عندما اُزيد فى الإلحاح
فأعلم انى اوشكت ان اترك ما ألح عليه
*****************************************
عندما احتاج صديق اتصل باقرب الناس الى قلبى مهما كان بينى وبينه من خلاف بدون أى كبر او تحفظ
واتوقع ان يسعفنى بدون مناقشة اى شئ بخلاف ما طلبته بسببه
لذا اُصدم اشد الصدمه
عندما
لا يكون هناك
*****************************************
العمل مهم
ليس للقدره على المعيشة
بل للمعيشة نفسها
*****************************************
لا استطيع ان افعل شئ لا أُمن به
وان فعلت
سريعاً ما اتراجع دون اى غضاضه
*****************************************
هناك خطأ ما فى حياتى منذ فتره طويله جداً تعدت السنوات الطويله
ولا زلت لا اعلمه
بالرغم من انى أحصيت مميزاتى وعيوبى وفهمتنى جيداً
الا اننى
لم افهم هذا العيب الرئيسى الى الان
*****************************************
مجنون : جـــــــــــداً
وربنا ستر ان فيه حاجات كتيره بتقيدنى
وبالاخص الدين
واتمنى ابطل اكسره ..... كفايه بقى
*****************************************
مضايق من نفسى لتقصيرى فى اشياء كثيره
*****************************************
فيه ناس كتيره بتحبنى اوى
وانا للاسف عايز اقولهم مفاجأه خطيره
والله العظيم بجد بحبكم برده
بس مش بعرف اعمل الصح علشان تفضلوا عارفين انى فعلا بحبكم
لا اجيد هذا مطلقاُ
ودايما بأخذلكم
*****************************************
بيحبونى بعمق
وبأجرحهم
للاسف
ده لأنى انا كمان بحبهم
*****************************************
بحثت عنكم فى عز حاجتى إليكم فلم اجدكم
شكراً
لعدم تواجدكم
*****************************************
بعشق الادب
الا انى لست كثير القراءه بل مقل جدا
لانى لا عندى وقت ولا خلق اقرأ
الا انى اتذوق الادب بشكل مذهل
انا مستغربنى
*****************************************
بعرف شئ عن كل شئ الا انى مش ثابت فى شئ
ودى مصيبه وجايبالى الكافيه
*****************************************
ما بعتذرشى لحد غلطان
حتى ولو الدنيا كلها وقفت فوق راسى
*****************************************
لما بعتذر
اعرفوا انى فعلا اعتذرت
*****************************************
عِندى لأبعد حد
هتمسكوهالى وتقولولى اقفش .... عيب اهه
هقولكم :
طب ما انا عارف
*****************************************
لما بيحاول بنى ادم يغظنى
بعرف اخليه يولع من الغيظ
من غير ما اعمل اى حاجه
فنصيحه
بلاش حد يحاول يغظنى لانى ما بتغاظشى وفى الاخر انت اللى دمك هيتحرق
وفى الاخر
هتشتمنى
وانا ما عملتش حاجه
:)
*****************************************
نفسى ادخل الجنه
*****************************************
فيه ناس لما تشوف طريقتى وفكرى يقولوا عليا سلفى
ساعتها بيصعبوا عليا اوى
لان
لما يقولوا عليا ان بالشكل ده سلفى ...... يبقى هما ايه على كده ؟!!
*****************************************
نفسى ابقى سلفى المنهج فعلاً لانى بالفعل سلفى المعتقد زيكم كلكم
لسه المنهج بقى
يارب اعنى
*****************************************
السياسه بحبها جداً
وبكره الأغبياء بتشدد
*****************************************
كنت بستغرب ازاى حد يقول على اللى مخالفينه انهم حمير واغبياء
على الملأ
( اه والله وورتها لصحابى واحنا فى الميدان )
وفى نفس الوقت عمال ينادى بالديموقراطيه وحرية التعبير والرأى والرأى الاخر
الا انهم لما كتروا ما بقتشى استغرب
حفظتهم خلاص
*****************************************
لما تخالف حد فى الرأى من المتشددين لرأيهم تلاقيه قلب وشه
واتهمك بالتشدد والانحياذ لرأيك
الله !!!
امال انحاذ لرأيك
وبعدين ما يمكن تكون انت اللى متشدد ومنحاذ لرأيك !!
ولا هو علشان عادل امام رسمها فى عقول الناس ان ابو دقن او ابو علامة صلاه هو المتشدد بس ؟!!
*****************************************
الى ابناء عادل امام
امتنعوا
*****************************************
الى ابناء الريس
ربنا يشفيكم
*****************************************
الى عصام شرف
اتلحلح شويه الله يكرمك
*****************************************
الى المشير
انت لازم تجيب الكلام لنفسك
*****************************************
الى مصر
انتى التى فى خاطرى
*****************************************
الى اللى بيدَور على غلطه املائيه
خد الكلمه دى
تامر
اصل دى اصلها كان
حسام
*****************************************
*****************************************
انا تعبت
بس مادام لسه بتقروا يبقى لسه عندكم نفس
الله ينور
عاش .... عاش
الى اللى بيكتبوا بوستات طويله اوى اوى
( ما اقصدشى حد والله العظيم بعينه )
حرام عليكم فيكم ناس بتكتب حلو فعلا وعايزين نكمل البوستات بتاعتهم للاخر
حاولوا تقصروها شويه علشان ما نتحرمشى من مقالاتكم
*****************************************
الى اللى لسه بيعد فى الغلطات الاملائيه
انا مش هراجع البوست الا مره واحده
( زى كل مره بصراحه )
وبسرعه كمان
يعنى هنيالك يا عم
**************************
اخيرا
ينفع تقولوا
استغفر الله العظيم واتوب اليه
ثلاث مرات ؟!
مش هتخسروا حاجه ويمكن يتفغرلكم فعلاً مين ادراكم
******************************
اخيرا
ينفع تقولوا
استغفر الله العظيم واتوب اليه
ثلاث مرات ؟!
مش هتخسروا حاجه ويمكن يتفغرلكم فعلاً مين ادراكم
******************************
انتهى
هناك 7 تعليقات:
أولاً (:
ثانياً أنا مبراجعش البوست خالص (:
ثالثاً البوست مش طويل
رابعاً تامر أصلها ماهر (:
خامساً أنا داخل سخن علشان سادساً (:
ههههه
سادساً سوررى ... يعنى اسف
سابعاً ربنا يخليلك زوجتك و أولادك
سابعاً سلام بقى (:
صحيح أنا مجنون أكتر منك على فكرة (:
رامى
اولاً انا مبسوط جدا جدا جدا انى شفتك هنا تانى
ثانياً الحمد لله انى مش لواحدى
ثالثاً لييييه كده زعلتنى دا انا كنت مفكره طويل :)) احبطتنى
رابعاً بس حسام اكثر خطأ وهذا هو المطلوب :))
خامساً اللى هى سادساً merci يعنى شكراً
سابعاً الله امين ويكرمك يارب
سابعاً مكرر ( الظاهر دايبه نفس المجموع )
ليه بس ما احنا قاعدين يبنى دايما مستعجل كده
صحيح اه انا عارف انك مجنون وانا شبه قلتلك كده لما اتقابلنا
بس انت مجنون بشكل وانا مجنون بشكل تانى خااااالص :))
واخيراً بقى يا معلم
انت فيه حاجه شفتهالك من يوميها عايز اقولك اد ايه انا انبسطت بيها ومصر اكلم عنها بس ما جاتشى فرصه
"كنت بقلب مره فى الفيس فى صور بعض الناس اللى متشيره قدامى فلقيت افطار رمضان لمجموعه من المدونين وانت كنت حاضره بابتسامتك الجميله دى فمش عايز اقولك كنت مبسوط ازاى وفرحان بيك اد ايه " واصريت اكلمك فى الموضوع ده وادينى بكلمك
نورت يا مجنون
على فكرة
أولاً أنا كنت اقصد بأسف دى
أعتذار
ثانياً الأفطار الجماعى
دى تانى سنة على فكرة و دة العادى المفروض يعنى (:
ثالثاً على فكرة البوست طويل بس علشان متجزأ محستش بيه (:
رابعاً انا دايماً هنا على فكرة
خامساً اوعى تُحبط
رامى
اولا مهى merci دى يعنى قبول الاعتذار بكل احترام
رابعاً على طول : اسعدتنى كثيراً ويارب على طول
خامساً ان شاء الله لا :))
لما بوستاتك طويلة امال اللي انا بكتبه ده ايه ؟ كتب ؟؟
طالما لسه معرفتش الغلط فين يبقى لسه معرفتش نفسك كويس , دور تاني .
((كنت بستغرب ازاى حد يقول على اللى مخالفينه انهم حمير واغبياء على الملأ ( اه والله وورتها لصحابى واحنا فى الميدان )وفى نفس الوقت عمال ينادى بالديموقراطيه وحرية التعبير والرأى والرأى الاخر الا انهم لما كتروا ما بقتشى استغرب حفظتهم خلاص))
يقول النبي صلى الله عليه وسلم عن بعض الناس (يرى القذة في عين اخيه ولا يرى الجذع ف عين نفسه ( فلا تذهب نفسك عليهم حسرات فقط اعتني بنفسك .
انا اعتبر ان احدى الخطايا هي رفع الناس فوق قدرهم ولكن عندما يثبت ان من اعتقد انهم ذوي عقول اكاديمية هم من محبي بديعة مصبني الرقاصة حتى في اسلوب الردح , فثق انك المخطىء لا هو.
هههههههههه مهو انت منهم يا اسلام ههههههه كتب يبنى كتب
وبدور والله لسه يا اسلام ... امال انا بقول كده ليه بس على فكره الحاجه اللى بدور عليها دى مش لازم تكون حاجه وحشه واظن ان انت فاهم كده
اما موضوع بتوع الحمير دول والله فعلا وريت لهيثم على الموبايل مشيربن ايه واضايق اوى بس انا ما اضايقتشى بصراحه لانى كنت عارف انهم كده ، بيبان يبنى والله ....
بس بجد ههههههههههههههههههههه تعبيرك عالى ههههههههه
مبسوط جدا جدا لما لقيتلك تعليق
موضوع راائع و بصراحة حبيت أقتبس منو كتير بس ... :)
تسلم ايدك عليه
إرسال تعليق