الاثنين، 19 يوليو، 2010

مين ده ؟!! .... لا ابداً ده وزير الاعلام


ده كان السؤال بتاعى ....... لواحد واقف قدام عرض معمول لاحد المشاركين فى معرض فى احد المولات فى جده.
وده كان الرد بتاعه.
مين ده ؟!!! (وانا بشاور على واحد واقف وسط خمس ست اشخاص واقفين ببساطه وهدوء شديد ، قدام احد العروض لاحد المشاركين فى المعرض) .
وكانت الاجابه ابسط وابسط ، من قبل الراجل المصور- البسيط هو كمان – "ده ، دا وزير الاعلام".
الكلام ده حصل لما كنت واقف من كام يوم انا ودكتور صاحبى بنتفرج على بعض الاعمال الفنيه الموجوده فى المعرض فى حين لقيت واحد وواحده عمالين بيصوروا مجموعة اشخاص يعدوا على اصابع اليد ......
فاتجهت ناحيتهم وسألت اللى بيصور ده ، (لان اللى كانت بتصور مش الحلوه اوى يعنى ، فعلشان كده سألت اللى بيصور مش بتصور) ، وقولتله مين ده؟!!!
فرد الراجل ، بكل عادى يعنى ، ان ده وزير الاعلام ........ فبصيت لصاحبى كده وابتسمتله ابتسامه خبيثه ، هو بس من اللى واقفين يعرف معناها.........
بالبساطه دى ؟!!!ا
عادى كده ؟!! وزير الاعلام ..... وكل اللى حواليه 4 – 5 افراد واخره كمرتين فوتوغرافيه يا عينى ، وكاميرا فيديو واحده بس ...............
الله يهدى وزير الاعلام بتاعنا ...... دا كان زمانه عمل فرح وهوليلا وبوليكا ........ وزرغطى يا فوزيه ........ واحلى مهرجانات.......
لدرجة ان اللى بيتفرج على الحدث نفسه بينسى الحدث وبيركز فى سعادة الوزير واللى بيحصل حواليه.......
وبعدين خلى واحد عادى زى حالاتى كده يقرب من ناحيته ولو على بعد كيلوا .............. يانهار ابيض يا جدعااااان ....
دا كان اتخرم والله ..............
الغريب بقى ان الدكتور صاحبى ده ، كان قاعد فى الرياض الاول ..... فحكالى الاغرب بقى .......
قالى انه كان نازل من عربيه لقى الملك عبدلله نفسه ، معدى من جنبه الناحيه التانيه بالعربيه عادى جداً هو ورئيس دوله او ملك تانى عربى برده مش فاكر  .......
من غير لا حد يرميك من على الطريق ، ولا يقبض عليك انك ارهابى ، ولا انك تتحجز فى اول المحور اساسا لمدة 3 ساعات ...... علشان سعادته احتمال نفسه تهفه و يعدى .......

الله يهدى المصريين ، ويهب لهم من صلح شأنه ، وامره........ ليصلح ما تبقى لنا من هذه الــــــــــــــــــمـصر ...........

هناك 4 تعليقات:

افروديت يقول...

أقول عليك أيه يا ويكا بتحب تنكشني دايمآ.. أحنايبني المسئولين عندنا فازين ومبدعين زي ماأنت عارف والدكتاره قالت لهم من عاشر المستحيلات الأختلاط بالشعب لأن الشعب ده بياكل فول وعيش بقمح مسرطن خوفآعليهم من أنتشار العدوي طبعآ

في داهيه الشعب ياأخي بس يعيشوا هما...دالو وزير هنا فكر يروح سيتي ستارز مثلآ كانوا يخلوا المول كله قبلهاب3 أيام وفضوا مدينه نصر كمان عشانه.."بلد غابه ومسئولينها ديابه"

ويكا يقول...

يانهار ابيض
دا انتى مفروسه فارسه

دا انا كنت مفكر انى مفروس جامد

بس طلع فيه افروديت اكتر منى

زهرة(جنى)الاسلام يقول...

ههههههههههههههههه
السلام عليكم
اصلا حضرتك من قبل ماتعدى تروح للوزير
لو فكرت بس هتلاقى حضرتك فى ابو زعبل او اى شخص حب انوا يتجرأ
طب ولية وزير لو كانمحافظ
يعنى اية اللى يحصل اوو نائب من نواب الشعب بردة اية اللى بيحصل
حجات كتيررررررررررررررر
غريبة بس دة طبع الشعب المصرى انوا يسكت ويستحمل

ويكا يقول...

زهره

خليه كده ساكت ، لغاية الريس الجديد التانى يجيله ويظبطه هو كمان

Related Posts Plugin for WordPress, Blogger...