال الجميل السابق (ويدوم الحب) من مدونة الاخت (سبهلله(
قبل ان ابدأ اسمحوا لى ان اسأل عن بعض الامور التى نفتقدها بالوراثه ، حتى اصبحت هى الطبيعيه والبديهيه من شدة تعودنا عليها وتوارثنا اياها، .لماذا يكون دائما ثوران الحب والمشاعر وبراكينه المتدفقه الملتهبه فى فترات الارتباط ما قبل الزواج ، وسرعان ما هى ان تبدأ فى الخمود والخمول مع بداية الارتباط الرسمى (الخطوبه) ثم للاسف بعد الزواج ، ثم ما تلبث ان تلفظ انفاسها الاخيره مع نهايات شهر العسل بالتمام والكمال؟!!
مع اننا لو نظرنا نظره بسيطه ومتأنيه لوجدنا انه كان من الطبيعى والبديهى ، العكس هو الصحيح .فالارتباط الرسمى والشرعى هو بمثابة اشارة البدأ والاذن ببداية المشوار الطويل ،والحياه التى لا تنتهى الا بأنتهاء العمر.لقد توارث الابناء ميراثاُ ناقصاً تم توارثه بحكاوى( الف ليله وليله والافلام الرومانسيه )التى لا تبدأ فقط من (نظره فكلمه فموعد فلقاء) فالفلم او القصه وينتهى (بانهم اتجوزوا وعاشوا فى تبات ونبات وخلفوا صبيان وبنات) هل الذى لم ينجب صبياناً وبناتاً لن يعيش فى تبات ونبات ؟! والذى خلف كيف سيعيش ؟!!اين الكتيب الارشادى والكتالوج؟!!كيف سيعيشوا فى تبات ونبات . لقد اذهب السلف من معليمينا سواءاً كانوا كتاباً ام كانوا اباءاً فى وصف تفاصيل العلاقه الحالمه الرومانسيه الجميله التى تجمع بين الحبيبين بكل تفاصيلها الدقيقه ، فمن ثم علمنا جيدا ماذا سنفعل حين نحب ، فلقد وضع ، السلف،اقدامنا ليس فقط على بداية الطريق فقط ، بل وعلى الطريق كله ايضاً لكن (الا حته ) (ما بعد الزواج) (وهو ده الطريق كله اساسا) لقد سقطت هذه المرحله سهواً منهم وكأنها لا تعنيهم ولا تعنينا . فخلَف هذا انطباع لدينا فى اللاوعى انها مرحلة تتسم بالعمليه البحته ومعارك الحياه الجمه ولا يتسع فيها المقام ولا المقال ولو لبعض من الرومانسيه .لقد ورثنا الاباء ميراثاً ناقصاً خاطئً ، ظالمٌ جائر . ولم يدلونا على الطريق .قالوا لنا دون ان يقصدوا ان اقصى درجات الحب وثورتة وفورته فقط فى ما قبل الزواج . ولم يقولوا ان حلاوته لن تذاق ولن تستملح الا بعد الزواج.لا اذكر ابداً انى رأيت يوما مسلسلاً او فيلماً او حتى قصه تحدثت عن جمال وروعة الحب بين اثنان متزوجان.اللهم الا قصه بيخه عن زوج وزوجه يجمعهم النصيب بعد قصة حب لمدة خمس دقائق فى اول الفيلم ليموت الزوج مقتولاً على يد اعدائه فتقوم المرأه بالانتقام او العكس، او عن حتى (كيف تم افساد علاقتهم عن طريق حماته المفتريه)مع انهم (كانوا)بيحبوا بعض يا حرام.ان البيت العربى مُحتاج لنماذج من الحياه الواقعيه او حتى الخياليه للزوج المحب الحنون والزوجه المحبه الولهانه ، انه فى اشد وامس الاحتياج لتلك التجربه المثيره. انه محتاجٌ لأحد يفك عقال لسانه ويرفع عنه الحرج فى ان يقول لزوجته( انا بحبك) من اعماق قلبه. ان الرجل العربى و المرأه العربيه يستحيان بعد الزواج ان يقولا لبعضهما البعض (انا بحبك)وكأن احدهما سيتهم الاخر بأنه ضعيف ومعدوم الشخصيه (وهيبقى دلدول لو قال ان بحبك(وقد يكون هذا الجوع هو من الاسباب الرئيسيه والقويه لنجاح ذلك المسلسل التركى الذى لا احب ان اشاهده على الاطلاق (مسلسل نور ومهند) فكما علمت من بعض الاصدقاء انه يصف علاقة رجل بزوجته وكيف يختلفوا وكيف يتحايلوا لان يصطلحوا مره اخرى.انى ارى انه هنا فعلا , فى الزواج، نستطيع ان نجد دفء المشاعر الجميله العفيفه الحقيقيه المباركه من رب العباد لرضاه عنها لما لا استطيع ان اقول بكل ثقه وبدون خجل" .انا احب زوجتى من اعماق قلبى ، فهى من اختارتنى ووافقت عليَ رغم عيوبى" فانه انتقاص لنفسى اذا ما لم ارضى عنها.هى اول من سيكون بجوارى فى حالة سقوطى ، بل من الممكن ان تسقط معى بكامل ارادتها اذا ما لم استطع انا ان اقوم او هى تنقذنى او تنتشلنى.انها رفيق دربى ولن يتزن ميزان حياتى بدونها وبدون اولادى .انى اريد الان وبكل قوة وصدق ان اعيد النصاب والميزان لوضعه الطبيعى بدلا من ذلك الوضع المقلوب . فالحب اولى ان يكون بين الزوج والزوجه وليس قبل ذلك. اما قبل ذلك فهو فقط للدراسه والتأنى واحكام العقل فى الآخر حتى يحسن الاختيار (وما يندبش) (اما لو اندبينا خلاص ، فولات حين مناص) سبق السيف العزل.هنا اكيد انا بحبها مدام اخترتها.احبك يا زوجتى من اعماق قلبى فلا تزعجى ذلك الحب بأفكار غريبه ملهاش اساس.
هذا وحتى يدوم الحب .



الى ان ألقاكم.

ااعدوا بالعافيه.
اممممه.

يا سلام على زمان وروقان زمان

مفيش احسن من امبارح ... حقيقى .... لانه خلص بأمان الله والحمد لله رب العالمين انا لسه عايش وكويس اهه..... ولو كنت صحتك ادهورت (ربنا يعافيك) يبقى برده امبارح كان احسن لانك ما كنتش لسه تعبت. النهارده .... او بمعنى اصح العصر اللى احنا فيه ..... دايماً كلنا مشغولين ، وديما مستعجلين، ودايماً مضغوطين ..... امباح >>>>> كنا هاديين ، ومش مستعجلين ، ومش مضغوطين . لو مش مقتنع تعالى نحسبها. هحكيلك شوية حاجات كلنا بنعملها دلوقتى ومش واخدين بالنا منها وما كناش بنعملها ايام زمان ولا كانت موجوده. - حضرتك - اشمعنى . مهم اوى؟!! اوى؟!! - الاجابه : مش اوى يعنى . طيب ليييه ديماً متوقع ان حد هيتصل بيك على الموبايل فى لحظه (وبخصوص موضوع مهم)؟!! والدليل على كده ان لو لا قدر الله البطاريه قربت تفضى بتتجنن لغاية ما تلاقى شاحن وتشحنها . او مثلاً موبايل حد رن جنبك (ومع ان الرنه مش رنتك) بتطلع الموبايل بتاعك وتبص وتتأكد انه مش انت؟!! (طبعاً صداع ، وحاسس طول الوقت انك متوتر ومستنى حاجه مهمه هتحصل ، وبرده مفيش حاجه بتحصل) بلاش دى الاخبار السوده اللى كل حبه بنسمع عنها دى (انفلونزا الطيور على خنازير على انفجارات على تهديدات على شتيمه على ضرب) كل ده طبعاً بفضل القنوات الفضائحيه والجرايد والمهلبيه. كان مالنا ومال الكلام ده كله . ما كان اخرنا الاخبار والاهرام والجمهوريه. كنا ما بنقراش غير ان الحكومه بتاعتنا الله يكرمها ، واللى مفيش غيرها فى العالم، عماله الله يجبرها بتهشكنا وبتبشكنا وسهرانه فى على خدمتنا . فمكناش لا بنسب ولا بنلعن في اللى جابوها ولا اللى عملوها. وخد دى كمان انت نفسك لولا التكنولوبيا والفصولوبيا والانترنت واخوات الست ما كنتش قعدت وضيعت وقتك دلوقتى قدام مدونة حضرتى عمال تقرا وترد. (دا لو انت رديت اساسا وما قلتش برده انا مش فاضى)وما كانشى ابوك وامك او يعنى الست مراتك عماله تشد فى شعرها منك وعمالين يقولولك كفايه بقى وتعالى اقعد معانا شويه خنقتنا. وكان زمانك حاسس بفراغ وان الوقت طويل وعمال تدور على حاجه تعملها .(بس برده كنت هتحس بالوقت وان الدنيا مش متكربزه فوق دماغك) ولو انت عاقل شويه وبتمسك نفسك شويه وما بتقعدشى ليل نهار عليه ، يبقى يا معلم خش بيه على الدش وما ادراش ما الدش ، فيه اللى تدرى وما دريتش . لو مش اخبار يبقى افلام ولو مش افلام يبقى مسرحيات ، يا اما برامج يا اما مسابقات . يعنى ما انتاش قايم مش قايم. بالله عليك كان فيه حاجه زمان كده . روقان يا عم واياكشى تولع . لا حد يجيبك من اى مكان بالموبايل ، ولا تزعل ولا تنفلق من اللى بيحصل حواليك لانك مش دارى اساسا . ولا قاعد ماسك اعصابك وبتقرى لواحد زى حلاتى . يابختهم. عموماً شرفتونا الشويه دووول واقعدوا بالعافييه اممممممممممه.